•  Aunfangswieed 2

•  Wieetvollet ut Gott sien Wuat 3-5

  •  Eene Räd 3

  •  No wieetvollet sieekjen 4

  •  Bibelläsunk 5

•  Ons wieda em Deenst vebätren 6-14

  •  Eene Vetal aunfangen 7

  •  Goode Wadabesuchs moaken 8

  •  De Menschen to Jinja moaken 9

  •  Onsen Gloowen utlajen 10

  •  Eene Räd 11

  •  Von waut sikj daut haundelt 12

  •  Omstend 13

  •  Videos, Bieekja, Hefta un Bläda brucken 14

•  Ons christeljet Läwen 15-16

  •  Bibelstudium von de Vesaumlunk 16

•  Schlusswieed 17

•  Lowen un Rot jäwen 18

•  Tiet 19

•  Besuch vom Kjreisoppsechta 20

•  Wäakj, wan Kongress es 21

•  Wäakj, wan daut Owentmol es 22

•  Oppsechta von “Ons Toopkomen fa Läwen un Deenst” 23

•  Leida von “Ons Toopkomen fa Läwen un Deenst” 24

•  Rotjäwa fa Rädoppgowen 25

•  Aundre Klaussen 26

•  Videos 27

1. De Aunwiesungen hia sent eene Help fa aul deejanje, waut een Poat haben bie “Ons Toopkomen fa Läwen un Deenst”. Ea dee äa Poat reedmoaken, sellen dee daut derchgonen, waut et en daut Schoolheft fa Läwen un Deenst fa äa Poat sajcht, un uk en de Aunwiesungen hia. Aule Vekjindja sullen oppjemuntat, Schiela-Oppgowen to hoolen. Soone, waut räajelmässich met de Vesaumlunk Jemeenschoft haben, kjennen doa uk metmoaken, wan dee aun de biblische Lieren jleewen un no de christelje Gruntsauzen läwen. Wan doa wäa metmoaken well, waut noch kjeen Vekjindja es, dan woat de Oppsechta von “Ons Toopkomen fa Läwen un Deenst” dän sajen, waut deejanje nokomen motten, waut sikj wellen enschriewen loten. Hee woat dän dan uk sajen, aus dee aul doafäa reed es ooda nich. Wan hee met dän doaräwa rät, dan saul doa uk dänjanjen sien Bibelliera met bie sennen (ooda dän siene Mame ooda Pape, wan dee en de Woarheit es). Toom bie de Schiela-Oppgowen metmoaken mott eena krakjt daut nokomen waut deejanje, dee doa wellen ojjedeepte Vekjindja woaren (od-X Kap. 8 V. 8).

2. (1 Minut) Jieda Wäakj woat de Leida von “Ons Toopkomen fa Läwen un Deenst” no daut Aunfangsleet un Jebäd de Toohiera nieschierich moaken to daut, waut derchjenomen woat. Hee saul besonda soont ruthäwen, wua de Vesaumlunk daut mieeschte von haft.

  3. Eene Räd (10 Minuten): Daut Teema un uk twee ooda dree Hauptpunkta fa de Räd sent en daut Schoolheft fa Läwen un Deenst to finjen. Dise Räd saul von eenen Eltesten jehoolen woaren ooda von eenen Deenstaumthelpa, waut doafäa jeieejent es. Wan en daut Bibelläsen fa dee Wäakj een freschet Bibelbuak aunjefongen woat, dan woat een Video fa daut Buak jewäsen. De Rädna kaun doavon räden, woo daut Video met daut Teema tooppaust, oba hee saul uk doano kjikjen, daut hee noch äwa daut aundre rät, waut en daut Schoolheft fa Läwen un Deenst es. Wan doa Tiet es, saul hee de Bilda brucken, wiels dee doonen daut unjastetten, waut doa derchjenomen woat. Hee kaun uk noch waut Jedanken von aundre Bieekja doa met nennämen, soo lang aus daut halpt, de Hauptpunkta kloara to moaken.

