Dayl leit drinka may alcohol vann si en latt stress henn, adda laynich shpiahra, adda, vann si gebored sinn. Dusht du may drinka es du als hosht? Vann dusht, vi kansht du shuah macha es du nett zu feel drinksht adda addict vatsht zu alcohol? Do sinn dayl sacha es dich helfa kann fa nett zu feel drinka.

•  Vass is en reasonable amount funn alcohol fa drinka?

•  Vi fa vissa eb du zu feel alcohol am drinka bisht

•  Fimf sacha es dich helfa kann kantrohla vi feel alcohol es du drinksht

 Vass di Bivvel sawkt: “Sei nett mitt selli es zu feel drinka.”—Shpricha 23:20.

 Ebbes fa denka diveyya: Di Bivvel sawkt nett es ma goah kenn alcohol drinka dauf. (Breddichah 9:7) Avvah, es dutt uns veisa es’s en diffans is zvishich bissel drinka, adda zu feel drinka, un ksoffa vadda. (Lukas 21:34; Epheser 5:18; Titus 2:3) Even vann du nett ksoffa vatsht, zu feel alcohol drinka kann dei health afekta un dich fahalda funn goodi decisions macha. Es kann aw dei friendships mitt anri afekta.—Shpricha 23:29, 30.

 Feel leit mitt authority sawwa ’sis en diffans zvishich samm alcohol drinka un zu feel alcohol drinka. Si gayn bei vi feel es ebbah drinkt inna dawk, adda vi feel dawwa inna voch es si drinka. a Avvah, alcohol afekt alli ebbah diffand, un’s sinn zeida vann’s besht is fa goah nett drinka. According zu di World Health Organization:

 “Even ay adda zvay drinks kenda zu feel sei—fa’n example:

•   Vann du am foahra bisht adda equipment am shprenga bisht.

•   Vann en fraw en baybi havva zayld adda am nursa is.

•   Vann du sirten medication am nemma bisht.

•   Vann du sirtendi health problems hosht.

•   Vann du nett kantrohla kansht vi feel es du drinksht.”

 Vass di Bivvel sawkt: “Vella unsah layves-lawf ivvah-denka un unnah-sucha.”—Glawk-Leedah 3:40.

 Ebbes fa denka diveyya: Vann du di gans zeit vatsht vi feel es du drinksht un tshaynshes machsht vann’s nohtvendich is, dann kansht du dich protekta funn shlechti sacha es kumma funn zu feel alcohol drinka. Do sinn samm vayya es veisa kenna eb du zu feel am drinka bisht.

•   Du brauchsht alcohol fa haebbi sei. Du maynsht du musht alcohol drinka fa relaeksa, fa fann havva, adda vann du mitt friends bisht. Du dusht drinka fa dich helfa deela mitt dei problems.

•   Du drinksht may es du als hosht. Du drinksht eftah es als hosht. Dei drinks henn may alcohol drinn, un’s nemd may drinks fa da saym afekt havva es difoah.

•   Dei drinkes hott dich problems gevva dihaym adda an di eahvet. Fa’n example, du shpendsht may geld uf alcohol es du aforda kansht.

•   Du machsht shlechti decisions nohch es du alcohol drinksht, so vi vann du diseiytsht fa foahra, shvimma, adda equipment shprenga.

•   Anri sinn concerned veyyich vi feel alcohol es du drinksht. Du vatsht upset vann ebbah ebbes sawkt diveyya. Du drinksht hinna rumm adda du leeksht veyyich vi feel es du drinksht.

•   Du hosht en haddi zeit shtobba drinka. Du hosht boviaht nett so feel drinka adda dann shtobba, avvah du kansht nett.

 1. Mach en plan.

 Vass di Bivvel sawkt: “Es zayld goot aus shaffa fa selli es sacha aus plenna, avvah ebbah es sacha zu kshvind dutt zayld oahm vadda.”—Shpricha 21:5, NWT.

 Boviah dess: Mach en plan fa nett alcohol drinka alli dawk. Uf di dawwa es du drinka zaylsht, setz en reasonable amount uf vi feel. Plan fa at least zvay dawk di voch nett alcohol drinka.

 “Reklah breaks nemma funn alcohol drinka is da besht vayk fa dich helfa nett addict vadda,” sawkt en U.K. based alcohol education charity.

 2. Mach dei plan shaffa.

 Vass di Bivvel sawkt: “Machet faddich vass diah ohkfanga hend.”—2 Korinther 8:11.

 Boviah dess: Lann vass da normal drink size is so’s du aus fikkahra kansht vi feel es du aekshli am drinka bisht. Finn healthy shtoft fa drinka es du gleichsht un es kenn alcohol drinn hott, un hald blendi uf hand.

 “Glenni tshaynshes kenna en grohsah diffans macha in problems es kumma kenna funn alcohol drinka,” sawkt da U.S. National Institute on Alcohol Abuse and Alcoholism.

 3. Shtikk zu dei decision.

 Vass di Bivvel sawkt: “Losset eiyah yau, yau sei un eiyah nay, nay sei.”—Jakobus 5:12.

 Boviah dess: Vann ebbah dich en drink offert un’s gayt geyyich dei plan es du gmacht hosht, sei reddi fa “Nay” sawwa in en shaynah vayk, avvah mach’s kliah es du nett dei meind tshaynsha zaylsht.

 “Da kshvindah es du nay sawksht vann ebbah dich alcohol offert, da eesiyah es’s sei zayld fa nett nei gevva,” sawkt da U.S. National Institute on Alcohol Abuse and Alcoholism.

 4. Focus uf vi dei decisions dich helfa zayla.

 Vass di Bivvel sawkt: “Es end funn ebbes is bessah es da ohfang.”—Breddichah 7:8.

 Boviah dess: Mach en list funn di reesins favass es du diseiyt hosht fa nett so feel alcohol drinka. Fa’n example, es kann shtoft sei so vi able sei fa bessah shlohfa, bessah health, bessahri friendships mitt anri, un bessah able sei fa acht gevva uf dei geld. Vann du shvetsht mitt anri veyyich dei decisions, focus uf vi’s dich helft un nett vi hatt es’s is.

 5. Gukk zu Gott fa hilf.

 Vass di Bivvel sawkt: “Ich kann alles du deich da vann es mich shteik macht.”—Philipper 4:13, NWT.

 Boviah dess: Vann du concerned bisht veyyich vi feel alcohol es du am drinka bisht, bayt zu Gott fa hilf. Frohk een fa dich helfa shteik sei un fa self-kantrohl havva. b Un nemm zeit fa lanna vi Gott Sei Vatt, di Bivvel, dich helfa kann. Mitt Gott sei hilf, dann kansht du in kantrohl bleiva funn vi feel alcohol es du drinksht.