Nä. De Ieed woat kjeenmol venicht ooda vebrent woaren un daut woat uk kjeenen nieen Ieedbaul jäwen. De Schreft lieet, daut Gott de Ieed doatoo muak, daut doa emma sull Läwen bowen sennen.

•   “De jerajchte woaren daut Launt oawen un eewich doabennen bliewen” (Psalm 37:29, PB).

•   “Du sadsd de Ieed opp äaren Grunt, daut dee eewich opp äare Städ blift” (Psalm 104:5, PB).

•   “De Ieed blift emma stonen” (Liera 1:4, PB).

•   “Dee de Ieed häajestalt un jemoakt haft un ar dän Grunt jejäft haft; dee de Ieed nich ladich jeloten haft, oba soo daut dee beläft es” (Jesaja 45:18, PB).

 Gott woat daut nich tooloten, daut de Menschen kjennen de Ieed tweimoaken, derch de Natua veorreinjen, derch Kjrich ooda irjentwaut aundret. Enne Städ daut es Gott doarom todoonen, dee “omtobrinjen, dee de Ieed vedorwen haben” un daut woat dee uk doonen (Openboarunk 11:18, PB). Oba woo woat hee daut doonen?

 Gott woat de menschelje Rejierungen oppriemen, waut de Natua ooda Schepfunk nich beschitzen kunnen. Dan woat sien himlischet Kjennichrikj äwa de Ieed rejieren (Daniel 2:44; Matäus 6:9-10). En dit Rikj woat Gott sien Sän, Jesus Christus, rejieren (Jesaja 9:5-6). Aus Jesus oppe Ieed wia, wees hee, daut hee butajeweenelje Krauft haud äwa de Natua (Markus 4:35-41). Wan Jesus ieescht woat äwa de Ieed rejieren, woat hee de Ieed gaunz kontrollen un uk aules waut doa met en es. Hee woat de gaunze Ieed wada nie moaken, bat dee wada soo es, aus dee aum Aunfank em Goaden Eden wia (Matäus 19:28; Lukas 23:43).

 Nä. Väle jleewen daut, wäajen dee 2. Petrus 3:7 (PB) nich rajcht vestonen. Doa sajcht daut: “Oba de Himmel un de Ieed dee vondoag dän Dach bestonen, woaren wada derch daut selwje Wuat bewoat, om dan derch däm Fia to gonen.” Daut wie disen Varsch rajcht vestonen kjennen, mott wie ons twee wichtje Sachen von disen Varsch unjasieekjen:

1.   En de Schreft bediet “Himmel”, “Ieed” un “Fia” mea aus bloos eenatlei. Biejlikj sajcht daut en Psalm 96:13 (PB): “Hee kjemt de Ieed to rechten.” Hia bediet daut Wuat “Ieed” de Menschen.

2.   Wan eena de Varzhen ver 2. Petrus 3:7 läst, kaun eena bäta vestonen, waut met de Wieed Himmel, Ieed un Fia jemeent sent. De Varzhen 5 bat 6 wiesen, daut daut krakjt soo woat sennen, aus to Noah siene Tiet. Dan vejinkj de Welt aul eemol, oba de Ieedbaul bleef krakjt deeselwja. De Äwaschwamunk deed bloos de grausome Menschen ooda de “Ieed” oppriemen (1. Mose 6:11, PB). De “Himmel” vejinkj dan uk soo to sajen, wäajen dee Menschen dan uk venicht worden, waut äwa de Menschen rejieeden. Wie kjennen seenen, daut bloos de Menschen venicht worden, oba nich de Ieedbaul. Noah un siene Famielje äwaläwden un kunnen wieda opp dise Ieed läwen, aus de Welt to jane Tiet vejinkj (1. Mose 8:15-18).

 Soo aus de Äwaschwamunk een Enj muak met de schlajchte Menschen, soo meent daut “Fia” en 2. Petrus 3:7 uk, daut de schlajchte Menschen woaren oppjeriemt woaren un nich de Ieedbaul. Gott vesprakjt, daut hee “eenen nieen Himmel un eene niee Ieed schaufen woat, wua aules woat jerajcht sennen” (2. Petrus 3:13, PB). Daut doa “eene niee Ieed” sennen woat, bediet, daut doa bloos jerajchte Menschen sennen woaren. Un Gott sien Kjennichrikj woat äwa dise Menschen rejieren un daut es de niea “Himmel”. Bie dise Rejierunk woat de Ieed wada een frädeljet Paradies sennen (Openboarunk 21:1-4).