 4. No wieetvollet sieekjen (10 Minuten): Dit Poat sent Froagen un Auntwuaten, waut onen eene Enleidunk un onen eenen Schluss es, un daut woat von eenen Eltesten jehoolen ooda von eenen Deenstaumthelpa, waut doafäa jeieejent es. Beid Froagen sellen jestalt woaren. De Rädna kaun uk entscheiden, aus de Bibelvarzhen, waut doa aunjejäft sent, jeläst woaren ooda nich. Jieda Auntwuat saul nich lenja dieren aus eene haulwe Minut.

 5. Bibelläsunk (4 Minuten): Dise Schiela-Oppgow haft een Maunsmensch. De Schiela saul daut läsen, waut väajeseenen es, onen daut entoleiden ooda aum Enj noch waut to sajen. De Leida von daut Toopkomen es doarom todoonen, daut de Schiela lieren, rajcht un jlei to läsen, daut dee vestonen, waut dee läsen, daut dee de Stemm paussent veendren, oppe rajchte Städ Pausen moaken un soo läsen, aus eena räden wudd. Daut, waut bie dise Schiela-Oppgow väajeläst saul, es nich emma jlikjen väl. Wan de Oppsechta von “Ons Toopkomen fa Läwen un Deenst” wäm dise Oppgow toodeelt, saul hee aun de Schiela äare Fäichkjeiten denkjen.

6. (15 Minuten) Dit Poat von daut Toopkomen es doatoo jedocht, daut aule fa dän Prädichtdeenst eewen kjennen un sikj em prädjen un lieren vebätren un uk doarenn, woo see met de Menschen räden kjennen. Wan daut fält, kjennen uk Eltestasch en dit Poat eene Oppgow kjrieen. Jieda Schiela saul aun daut Poat von daut Läsen-un-lieren-Heft ooda von daut Leew-de-Menschen-Heft schaufen, waut doa en daut Schoolheft fa Läwen un Deenst en Klaumasch bie siene Oppgow aunjejäft es. Eenjemol woat dit Poat uk eene Räd met waut Froagen sennen. Soon Poat saul dan eenen Eltesten toojedeelt ooda eenen Deenstaumthelpa, waut doafäa jeieejent es. (En  Varsch 15 jeit to läsen, woo soone Räden met Froagen derchjefieet sellen.)

 7. Eene Vetal aunfangen: Dise Schiela-Oppgow haft een Maunsmensch ooda een Frumensch. De Poatna saul nich wäa von daut aundre Jeschlajcht sennen, buta daut es wäa von dän siene Famielje. Dise Oppgow kaun eena biem stonen doonen ooda biem setten. (En  Varsch 12 un  13 jeit noch mea notoläsen äwa de Omstend fa dise Oppgow un von waut dee sikj haundelt.)

 8. Goode Wadabesuchs moaken: Dise Schiela-Oppgow haft een Maunsmensch ooda een Frumensch. De Poatna saul nich wäa von daut aundre Jeschlajcht sennen (km-X 5/97 S. 2). De Schiela un dän sien Poatna kjennen daut biem stonen doonen ooda biem setten. De Schiela saul wiesen, waut eena biem Wadabesuch to wäm sajen kaun, met dän eena ea aul jerät haft. (En  Varsch 12 un  13 jeit noch mea notoläsen äwa de Omstend fa dise Oppgow un von waut dee sikj haundelt.)

 9. De Menschen to Jinja moaken: Dise Schiela-Oppgow haft een Maunsmensch ooda een Frumensch. De Poatna saul nich wäa von daut aundre Jeschlajcht sennen (km-X 5/97 S. 2). De Schiela un dän sien Poatna kjennen daut biem stonen doonen ooda biem setten. Bie dise Oppgow saul een Poat von een Bibelstudium jewäsen, waut aul aunjefongen haft. Doawäajen fält doa nich eene Enleidunk ooda eenen Schluss to moaken, buta de Schiela schauft aun eent von dise Poats. Daut es uk nich needich, aule Varzhen väatoläsen, waut doa studieet woaren, buta eena well.

