Nä, eena saul nich to Heilje bäden. De Schreft wiest, daut eena bloos saul to Gott bäden un en Jesus sienen Nomen. Jesus säd to siene Jinja: “Doawäajen sell jie soo bäden: Ons Voda em Himmel! Dien Nomen saul heilich jehoolen woaren” (Matäus 6:9, PB). Jesus lieed siene Jinja kjeenmol, daut dee sullen to Heilje bäden ooda to Enjel ooda to irjent sestwäm, buta to Gott.

 Jesus säd uk to siene Nofolja: “Ekj sie de Wajch, de Woarheit un daut Läwen, kjeena kjemt nom Voda buta derch mie” (Johanes 14:6, PB). Gott haft bloos Jesus de Frieheit jejäft, ver am fa ons entostonen (Hebräa 7:25).

Kaun eena nich to Gott bäden un uk to Heilje?

 En een Poat von de Tieen Jebooten säd Gott: “Ekj auleen sie de HAR jun Gott, un met kjeenem aundren toop” (2. Mose 20:5, PB). Waut meent daut, wan daut sajcht, hee es auleen Gott un “met kjeenem aundren toop”? De Footnoot von disen Varsch en de New American Bible sajcht, hee “velangt, bloos am tru to sennen un to deenen”. Gott well aulsoo haben, daut wie bloos am sellen deenen un uk bloos to am sellen bäden (Jesaja 48:11).

 Wie wudden Gott beleidjen, wan wie to irjent sestwäm bäden, biejlikj to Heilje ooda to Enjel. Aus de Apostel Johanes mol wull eenen Enjel aunbäden, säd de Enjel am daut auf. Dee säd: “See doano, daut du daut nich doonen woascht! Ekj sie dien Metkjnajcht, eena von diene Breeda, dee daut Zeichnis von Jesus haben. Bäd Gott aun!” (Openboarunk 19:10, PB).