Denkj mol äwa dän Rot hia no, waut sikj opp de Schreft stett:

1.   Pauss opp, woo du die vehelst. Sie frintlich to diene Poatna oppe Oabeit un acht dee waut; oba sie nich too frintlich, soo daut dee wudden jleewen, daut du doaraun intressieet best, met dee Sex to haben (Matäus 10:16; Kolossa 4:6).

2.   Pauss opp, woo du die auntrakjst. Wan du oppreizende Kjleeda brukst, waut väl Hut wiesen, dan jefst du waut faulschet auntovestonen. De Schreft rot ons too, daut wie ons sellen “aunstendich un schmock kjleeden” (1. Timotäus 2:9, PB).

3.   Pauss opp, met wäm du Frind best. Wan du met soone toop best, waut doaräwa endoontich sent ooda daut mau rajcht jleichen, wan aundre no an schmeichlen ooda an Sex aunbeeden, dan woaren dee daut met die secha uk wellen proowen (Spricha 13:20).

4.   Hab nuscht met schwiensche Räd to doonen. Go leewa von doa wajch, wua met eemol “schaundboare un noarenhauftje Räd” oppkjemt (Efeesa 5:4, PB).

5.   Go Jefoaren utem Stich. Pauss biejlikj sea opp, wan die wäa sajcht, daut du saust no de Oabeitstiet noch lenja bliewen, onen eenen gooden Grunt doafäa (Spricha 22:3).

6.   Räd kloa un dietlich. Wan die wäa doamet baudat, met am ooda ar Sex to haben, dan saj dän daut gaunz kloa, daut du soont nich jleichst (1. Korinta 14:9). Du wurscht biejlikj kjennen sajen: “Du schieescht mie emma aun biem vebiegonen un ekj jleich daut nuscht. Ekj well, daut du doamet opphieescht.” Du wurscht dänjanjen uk kjennen eenen Breef schriewen un dän sajen, waut du krakjt nich jejleicht hautst un waut du wurscht wellen, waut dee wiedahans doonen sull. Moak daut uk dietlich, daut du die no daut rechten west, waut Gott fa rajcht talt un waut du von de Schreft jelieet hast (1. Tessalonicha 4:3-5).

7.   Sieekj no Help. Wan die wäa wieda doamet baudat, met am ooda ar Sex to haben, dan räd met wäm doaräwa, dän du vetrust, biejlikj met eenen Frint, met eenen von de Famielje ooda von diene Oabeit (Spricha 27:9). Väle, waut wäajen soont aul haben must lieden, deeden uk bäden. Wan du daut veleicht nich jewant best to bäden, dan denkj nich, daut et aulmols nuscht halpt. Jehova kaun ons halpen. Doawäajen nant de Schreft am een “Gott, dee onen Enj treesten deit” (2. Korinta 1:3, PB).

 Millionende Menschen woaren oppe Oabeit wäajen soont aus dit jebaudat, oba de Schreft kaun ons halpen.