De Schreft nant Jesus foaken “de Sän von Gott” (Johanes 1:49, PB). De Wieed “Sän von Gott” wiesen, daut Gott de Schepfa es ooda dee, von dän aulet Läwen häakjemt. Doa es uk Jesus sien Läwen met en (Psalm 36:10; Openboarunk 4:11). De Schreft lieet nich, daut Gott een Voda äwa een Kjint wort, soo aus daut bie Menschen es.

 En de Schreft woaren uk de Enjel “Säns Gottes” jenant (Hiob 1:6, JHF). Un de Schreft sajcht, daut de ieeschta Mensch, Adam, een “Sän von Gott” wia (Lukas 3:38, NW). Oba Jesus es een besondra Sän von Gott. Wuarom? Wäajen hee daut ieeschte von Gott erschaufen wort un de eensja es, dän Gott auleen erschaufen haft.

•  Läwd Jesus aul em Himmel, ea hee no de Ieed kjeem?

•  Waut deed Jesus, ea hee no de Ieed kjeem?

 Jo. Jesus wia ea een Jeist em Himmel, ea hee aus Mensch no de Ieed kjeem. Jesus säd selfst, daut hee wia vom Himmel jekomen (Johanes 6:38; 8:23).

 Gott muak Jesus, ea hee irjentwaut aundret jemoakt haud. De Schreft sajcht von Jesus:

•   Hee es “de Ieeschtjebuarna aula Erschaufung” (Kolossa 1:15, JHF).

•   Hee es “de Aunfank de Erschaufung Gottes” (Openboarunk 3:14, JHF).

 Aun Jesus erfeld sikj de Profezeiunk, waut doa sajcht: “Hee es dee, däm sien Aunfank un sien aufstaumen von lang häa jewast es” (Micha 5:1, PB; Matäus 2:4-6).

 Hee haud em Himmel een huaget Aumt. Jesus räd von dit Aumt, aus hee eemol bäd: “Voda, nu veharlich mie . . . met dee Harlichkjeit, dee ekj bie die haud, ea de Welt jeschaufen wort” (Johanes 17:5, PB).

 Hee holp sienen Voda, aulet aundre to moaken. Jesus wia “de Bumeista”, waut met Gott toopschauft (Spricha 8:30, PB). De Schreft sajcht von Jesus: “Derch am muak Gott aules waut em Himmel un oppe Ieed jemoakt worden es” (Kolossa 1:16, PB).

 Derch Jesus muak Gott aulet aundre. Doa wieren uk de aundre Enjel met en un uk de Stiernhimmel un de Ieed (Openboarunk 5:11). Woo Gott un Jesus toopschauften, wudd eena kjennen met eenen Maun vejlikjen, waut buen deit, un dän sienen Helpa. De Maun stalt dän Plon opp un de Helpa sitt doano, daut daut jebut woat.

 Hee wia daut Wuat. De Schreft sajcht, daut Jesus “daut Wuat” wia, ea hee no de Ieed kjeem (Johanes 1:1, PB). Dit wiest, daut Gott Jesus jebrukt haft toom de aundre Enjel waut weeten loten ooda toom dee sajen, waut see doonen sellen.

 Daut schient soo, daut Jesus uk fa Gott to de Menschen oppe Ieed jerät haft. Daut es mäajlich, daut Gott derch daut Wuat, Jesus, räd, aus hee Adam un Eva em Goaden Eden säd, waut see doonen sullen (1. Mose 2:16-17). Jesus es veleicht de Enjel jewast, waut de Israeliten derch de Wiltnis jeleit haft un daut et siene Stemm wia, waut see sullen jehuarsom sennen (2. Mose 23:20-23). a