Du hast wäm kjanen jelieet, waut du jleichst, un nu sent jie junt eenich jeworden, daut jie spazieren wellen, om to seenen, aus daut eene goode Iedee sennen wudd, junt to befrieen. Waut es doa aules met en, wan eena wäm bäta kjanen lieet?

Waut wie en disen Artikjel seenen woaren

•  Doa es met en, opprechtich met dän aundren to räden

•  Doa es met en, daut jie nich en aules stemmen woaren

•  Doa es met en, daut du die äwafoddat feelst

 Du un dien Poatna woaren junt bäta kjanen lieren, wan jie foaken toop sent. Wan du beoobachst, woo de aundra sikj oppstalt, dan woascht du aul Jewesset enwoaren von dän.

 Oba daut jeft uk Sachen, wua jie beid gaunz opprechtich äwa räden motten. Wan jie daut doonen, dan denkj goot äwa daut no, waut de aundra sajcht. Un recht die bie diene Entscheidungen nich no diene Jefeelen, oba doano, woo daut werkjlich es.

 Äwa waut wudd jie biejlikj räden sellen?

•   Äwa Jelt. Es doa eene Schult, waut du motst betolen? Rieekjt die daut Jelt fein ut ooda es die daut emma schwoa doamet? Wan jie junt befrieen wudden, woo wudd jie junt daut met jun Enkomen un Onkosten beräden?

•   Äwa de Jesuntheit. Best du jesunt? Hautst du ea mol jratre Trubbels met de Jesuntheit?

•   Äwa daut, waut jie junt äwajetalt haben. No waut wurscht du en dien Läwen sträwen wellen? Paust daut met daut toop, waut dien Poatna sikj väajenomen haft? Stal die mol väa, jie wieren aul befriet un bie daut, waut du die äwajetalt hautst, wudd irjentwaut mankkomen. Wurscht du doawäajen noch kjennen schaftich sennen?

•   Äwa de Famielje. Motst du nu fa wäm von diene Famielje sorjen? Es doa wäa von diene Famielje, wua du die veleicht lota woascht om kjemren motten? Wurscht du jleichen, Kjinja to haben? Wan jo, woo väl Kjinja?

 Wan du met dienen Poatna von soont aus dit rätst, dan sie en aule Stekjen gaunz opprechtich. Hool nuscht unjare Dakj un mol dän aundren nich eene schmocke Bloom väa, bloos daut dee die saul jleichen (Hebräa 13:18).

 Denkj mol no: Waut motst du äwa dänjanjen weeten, waut du bäta kjanen lieescht? Waut wudd dee sellen äwa die weeten? Wan jie junt befrieen, woo woat junt daut em Ehestaunt togood komen, wan jie nu aul lieren, opprechtich unjarenaunda to räden?

 De Schreft sajcht: “Rät de Woarheit eena toom aundren” (Efeesa 4:25, PB).

 Ariana, waut een Joa befriet es, sajcht: “De Mejal denkjt woomäajlich: ‘Sas Moonat wieda hab wie ons secha aul de Ehe vesproaken.’ Oba de Jung denkjt veleicht, daut et noch een Joa dieren woat. Wan daut soo es, dan kaun de Mejal sikj leicht velazt un onsecha feelen, wiels see aul ea doaropp jeräakjent haft, daut see sikj eenich woaren. Daut es wichtich, daut dee beid weeten, waut de aundra sikj väajenomen haft.”

 Daut jeft nich twee Menschen, waut krakjt äwareen sent. Doawäajen motst du die doaropp reedmoaken, daut du un dien Poatna nich en aule Stekjen stemmen woaren un daut jie uk nich emma äwa aules äwareen denkjen woaren. Woo wie äwa Veschiednet denkjen es biejlikj doano, woo wie oppjewossen sent un von wua wie komen.

 Denkj mol no: Woo es daut, wan wie ons äwa kjlandre Sachen nich eenich sent? Sent wie dan beid reed bietojäwen un Fräd to hoolen, wan daut nich waut es, waut jäajen de Schreft es?

 De Schreft sajcht: “Lot aule Menschen seenen, daut jie nich opp jun Stekj stonen bliewen” (Filippa 4:5).

 Matthew, waut fief Joa befriet es, sajcht: “Veleicht denkjst du, daut jie en aule Stekjen tooppaussen. Oba doa woaren Sachen oppkomen, wua jie nich stemmen woaren. Daut es wichtich, daut jie fein tooppaussen, oba noch wichtja es, woo jie junt oppstalen, wan doa mol waut oppkjemt, wua jie junt nich eenich sent.”

 Daut brukt väl Tiet, met wäm to spazieren, un du wurscht die uk leicht mol kjennen äwafoddat feelen. Waut kaun die dan eene Help sennen?

 Moak goode Plons. Sie nich soo drock met Spazieren, daut diene aundre Frind hinjastalich bliewen ooda waut du sest noch doonen motst. Alana, waut aul fief Joa befriet es, sajcht: “Wan du ieescht befriet best, dan woat die daut aun diene Frind fälen un dee woat daut uk aun die fälen. Lot dee nu nich gaunz toch, bloos wäajen du met wäm spazieren deist.”

 Vejät nich: Wan du befriet best, dan motst du soone Plons moaken, daut du jenuach Tiet un Krauft hast fa aules en dien Läwen. Wudd daut nich fein sennen, die nu aul doarenn to eewen?

 Denkj mol no: Velangst du too väl Tiet ooda Oppmoakjsomkjeit von dienen Poatna? Späat sikj die daut soo, daut dee too väl von die velangt? Woo kjenn jie beid utjejlikjt sennen, daut kjeena sikj äwafoddat ooda äwameed feelt?

 De Schreft sajcht: “Aules haft siene Jeläajenheit; doa es eene Tiet fa jieda Sach oppe Ieed” (Liera 3:1, PB).

 Daniel, waut twee Joa befriet es, sajcht: “Wan een Jung un eene Mejal bloos emma toop Tietvedrief haben, dan kjennen doa leicht Trubbels oppkomen, wan dee ieescht befriet sent. Fa dee, waut sikj kjanen lieren, es daut goot, soone Sachen toop to doonen, waut eena aulmols jieda Dach doonen mott, biejlikj enkjeepen, Hus besorjen ooda aundre Oabeiten doonen un Jehowa toop deenen. Opp dee Wajch lieren dee, fein tooptoschaufen, un daut woat dee em Ehestaunt sea togood komen.”

 Met wäm spazieren deit eena jeweenlich fa eene jewesse Tiet – bat eena sikj ieescht eenich es, aus eena sikj befrieen well ooda leewa opphieren to spazieren. En daut 3. Poat von dise Artikjels woa wie seenen, waut die halpen kaun, dise Entscheidunk to moaken.