Väl Elren loten äare Kjinja nich daut Internet brucken toom Bilda nopploden ooda sikj met aundre unjahoolen, wiels daut kaun jefäadlich sennen. Oba veleicht jäw jie junen Jung ooda Mejal de Frieheit doatoo. Woo kjenn jie aus Elren dan jun Jung ooda Mejal daut lieren, daut dee daut Internet rajcht brucken un schlajchte Foljen utem Stich gonen?

Waut wie en disen Artikjel seenen woaren

•  Waut sull fa junen Jung ooda Mejal wichtich sennen?

•  Waut deit daut aun junen Jung ooda Mejal äare Jefeelen?

•  Woo stalt jun Jung ooda Mejal sikj em Internet opp?

•  Waut junt halpen kaun, met junen Jung ooda Mejal doaräwa to räden?

 Waut jie weeten motten: Daut kaun väl Tiet wajchnämen, wan eena emma aules aunkjikjt, waut aundre em Internet nenndoonen. Junen Jung ooda Mejal fält daut veleicht aun june Help, daut dee sikj kontrollen kjennen, woo väl Tiet dee em Internet sent.

 Waut de Schreft sajcht: “Doaderch sell jie fauststalen lieren, waut daut aulabaste [ooda wichtichste] es” (Filippa 1:10, PB).

 Toom nodenkjen: Es jun Jung ooda Mejal em Internet, enne Städ daut dee wudd sellen schlopen, Schooloabeit doonen ooda met de Famielje toop sennen? Se haben rutjefungen, daut junge Menschen daut aun 9 Stund de Nacht toom schlopen fält. Oba soone, waut miere Stund dän Dach em Internet sent, schlopen veleicht weinja aus 7 Stund de Nacht.

 Waut jie doonen kjennen: Rät met junen Jung ooda Mejal doaräwa, waut werkjlich wichtich es un wuarom daut kluak es, daut eena sikj Jrensen sat, woo väl Tiet eena em Internet es. Daut es goot, Räajlen to moaken, soo aus Kjinja nich loten to Nacht äare Fons ooda Tablets enne Schlopstow haben. Doaderch kjenn jie dee halpen to lieren, sikj selfst to beharschen un daut woat an lota toom gooden sennen (1. Korinta 9:25).

 Waut jie weeten motten: Em Internet seenen junge Menschen foaken aundre äare Bilda (selfies), waut utjebätat sent, ooda Bilda von Frind, wua dee bloos een Scheengonen haben. Dan feelt dee sikj veleicht utjeloten ooda auleen un gaunz rauf.

 Waut de Schreft sajcht: “Siet nich aufjenstich” (1. Petrus 2:1, PB).

 Toom nodenkjen: Feelt jun Jung ooda Mejal sikj schlajcht doaräwa, wan dee sikj vejlikjt, met woo aundre lat opp äare Bilda em Internet? Feelt dee sikj soo, aus wan aule aundre bloos een Scheengonen haben em Läwen, oba dee äa Läwen bloos toom enoolent woaren es?

 Waut jie doonen kjennen: Rät met junen Jung ooda Mejal doaräwa, wuarom daut jefäadlich es, sikj met aundre to vejlikjen. Jeweenlich sent Mejales mea doarom bekjemmat aus Junges, waut äare Frind äwa an denkjen un woo an lat. Jie kjennen junen Jung ooda Mejal tooroden, daut dee bieaun fa een Stootje nich no aundre äare Bilda em Internet kjikjt. Jacob, een junga Maun, sajcht: “Ekj deed miene App, wua ekj aundre äare Bilda em Internet sach, fa eene Stootje utlaschen. Daut haft mie jeholpen, to seenen, waut wichtja es, un woo ekj äwa mie selfst un äwa aundre denkj.”

 Waut jie weeten motten: Wan eena emma wada Bilda em Internet nopploden deit un sikj met aundre unjahoolen deit, dan kaun eene groote Häad Menschen krakjt seenen, waut en dän sien Läwen passieet. Doaderch kjemt daut foaken soo rom, daut eena dän aundren nich emma gaunz vesteit ooda doa Oneenichkjeit oppkjemt.

 Waut de Schreft sajcht: “Woat nich mea betta un fuchtich äwa eenaunda un vezoajcht junt nich. Hieet opp to schrieen un to beleidjen . . . Siet leewa von Hoaten leeftolich eena toom aundren” (Efeesa 4:31-32, PB).

 Toom nodenkjen: Haft jun Jung ooda Mejal aunjefongen, äwa aundre to pludren, sikj met aundre oneenich to sennen un nich leeftolich met aundre to räden? Kjemt daut veleicht doavon, waut dee aules em Internet deit?

 Waut jie doonen kjennen: Lieet junen Jung ooda Mejal, daut dee sikj emma goot oppstalt, mau rajcht em Internet. Daut Buak Digital Kids sajcht: “Daut es Poat von de Elren äare Oppgow, daut dee äare Kjinja daut gaunz dietlich moaken, daut daut emma orrajcht es, to aundre hunjsch to sennen, krakjt endoont, aus daut perseenlich es ooda äwa Internet.”

 Denkjt doaraun, daut nich aule Elren äare Kjinja de Frieheit jäwen, daut dee kjennen Bilda oppem Internet nopp; un soont es uk nich onbedinjt needich. Wan jie junen Jung ooda Mejal de Frieheit doafäa jäwen, dan siet junt äwa dise Sachen secha: Kjennen dee Jrensen saten, soo aus woo väl Tiet dee doa nennspenden? Kjennen dee goode Frind haben em Internet? Un woaren dee sikj nich met waut schlajchtet aufjäwen ooda nopploden?