De Schreft kaun halpen. Gott es om siene Deena, waut krank sent, besorcht. De Schreft sajcht: “De HAR woat am opp sien Krankenbad stoakjen” (Psalm 41:4, PB). Hia es dreeatlei aunjejäft, waut die halpen kaun, wan du eene aunhoolende Krankheit hast:

1.   Bäd om Krauft toom uthoolen. “Gott sien Fräd, dee wiet äwa aules jeit waut Menschen vestonen kjennen”, woat ons halpen, daut wie ons nich too väl Sorjen moaken un daut wie nich oppjäwen (Filippa 4:6-7, PB).

2.   Hab eene goode Enstalunk. De Schreft sajcht: “Een frooet Hoat deit krakjt soo väl goot aus Medizien, oba eenen bedrekjten vedrieejen de Knoakes” (Spricha 17:22, PB). Hab uk mol een bät Spos. Daut kaun die halpen, daut die nich aules soo diesta lat un daut du die bäta feelst.

3.   Stoakj diene Hopninj opp Gott sien Vespräakjen. Faust opp daut to hopen, waut noch komen woat, kaun die halpen, Freid to haben, wan du uk eene aunhoolende Krankheit hast (Reema 12:12). De Schreft sajcht, daut doa eene Tiet komen woat, wua “kjeena von june Menschen woat sajen: ‘Ekj sie nich jesunt’” (Jesaja 33:24, PB). Dan woat Gott aule aunhoolende Krankheiten heelen, waut de vondoagsche Doktarie un Medizien nich kaun. En de Schreft steit biejlikj jeschräwen, daut jieda elra Mensch wada woat junk woaren, wiels dee sajcht: “Mucht hee soo stoakj woaren aus een junga, un Moot un Krauft haben aus verhäa” (Hiob 33:25, PB).

 Wichtich: Wan wie aus Jehova siene Zeijen uk weeten, daut Gott ons unjastett, wan wie krank sent, doo wie oba uk doktren (Markus 2:17). Wie denkjen, daut jieda eena daut selfst entscheiden mott, woo un met waut dee doktren well. Doawäajen woa wie kjeenem eene jewesse Medizien ooda Doktarie tooroden.