Opp eene Sauz worden Jugentliche befroacht, aus dee Bilda em Internet nenndoonen un sikj doa met aundre unjahoolen – 97 Prozent von dee säden, daut see deeden. Jankat june Kjinja daut uk? Wan jo, dan es hia eenjet, wua jie äwa nodenkjen sullen.

Waut wie en disen Artikjel seenen woaren

•  Woo woaren june Kjinja äare Tiet brucken?

•  Waut woaren june Kjinja denkjen, waut een Frint es?

•  Waut woat daut aun june Kjinja äare Jefeelen doonen?

•  Waut woaren june Kjinja em Internet aules doonen?

•  Fält daut onbedinjt?

•  Waut aundre Elren sajen

 “Soone Websieden ooda Apps, wua eena Bilda nenndoonen kaun un sikj met aundre unjahoolen kaun, sent uzhent soo jemoakt, daut eena doa nich mea saul von looskomen un dän Tiet äwa em Internet hukt un emma wada nositt, aus daut doa waut nieet jeft”, sajcht de Websied HelpGuide.

 Lynne, waut 20 Joa es, sajcht: “Ekj well doa bloos fa een poa Minuten nennkjikjen, oba onen daut ekj daut enwoa, doo ekj doa stundenlank romschneppren. Daut kaun sea schwoa sennen, daut Fon tochtoloten un waut to doonen, waut mea enhelt.”

 Denkj mol äwa no: Woaren onse Kjinja sikj aun onse Räajlen hoolen, woo lang dee soone Websieden brucken kjennen? Kjennen onse Kjinja sikj aul selfst äare Tiet endeelen un sikj doaraun hoolen?

 Waut de Schreft sajcht: “Siet väasechtich, daut jie derch dit Läwen gonen aus kluake Menschen . . . Un nuzt de Tiet ut” (Efeesa 5:15-16, PB).

 Dise Websieden sent soo jemoakt, daut Menschen denkjen sellen, dee haben een deel Frind. Oba foaken sent dise Frind nich woare Frind.

 Patricia, waut 17 Joa es, sajcht: “Ekj sie enjeworden, daut väl junge Menschen daut wichtich es, daut väle äare Bilda jleichen un äare Frind sennen wellen, wan see dee uk nich mol kjanen. Dee denkjen dan, daut een deel Menschen waut om an romjäwen. Oba daut es nich soo.”

 Denkj mol äwa no: Kaun ons Jung ooda onse Mejal daut bejriepen, daut daut nich sea wichtich es, woo väl Frind dee em Internet haben? Kaun dee butarem Internet uk Frind finjen?

 Waut de Schreft sajcht: “Een Frint woat emma Leew bewiesen, un een Brooda es jebuaren toom em Trubbel biestonen” (Spricha 17:17, PB).

 Forscha haben rutjefungen, daut wan eena too väl Tiet en soone Apps nennspent, dan feelt eena sikj leichta eensom, moakt sikj mea Sorjen un es soogoa leichta truarich.

 Serena, waut 19 es, sajcht: “Daut jeit nich scheen, Bilda to seenen von diene Frind, waut toop waut doonen – onen die.”

 Denkj mol äwa no: Woo woaren onse Kjinja doamet omgonen, wan dee soone Websieden ooda Apps brucken? Woaren dee met eenst aunfangen, bloos noch aun sikj to denkjen, sikj met aundre to mäten ooda woat dee daut baudren, waut aundre doa nenndoonen?

 Waut de Schreft sajcht: “Dan bruck wie nich no Iea un aunseenen sieekjen, wuaderch Aufgonst un Oaja kjemt” (Galata 5:26, PB).

 Opp soone Websieden ooda Apps sent noch aundre Jefoaren. Biejlikj kaun eena leicht to aundre domm sennen, äwa schwienschet räden uk noaktje Bilda wajchschekjen ooda kjrieen (Sexting) ooda sikj schwiensche Bilda ooda Videos beseenen. Wan june Kjinja uk nuscht wellen met soont to doonen haben, kjennen dee oba onverhofs soont bejäajnen.

 Linda, waut 23 Joa es, sajcht: “Ekj sie enjeworden, daut daut opp dise Websieden sea leicht kaun utjieren. Doa es een deel groffe Räd un schlajchte Musikj.”

 Denkj mol äwa no: Woaren onse Kjinja kjennen daut Internet kluak brucken? Woaren onse Kjinja sikj beharschen kjennen un nich wiedakjikjen, wan doa waut orreinet väakjemt?

 Waut de Schreft sajcht: “Lot bie junt nich emol soo väl aus von Huararie, Orreinichkjeit ooda Jiez, de Räd sennen. Jie sellen nich schaundboare un noarenhauftje Räd haben, uk nich Dommheit driewen” (Efeesa 5:3-4, PB).

 Eena kaun goot onen soone Websieden ooda Apps läwen un mau rajcht noch schaftich sennen. Väl Jugentliche doonen soone Apps leewa verheipts nich brucken un eenje, waut dee jebrukt haben, sent sikj eenich jeworden, dee tochtoloten.

 Nathan, waut 17 Joa es, sajcht: “Aus ekj sach, woo miene Sesta daut toosad, dise Websieden to brucken, wort ekj mie eenich, doamet opptohieren. Nu sie ekj schaftja un mie späat sikj daut soo, ekj beläw nu väl mea.”

 Waut wie doavon lieren kjennen: Ea jie june Kjinja Frieheit jäwen, soone Websieden ooda Apps to brucken, wua eena Bilda nenndoonen un sikj met aundre unjahoolen kaun, seet doano, daut dee doamet rajcht omgonen woaren. Doa es met en, daut dee doa nich too väl Tiet nennspenden, daut dee goode Frind haben un daut dee sikj nich met orreinet aufjäwen.

 Waut de Schreft sajcht: “Een vestendja Maun bedenkjt sikj siene Wäaj” (Spricha 14:15, PB).