En eenje Kjoakjen woat Michael uk de “Heilja Michael” jenant un daut späat sikj soo, daut et een Nomen es, waut Jesus haud, ea hee no de Ieed kjeem un uk aus hee wada trigj nom Himmel fua. a Michael deed met dän beesen Fient strieden, nodäm daut Moses jestorwen wia un dee holp uk eenen Enjel, dän Profeet Daniel eene Norecht von Gott to brinjen (Daniel 10:13, 21; Judas 9). De Nomen Michael bediet “Wäa es soo aus Gott?”. Fa am es Gott sea wichtich un doawäajen stritt hee fa Gott sien Rajcht to harschen un kjamft jäajen Gott siene Fiend (Daniel 12:1; Openboarunk 12:7).

 Well wie mol seenen, wuarom wie daut sajen kjennen, daut Jesus de Erzenjel Michael es.

•   Michael es “de Erzenjel” (Judas 9, JHF). Daut Wuat “Erzenjel” bediet de “hechsta Enjel” un daut kjeem en de Bibel aus dee toom ieeschte Mol oppjeschräwen wort bloos twee Mol väa. Un beid Mol rät daut bloos von eenen Erzenjel un nich, daut doa miere sent. Eent von dise Varzhen sajcht, daut de Har Jesus, waut vom Doot oppjestonen es, “woat met befälendem Tooroop, met … de Stemm von eenem Erzenjel … rauf komen vom Himmel” (1. Tessalonicha 4:16, JHF). Jesus haft de “Stemm von eenem Erzenjel” wiels hee de Erzenjel Michael es.

•   Michael es de Väaschta von eene Armee von Enjel. “Michael un siene Enjel kjriejden jäajen dän Droak”, dän Soton (Openboarunk 12:7, PB, von ons dunkel jemoakt). Michael haft väl Macht em Himmel, wiels daut sajcht, hee es “eena von de bowaschte Prinsen” un “de groota Prins” (Daniel 10:13, 21, NW; 12:1, NW). Daut hee soo jenant woat wiest, daut Michael “de Väaschta von de Armeeen von Enjel” es, soo aus David E. Aune daut sajcht, een Jelieeda äwa daut Niee Tastament.

   De Schreft jeft noch eenen aundren Nomen fa dänjanjen, waut Macht haft äwa de Armeeen von Enjel. Dee sajcht, daut “de Har Jesus met siene jewaultje Enjel vom Himmel komen woat en een flaumendet Fia” toom Rach eewen (2. Tessalonicha 1:7-8, PB, von ons dunkel jemoakt; Matäus 16:27). Jesus es “em Himmel nenn jefoaren” un daut sajcht uk, daut doa “Enjel, Autoritäten un Jewaulten am unjadon sent” (1. Petrus 3:21-22, PB). Soo, wudd daut weis sennen, wan Gott twee Väaschte äwa de Armee von Enjel aunjestalt haud? Ooda es daut leichta to jleewen, daut Jesus un Michael bloos twee Nomes sent fa deeselwje Persoon?

•   Michael woat “oppstonen” en eene Tiet von groote “Noot” (Daniel 12:1, JHF). Wan daut en daut Bibelbuak Daniel von “oppstonen” rät, meent daut foaken, daut Kjennichs oppstonen toom waut besondret doonen (Daniel 11:2-4, 21, JHF). Jesus Christus woat “daut Gotteswuat” jenant un hee es de “Kjennich äwa de Kjennichs” un doawäajen woat hee waut besondret doonen: Hee woat Gott siene Fiend aula venichten un Gott sien Volkj beschitzen (Openboarunk 19:11-16, PB). De Schreft sajcht, daut woat to eene Tiet sennen, wua doa “woat een Älent sennen, soo schrakjlich aus daut noch niemols en de Welt jewast es” (Matäus 24:21, 42, PB).