 10. Onsen Gloowen utlajen: Wan daut eene Räd es, dan haft een Maunsmensch dise Oppgow. Wan daut eene Väafierunk es, dan kaun daut een Maunsmensch ooda een Frumensch doonen. De Poatna saul nich wäa von daut aundre Jeschlajcht sennen, buta daut es wäa von dän siene Famielje. De Schiela saul de Froag, waut bie daut Teema es, leeftolich un kloa beauntwuaten un doatoo de Informazion brucken, waut doa bie de Oppgow aunjejäft es. De Schiela kaun selfst entscheiden, aus hee bie siene Oppgow sajen woat, von wua de Informazion es, waut hee bie dise Oppgow brukt.

 11. Eene Räd: Dise Oppgow haft een Maunsmensch. Hee woat eene Räd ver de Vesaumlunk hoolen. Wan de Räd sikj opp dän Aunhank A stett von daut Leew-de-Menschen-Heft, dan saul de Schiela dietlich moaken, woo eena de Varzhen em Deenst brucken kaun. Hee kaun biejlikj utlajen, wanea eena eenen Varsch brucken kaun, waut dee krakjt bediet un woo eena met wäm äwa disen Varsch räden kaun. Wan de Räd sikj opp waut stett, waut en eent von de Kapitels en daut Leew-de-Menschen-Heft es, dan saul de Schiela dietlich moaken, woo eena daut em Deenst nokomen kaun. Doatoo kaun hee daut Biespel ruthäwen, waut en dän 1. Varsch von daut Kapitel es, ooda eent von de aundre Varzhen von daut Kapitel brucken, wan daut paussent es.

   12. Von waut sikj daut haundelt: Daut, waut et en disen Varsch un en dän näakjsten sajcht, es fa de Poats “Eene Vetal aunfangen” un “Goode Wadabesuchs moaken”. Wan doa nuscht aundret aunjejäft es, dan saul de Schiela doaropp schaufen, met sienen Poatna äwa eene eefache biblische Lia to räden, waut dän intressieet, un doano sträwen, daut hee lota wada met dänjanjen räden kaun. De Schiela saul sikj een Teema utläsen, waut dan jroz paussent es un en dee Omjäajent fein schauft. Dee kaun selfst entscheiden, aus dee een Buak, Video ooda sestwaut brucken well von “Ons Jereetschoft fa dän Deenst” ooda nich. De Schiela sellen doa nich eefach utwendich jelieede Enleidungen väabrinjen. Enne Städ daut sellen dee bie dise Poats wiesen, woo eena fein met de Menschen vetalen kaun, un sikj biejlikj fa dee intressieren un eene gaunz jeweenelje Vetal haben.

   13. Omstend: De Schiela saul en dee Omstend prädjen, waut doa aunjejäft sent, un siene Oppgow no siene Omjäajent aunpaussen. Hia een poa Biespels:

1.  (1) Von Hus to Hus prädjen: Doa es met en, von een Hus no daut aundre to gonen, äwa Fon to prädjen ooda derch Breew ooda eenen Wadabesuch to moaken bie wäm, waut eena ea aul em Deenst von Hus to Hus jeprädicht haft.

2.  (2) Opp Jeläajenheit prädjen: Dit es, wan eena met wäm enne Vetal es un dan de Jeläajenheit woanemt, om dänjanjen Zeichnis to jäwen. Eena wudd biejlikj met wäm kjennen von de Schreft räden, waut eena bie de Oabeit, en de School, hinjawäajes, manke Nobasch ooda sestwua bejäajent ooda met dee to doonen haft.

