•   Dien Ehepoatna jleicht aules jeplont to haben, oba du jleichst Dinja uk onverhofs to doonen.

•   Du best eene ruje un trigjhoolende Persoon, oba dien Ehepoatna jleicht sea, mank Menschen to sennen.

 Haft dien Ehepoatna eene Jewanheit, waut die oajat? Wan du doa emma äwa nojrebbelst, kaun daut junen Ehestaunt schoden. Un daut es krakjt, waut de Schreft uk sajcht: “Wäa daut oba emma wada opprieet, drift goode Frind uteneen” (Spricha 17:9, PB).

 Enne Städ met dienen Ehepoatna to strieden äwa eene Aunjewanheit, waut die oajat, proow, daut opp eene aundre Wajch to seenen.

Waut wie en disen Artikjel seenen woaren

•  Waut kaust du doonen, daut du die nich soo leicht äwa Jewanheiten oajascht?

•  Waut Ehepoatna sajen

•  Froagen toom doaräwa räden

 Krakjt dee Jewanheit, waut die aun dienen Ehepoatna oajat, kaun uk eene Ieejenschoft sennen, waut du jleichst. See wie mol dree Biespels:

 Chelsea sajcht: “Mien Ehemaun es foaken sea langsom wan dee waut deit, ooda sikj reedmoakt toom wua hangonen. Oba derch deeselwje Aunjewanheit es hee uk jeduldich, mau rajcht met mie. Eenjemol oajat mie daut, daut hee soo langsom es, oba oppe aundre Sied es daut uk waut, waut ekj bie am jleich.”

 Christopher sajcht: “Miene Fru es sea neiw woo see aules plont; see mott daut Jefeel haben, daut aules schaufen woat, un daut kaun eenjemol toom oajren sennen. Oba wiels see om aules soo bekjemmat es, haft see uk emma aules reed.” 

 Danielle sajcht: “Eenjemol späat sikj daut soo, mien Maun es nich sea bekjemmat, un daut moakt mie een bät vedrislich. Oba oppe aundre Sied, jleicht ekj daut von Aunfank aun, daut hee emma soo sondasorj es. Hee blift gaunz ruich, wan hee en eene schwoare Loag es, un daut jleich ekj sea.”

 Soo aus Chelsea, Christopher un Danielle jelieet haben, haft eent un deeselwje Ieejenschoft bie dän Ehepoatna noch foaken twee Sieden: eene goode un eene schlajchte. Wan daut soo es, kaust du nich eefach de schlajchte Sied utlaschen, onen daut du uk de goode Sied utlaschst. Daut es soo aus wan du wurscht wellen bloos eene Sied von een Zent wajchschmieten – daut schauft eefach nich.

 Oba secha, nich aule Ieejenschoften haben eene goode Sied. Biejlikj sajcht de Schreft, eenje Menschen sent eefach soo aus “een oajalicha Maun” (Spricha 29:22, PB). Wan daut soo es, mott wie ons sea aunstrenjen, daut soo to doonen, aus daut en Efeesa 4:31 (PB) sajcht: “Woat nich mea betta un fuchtich äwa eenaunda un vezoajcht junt nich. Hieet opp to schrieen un to beleidjen.” a

 Oba wan daut bloos eene Jewanheit es, waut wie nich jleichen, wudd wie sellen dän Rot ut de Schreft nokomen, waut doa sajcht: “Vedroacht eena dän aundren . . . wan wäa eene Kloag jäajen dän aundren haft” (Kolossa 3:13, PB).

 Proow, de goode Sieden von eene Ieejenschoft to seenen. Un denkj doaraun, daut daut veleicht mau rajcht waut wia, waut die aum Aunfank no dienen Ehepoatna trock. Joseph, een Ehemaun, sajcht: “Wan wie emma bloos doaraun denkjen, waut ons oajat, es daut een bät soo, aus wudd wie bie eenen sea schmocken Steen – soo aus eenen Diamaunt – emma bloos no de schoape Kaunt kjikjen un nich doano, woo schmock dee blenkjat.”

 Denkjt ieescht jieda eena äwa dise Froagen no un dan rät toop doaräwa.

•   Haft dien Ehepoatna eene Jewanheit, waut du denkjst, waut jun Eheläwen schoden kaun? Wan daut soo es, waut es daut fa eene Jewanheit?

•   Es dise Jewanheit werkjlich soo schlemm ooda deist du die bloos oajren?

•   Haft dise Jewanheit uk eene goode Sied? Waut es daut dan fa eene goode Sied un wuarom jleichst du dee aun dienen Ehepoatna?