De Wieed “daut niee Jerusalem” finj wie twee Mol enne Schreft un daut meent nich opp iernst eene Staut. Daut es de Grupp von Jesus siene Nofolja, waut nom Himmel komen toom doa met am toop en Gott sien Kjennichrikj rejieren (Openboarunk 3:12; 21:2). De Schreft sajcht, daut dise Grupp uk Christus siene Brut jenant woat.

1.   Daut niee Jerusalem es em Himmel. Jiedatsmol, wan de Schreft von daut niee Jerusalem rät, dan sajcht daut uk, daut daut vom Himmel raufkjemt, wua de Enjel de Stautspuaten bewoaken (Openboarunk 3:12; 21:2, 10, 12). Woo weet wie, daut dise Staut nich kaun oppe Ieed sennen? Wäajen dee soo butajeweenlich groot es. Dee woat em veakaunt “12.000 Stadien” jemäten un aule Sieden sent jlikjen lank un breet un huach (Openboarunk 21:16, PB, Footnoot). a Wan eena sikj daut äwatalt, dan wudd de Staut meist 560 Kilomeeta (350 Miel) huach sennen, aulsoo väl hecha aus de läwendje Loft.

2.   Daut niee Jerusalem es eene Grupp von Jesus siene Nofolja – Jesus Christus siene Brut. Daut niee Jerusalem woat “de Brut, daut Laum siene Fru”, jenant (Openboarunk 21:9-10, PB). Daut Laum stalt Jesus Christus väa (Johanes 1:29; Openboarunk 5:12). “Daut Laum siene Fru”, Christus siene Brut, stalt dee Christen väa, waut em Himmel woaren met Jesus toop sennen. No de Schreft no sent Jesus un dise Christen soo aus een Ehemaun un siene Ehefru (2. Korinta 11:2; Efeesa 5:23-25). Un daut sajcht uk noch, daut opp de Gruntsteena von daut niee Jerusalem “daut Laum siene 12 Apostel äare Nomes” noppjeschräwen sent (Openboarunk 21:14, PB). Un de Schreft sajcht uk, daut dee Christen, waut utjewält sent toom nom Himmel komen, “opp de Apostel un Profeeten äaren Grunt jebut” sent (Efeesa 2:20, PB). Dit es uk eene Help toom vestonen, daut daut niee Jerusalem dise Grupp von Christen väastalt.

3.   Daut niee Jerusalem es Poat von eene Rejierunk. Jerusalem wia ieeschtemma de Hauptstaut von Israel, wua de Kjennich David un sien Sän Salomo un dee äare Nokomen “opp däm HARN sienen Troon” sauten un rejieeden (1. Chronik 29:23, PB). Jerusalem wort “de heilje Staut” jenant, wiels Gott doa derch David un siene Nokomen rejieren deed (Nehemia 11:1, PB). Daut niee Jerusalem woat uk “de heilje Staut” jenant, wiels daut deejanje väastalt, waut met Jesus woaren em Himmel vesaumelt woaren toom “(äwa) de Ieed harschen” (Openboarunk 5:9-10, JHF; 21:2).

4.   Daut niee Jerusalem brinjt Säajnungen fa de Menschen oppe Ieed. De Bibelschriewa sach “daut niee Jerusalem, von Gott ut däm Himmel rauf komen”. Daut wiest, daut Gott daut brukt toom oppe Ieed waut doonen (Openboarunk 21:2, PB). Doa see wie, daut daut niee Jerusalem met Gott sien Kjennichrikj to doonen haft. Derch daut Kjennichrikj woat Gott sien Wellen “oppe Ieed jrod soo jedonen woaren aus em Himmel” (Matäus 6:10, PB). Gott sien Wellen fa de Menschen oppe Ieed es biejlikj dit:

   •   De Sind wajchnämen. Ut daut niee Jerusalem kjemt een “Stroom von Läwenswota” rut un dee wessat de Beem, waut “de Velkja to de Jesuntheit” deenen (Openboarunk 22:1-2, PB). De Menschen woaren kjarpalich jesunt woaren un uk em jeisteljen. Doaderch woat de Sind wajchjenomen un de Menschen woaren kjennen volkomnet Läwen kjrieen, soo aus Gott daut aul emma haben wull (Reema 8:21).

   •   De Menschen sellen met Gott goode Frind woaren. Derch de Sind sent de Menschen wiet aufjekomen von Gott (Jesaja 59:2). Oba wan de Sind ieescht woat wajchjenomen sennen, dan woat sikj de Profezeiunk kjennen gaunz erfellen, waut doa sajcht: “Nu es Gott siene Woninj manke Menschen! Un hee woat met an toop wonen, un see woaren sien Volkj sennen, un Gott selfst woat met an sennen” (Openboarunk 21:3, PB).

   •   Daut Lieden un dän Doot wajchnämen. Derch Gott sien Kjennichrikj woat Gott “an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen” (Openboarunk 21:4, PB).