3.  (3) Doa prädjen, wua Menschen hankomen: Doa es biejlikj met en, metem Bieekjakrota to prädjen, bie Jeschafta, oppe Gauss, oppem Park, irjentwua oppem Parkplauz ooda sestwua, wua Menschen sent.

 14. Videos un Lässtoff brucken: Wan daut paussent es, dan kaun de Schiela een Video brucken ooda Lässtoff. Wan bie de Schiela-Oppgow een Video aunjejäft es ooda wan de Schiela eent brucken well, dan saul daut Video enjeleit un derchjegonen woaren, oba daut saul nich väajespält.

15. No een Leet sent en de näakjste 15 Minuten dan eent ooda twee Poats, waut de Toohiera halpen sellen, no Gott sien Wuat to läwen. Wan doa nuscht aunjejäft es, dan kjennen Eltestasch dise Oppgowen haben ooda uk Deenstaumthelpa, waut doafäa jeieejent sent. Daut Poat “Needjet fa de Vesaumlunk” woat emma een Eltesta haben. Wan daut eene Räd met waut Froagen es, dan kaun de Rädna aulawäajen en sien Poat Froagen stalen, nich bloos doa, wua Froagen oppjeschräwen sent. De Enleidunk saul nich too lang sennen, daut doa jenuach Tiet blift, om de wichtje Iedeeen dietlich to moaken, un daut de Toohiera Auntwuaten jäwen kjennen. Wan doa wäm befroacht saul, dan es daut bäta, wan deejanja oppem Plautform noppkjemt enne Städ opp sienen Plauz to bliewen, wan daut mäajlich es.

  16. Bibelstudium von de Vesaumlunk (30 Minuten): Dit Poat woat von eenen Eltesten jeleit, waut doafäa jeieejent es. (Jeft daut bloos weinich Eltestasch, kaun dit Poat uk von eenen Deenstaumthelpa jeleit, waut doafäa jeieejent es.) De Eltestasch woaren toop entscheiden, wäa jeieejent es, daut Bibelstudium von de Vesaumlunk to leiden. Daut sellen soone sennen, waut daut fein leiden kjennen, biejlikj sikj aun de väajeseene Tiet hoolen, secha moaken, daut de wichtichste Bibelvarzhen rutjehowen woaren, un aulem halpen, dän Nutzen von daut to seenen, waut derchjenomen woat, un daut uk werkjlich to schazen. De Aunwiesungen fa Poats, wua daut om Froagen un Auntwuaten jeit, woaren eene groote Help fa deejanje sennen, waut daut Bibelstudium von de Vesaumlunk leiden kjennen (w23.04 S. 24, Hock). Nodäm daut aul daut derchjegonen es, waut fa dise Wäakj väajeseenen es, mott daut Studium nich noch lenja jemoakt. Wan daut sest mäajlich es, sull fa jieda Wäakj een aundra Leida un Läsa enjedeelt. Wan de Leida von “Ons Toopkomen fa Läwen un Deenst” dän Leida von daut Bibelstudium sajcht, daut daut needich es, daut Bibelstudium von de Vesaumlunk kjarta to moaken, dan woat de Leida von daut Bibelstudium entscheiden, woo hee daut deit. Eene Mäajlichkjeit wudd sennen, nich aule Varzhen to läsen.

