De ieeschta Breef aun Timotäus 1:1-20
1 Dis Breef kjemt von Paulus, Christus Jesus* sien Apostel, waut von Gott, onsen Rada, un von Christus Jesus, waut onse Hopninj es, aunjestalt es.
2 Dee es aun Timotä̱us jeschräwen, een woaret Kjint em Gloowen:
Muchst du grootet Metleet* un Metjefeel un Fräd haben von Gott, dän Voda, un von onsen Harn Christus Jesus.
3 Ekj root die don too, en Efeesus to bliewen, jroz ea ekj wull no Mazedo̱nien reisen, un soo doo ekj daut nu uk, daut du eenje doa kaust strenjen Rot jäwen, daut see aundre nich sellen eene aundre Lia lieren
4 un sikj nich sellen met faulsche Jeschichten un Aufstaumungs-Lienjes aufjäwen. Soone Sachen brinjen nuscht Goodet; dee veuasoaken bloos, daut Menschen Sachen räden, wua daut kjeenen Bewies fäa jeft. Soont kjemt nich von Gott un stoakjt nich dän Gloowen.
5 Ekj jäw dise Aunwiesunk*, daut wie sellen Leew haben von een reinet Hoat un een goodet Jewessen un eenen Gloowen onen een Jeheichel.
6 Eenje sent von dise Sachen aufjekomen un doawäajen sent dee en een Räden nennjeroden, waut nuscht enhelt.
7 Dee wellen Lierasch von daut Jesaz sennen, oba dee vestonen nich mol, waut see sajen uk nich daut, wua see soo faust opp stonen bliewen.
8 Na jo, wie weeten, daut daut Jesaz goot es, wan eena sikj rajcht* doaraun helt
9 un wan eena vesteit, daut daut Jesaz nich fa jerajchte Menschen jemoakt es, oba fa soone, waut jesazloos un jäajenaun sent; fa Gottloose un Sinda; fa Ontrue un soone, waut heilje Sachen veachten; fa soone, waut äaren Voda ooda Mutta ooda aundre dootmoaken;
10 fa soone, waut sintelje Sorten Sex* haben; fa Mana, waut met aundre Mana Sex haben*; fa Menschenstäla*; fa Läajna; fa soone, waut äa Vespräakjen nich hoolen*; un fa aulet aundre, waut jäajen de goode* Lia jeit.
11 Dise goode* Lia paust met de harliche, goode Norecht von dän freidjen Gott toop, dee mie es äwajäft worden, dee bekaunttomoaken.
12 Ekj sie Christus Jesus, onsen Harn, dankboa, dee mie Krauft jeef, wäajen hee mie fa tru aunsach, doaderch daut hee mie fa eenen Deenst aunstald,
13 wan ekj ea uk een Lastra un een onveschämda Mensch wia un aundre vefoljen deed. Un doch wort mie Metleet jewäsen, wäajen ekj onweetent haundeld un mie daut aun Gloowen fäld.
14 Oba ons Har wees mie, woo butajeweenlich sea väl grootet Metleet* hee haud un ekj kjrieech Gloowen un Leew von Christus Jesus.
15 Christus Jesus kjeem en dise Welt nenn, om Sinda to raden. Dit, waut ekj saj, es opp to veloten un es daut wieet, daut volstendich auntonämen. Von aul dise Sinda, sie ekj de oajchsta.
16 Oba mie wort Metleet jewäsen, daut Christus Jesus derch mie, dän Oajchsten von aule, siene gaunze Jedult wiesen kunn. Soo muak hee mie to een Biespel fa dee, waut aun Jesus jleewen woaren, om daut eewje Läwen to kjrieen.
17 De Kjennich von de Eewichkjeit, dee nich vegonen kaun un dän wie nich seenen kjennen, de eensja Gott, saul fa emma un eewich jeieet un veharlicht woaren. Amen.
18 Timotä̱us, mien Kjint: Ekj jäw die dise Aunwiesunk*, waut met daut stemt, waut äwa die profezeit wort. Daut woat die halpen, wieda fa waut Goodet to kjamfen
19 un dienen Gloowen un een goodet Jewessen to hoolen. Dit haben eenje aufjewäsen un doaderch es dee äa Gloowen togruntjegonen, soo aus een Schepp, waut unjajeit.
20 Hiemenä̱us un Alexa̱nda talen mank dise, un ekj hab dee dän Soton äwajäft, daut dee derch dise Strof lieren, nich to lastren.
Footnooten
^ Wan daut Wuat “Christus” ver “Jesus” steit, jeit daut dolla opp sien Aumt, waut hee haft.
^ Ooda: “onvedeende Leeftolichkjeit”.
^ Ooda: “dit Jeboot”; “deen die dit aun”.
^ Wuatlich: “jesazlich”.
^ See Wuaterkjläarunk bie “Sintelje Sorten Sex”.
^ Wuatlich: “Mana, waut bie Mana ligjen”.
^ Ooda: “soone, waut Menschen met Jewault metnämen”.
^ Ooda: “waut faulsch schwieren”.
^ Ooda: “nutzboare”. Wuatlich: “jesunde”.
^ Ooda: “nutzboare”. Wuatlich: “jesunde”.
^ Ooda: “onvedeende Leeftolichkjeit”.
^ Ooda: “dit Jeboot”; “deen die dit aun”.