17. (3 Minuten) De Leida von “Ons Toopkomen fa Läwen un Deenst” woat eenjet von daut Toopkomen wadaholen, waut besonda nizlich es. Hee saul uk een bät äwa daut räden, waut de näakjste Wäakj derchjenomen woat. Wan doa Tiet es, dan kaun hee uk de Nomes von de Schiela sajen, waut de näakjste Wäakj eene Oppgow haben. Un wan doa Bekauntmoakungen ooda Breew fa de Vesaumlunk fälen väatoläsen, dan woat de Leida daut bie dise Schlusswieed doonen, buta doa es noch oppoat eene Aunwiesunk, wanea daut jedonen saul. Aundre Bekauntmoakungen, soo aus fa dän Prädichtdeenst ooda wäa daut reinmoaken dee Wäakj haft, woaren nich von oppem Plautform jejäft, oba woaren aun de Bekauntmoakungstofel aunjehongen. Veleicht rieekjt de Tiet, waut fa de Schlusswieed es, nich ut, om de Bekauntmoakungen ooda de Breew väatoläsen. Dan saul de Leida de Breeda, waut eene Oppgow en “Ons christeljet Läwen” haben, froagen, aus see dee wudden kjennen een bät kjarta moaken. (See  Varsch 16 un  19.) Daut Toopkomen hieet met een Leet un een Jebäd opp.

18. No jieda Schiela-Oppgow haft de Leida von “Ons Toopkomen fa Läwen un Deenst” ojjefäa eene Minut Tiet, om de Schiela to lowen un Rot to jäwen, waut sikj opp daut Poat stett, wua de Schiela aun schaufen saul. De Leida sajcht ver de Oppgow nich, aun waut fa een Poat de Schiela schauft. Wan dee ieescht derch es, dan woat dee dän Schiela fa daut lowen, waut bie de Oppgow goot wia. Dee wudd uk kjennen sajen, aun woon Poat dee jeschauft haft, un wiesen, waut dee bie daut Poat fein jedonen haft, ooda leeftolich utlajen, wuarom dee noch wieda saul doaraun schaufen un woo dee daut doonen kaun. De Leida kaun uk äwa waut aundret von de Oppgow räden, wan hee jleeft, daut dän Schiela ooda de Toohiera daut eene Help es. Wan daut fält, kaun de Leida dän Schiela no daut Toopkomen ooda to eene aundre Tiet noch oppoat paussenden Rot ut daut Leew-de-Menschen-Heft, daut Läsen-un-lieren-Heft ooda daut Predigtdienstschul-Buak jäwen. De Rot kaun fa daut Poat sennen, aun waut dee schaufen deed, ooda fa een aundret. (See uk  Varsch 19,  24 un  25, wua noch mea doaräwa utjelajcht woat, waut de Leida von “Ons Toopkomen fa Läwen un Deenst” un de Rotjäwa fa Rädoppgowen krakjt doonen sellen.)

19. Kjeene Oppgow saul too lang dieren, uk nich daut, waut de Leida von “Ons Toopkomen fa Läwen un Deenst” sajcht. En daut Schoolheft fa Läwen un Deenst sajcht daut, woo lang jieda Oppgow krakjt dieren saul, oba wan doa aules fein erkjläat es, dan es daut nich needich, doa uzhent noch waut bietodoonen, bloos om de Tiet voll to moaken. Wan de Breeda bie eene Oppgow äwa de Tiet gonen, dan saul de Leida von “Ons Toopkomen fa Läwen un Deenst” ooda de Rotjäwa fa Rädoppgowen dee no daut Toopkomen Rot jäwen. (See  Varsch 24 un  25.) Met de Leeda un Jebäda toop saul daut Toopkomen 1 Stund un 45 Minuten dieren.

20. Wan de Kjreisoppsechta no de Vesaumlunk kjemt, dan helt dee eene Deensträd, waut 30 Minuten dieet. Dee es enne Städ daut Bibelstudium von de Vesaumlunk en daut Poat “Ons christeljet Läwen”. Ver de Deensträd woat de Leida von “Ons Toopkomen fa Läwen un Deenst” eenjet von daut Program wadaholen, een bät äwa daut räden, waut de näakjste Wäakj derchjenomen woat, noch waut bekauntmoaken ooda Breew väaläsen, wan daut fält, un dan dän Kjreisoppsechta aunsajen. No de Deensträd woat de Kjreisoppsechta daut Toopkomen met een Leet aufschluten, waut hee utjesocht haft. Fa daut Schlussjebäd wält hee veleicht eenen aundren Brooda ut. En dee Wäakj, wan de Kjreisoppsechta doa es, woaren de aundre Klaussen opp de Sproak von de Vesaumlunk nich aufjehoolen. Oba eene Grupp, waut to de Vesaumlunk jehieet, kaun äare Toopkomes aufhoolen, wan de Kjreisoppsechta de Vesaumlunk besieekjen deit. Wan dee oba de Deensträd helt, dan saul de Grupp doa uk bie sennen. Äwajens woat daut Toopkomen krakjt soo aufjehoolen, aus daut en daut Schoolheft fa Läwen un Deenst sajcht.

21. En de Wäakj, wan de eendachscha ooda dreedoagscha Kongress es, jeft daut kjeen Toopkomen. Dan saul to de Vesaumlunk jesajcht, daut jieda eena daut Program fa dee Wäakj fa sikj auleen ooda met de Famielje toop studieren saul.

22. Wan daut Owentmol tweschen Mondach un Friedach aufjehoolen woat, dan jeft daut dee Wäakj kjeen Toopkomen fa Läwen un Deenst.

23. De Eltestasch woaren utwälen, woon Eltesta de Oppsechta von “Ons Toopkomen fa Läwen un Deenst” sennen saul. Dee es dan doafäa veauntwuatlich, daut daut Toopkomen goot jeplont woat un soo aufjehoolen woat, aus daut en dise Aunwiesungen sajcht. Dee sull fein met dän Rotjäwa fa Rädoppgowen toopschaufen. Soo schwind, aus daut Schoolheft fa Läwen un Deenst rutkjemt, saul de Oppsechta von “Ons Toopkomen fa Läwen un Deenst” aule Oppgowen un Poats fa dee beid Moonat endeelen. Doa sent de Schiela-Oppgowen met en un uk de aundre Poats, waut nich Schiela-Oppgowen sent. Dee woat uk endeelen, wäa jieda Wäakj de Leida von “Ons Toopkomen fa Läwen un Deenst” sennen woat. Doatoo woat hee dee Breeda brucken, waut de Eltestasch toop doatoo utjewält haben. (See  Varsch 3-16 un  24.) Wan hee de Schiela-Oppgowen endeelt, dan woat hee doaräwa nodenkjen, woo oolt de Schiela es, woo väl Erfoarunk dee aul haft un aus daut Teema von de Oppgow fa dänjanjen wudd paussent sennen. Biejlikj soo saul hee daut uk doonen, wan hee de aundre Poats von dit Toopkomen endeelt. Jieda eena, waut een Poat ooda eene Oppgow haft, saul daut oppet weinichste dree Wäakj em verut weeten. Fa de Schiela-Oppgowen saul daut Blaut jebrukt Oppgow en “Ons Toopkomen fa ons christeljet Läwen un Deenst” (S-89). De Oppsechta von “Ons Toopkomen fa Läwen un Deenst” woat doano seenen, daut daut Program fa daut gaunze Toopkomen aun de Bekauntmoakungstofel aunjehongen woat. De Eltestasch kjennen uk noch eenen aundren Eltesten ooda Deenstaumthelpa endeelen, daut dee dän Oppsechta von “Ons Toopkomen fa Läwen un Deenst” halpt. Oba toom soone Poats endeelen, waut nich Schiela-Oppgowen sent, sellen bloos Eltestasch jebrukt.

24. Jieda Wäakj woat een Eltesta de Leida von “Ons Toopkomen fa Läwen un Deenst” sennen. (Wua daut mau weinich Eltestasch jeft, kjennen uk Deenstaumthelpa jebrukt, waut doafäa jeieejent sent.) Siene Oppgow es, de Aunfangswieed un de Schlusswieed reedtomoaken. Dee woat uk jieda Oppgow von daut Toopkomen aunsajen. Doano, woo väl Eltestasch doa sent, kaun dee dan noch aundre Oppgowen von daut Toopkomen haben, besonda wan doa bloos een Video jewäsen saul, wua nich äwa jerät mott. Daut, waut de Leida tweschen jieda Poat sajcht, saul mau kort sennen. De Eltestasch woaren toop entscheiden, woone Eltestasch aus Leida jeieejent sent, un dee woaren dan jeweenlich räajelmässich aus Leida enjedeelt. Doano aus de Omstend sent, wudd de Oppsechta von “Ons Toopkomen fa Läwen un Deenst” kjennen foakna de Leida von daut Toopkomen sennen aus de aundre Eltestasch. Wan een Eltesta daut Bibelstudium von de Vesaumlunk leiden kaun, dan wudd dee veleicht uk kjennen de Leida von daut Toopkomen sennen. Denkjt oba doaraun, daut de Eltesta, waut de Leida es, de Schiela saul leeftoljen un gooden Rot jäwen kjennen, wan daut needich es, un dee uk lowen. De Leida es uk doafäa veauntwuatlich, daut daut Toopkomen enne Tiet to Enj es. (See uk  Varsch 17 un  19.) Wan de Leida daut well un wan doa Rum es oppem Plautform, dan kaun doa biesied een Mikrofoon hanjestalt. Von doa kaun de Leida dan jieda Poat aunsajen un äwadäm kaun de Rädna aul no daut aundre Mikrofoon gonen. De Leida wudd bie de Bibelläsunk un bie daut Poat “Ons wieda em Deenst vebätren” uk kjennen oppem Plautform aun eenen Desch setten. Daut kunn Tiet spoaren.

25. Daut wudd goot sennen, wan daut een Eltesta wia, waut een erfoarna Rädna es. Wan daut fält, saul hee de Eltestasch un Deenstaumthelpa unja vea Uagen Rot fa äare Rädoppgowen jäwen, biejlikj wan dee Oppgowen en “Ons Toopkomen fa Läwen un Deenst” haben, de biblische Räd fa aulemaun hoolen, daut Woaktorm-Studium ooda daut Bibelstudium von de Vesaumlunk leiden ooda doa de Varzhen väaläsen. (See  Varsch 19.) Jeft daut en eene Vesaumlunk miere Eltestasch, waut goode Rädna un Liera sent, dan kaun jieda Joa een aundra Eltesta de Rotjäwa fa Rädoppgowen sennen. Dee brukt oba nich jiedatsmol met de Eltestasch ooda Deenstaumthelpa räden, nodäm daut dee eene Oppgow hauden.

26. Doano, woo väl doa enjeschräwen sent, kjennen de Vesaumlungen noch aundre Klaussen haben fa de Schiela-Oppgowen. Jieda von dise Klaussen saul eenen gooden Rotjäwa haben, wan mäajlich eenen Eltesten. Wan daut needich es, wudd dise Oppgow uk kjennen eenen Deenstaumthelpa jejäft, waut doatoo jeieejent es. De Eltestasch sellen toop entscheiden, wäa daut aula doonen kaun un aus dee daut omzajcht sellen. De Rotjäwa saul siene Oppgow soo nokomen, aus daut en dän  18. Varsch sajcht. Wan daut eene aundre Klauss jeft, sellen de Schiela dan en de aundre Stow nenngonen, wan de Oppgow “No wieetvollet sieekjen” en daut Poat “Wieetvollet ut Gott sien Wuat” ieescht derch es. Un wan de latste Schiela-Oppgow von daut Toopkomen derch es, dan komen dee wada trigj.

27. Fa dit Toopkomen woaren uk eenje Videos jebrukt, waut eena met de JW Library®-App raufloden kaun. Dise App jeft daut fa de mieeschte Sorten Fons, Tablets un Komputasch.

© 2023 Watch Tower Bible and Tract Society of Pennsylvania

S-38-LWX 11/23