De ieeschta Breef aun Timotäus 6:1-21
6 Dee, waut unja daut Joch von de Sklowarie sent, sellen äare Wieets met äa gaunzet Hoat achten, soo daut äwa Gott sienen Nomen un äwa de Lia kjeenmol brukt schlajcht jerät woaren.
2 Buta daut sellen deejanje, waut soone Wieets haben, waut em Gloowen sent, nich respakjtloos to dee sennen, wiels daut sent Breeda. Dee sellen leewa äare Wieets noch bäta deenen, wiels äa Deenst kjemt deejanje togood, waut em Gloowen sent un jeleeft woaren.
Hia nich opp, aundre dit to lieren un disen Rot to jäwen.
3 Wan doa irjentwäa met eene aundre Lia oppkjemt, waut nich met de goode* Aunwiesunk tooppaust, waut von onsen Harn Jesus Christus kjemt, un uk nich met de Lia tooppaust, waut wiest, woo wie Gott tru deenen* sellen,
4 dee es voll Stolt un kaun nuscht vestonen. Dee es bloos voll von* Zank un Jejacht äwa Wieed. Dit fieet to Aufgonst, Striet, daut se äwa aundre utholen toom dee eenen schlajchten Nomen moaken*, daut se aundre Schlajchtet tootruen
5 un dän Tiet äwa strieden äwa Kjlienichkjeiten. Daut es, waut soone Menschen veuasoaken, waut een vedreidet Denkjen haben un nich de Woarheit haben. Dee denkjen, daut see derch Gott tru deenen*, waut fa sikj kjrieen kjennen.
6 Un dauts uk soo, wie kjrieen väl doavon, wan wie Gott tru deenen* un met daut tofräd sent, waut wie haben.
7 Wiels wie haben nuscht en dise Welt nennjebrocht un kjennen doa uk nuscht met rutnämen.
8 Soo, wan wie to äten un auntotrakjen* haben, doamet woa wie tofräd sennen.
9 Oba dee, waut sikj daut väajenomen haben, rikj to woaren, faulen en Vesieekjungen un Schlenjen nenn un en väle onkluake Wenschen, waut toom Schoden sent, un waut de Menschen enne Grunt un en de Venichtunk brinjt.
10 Wiels de Leew fa daut Jelt es de Wartel* fa aulahaunt Sachen, waut toom Schoden sent. Wäajen eenje dise Leew nogonen, sent dee vom Gloowen aufjekomen un haben sikj väl Weedoag aunjedonen*.
11 Oba du, Gott sien Deena, ran von dise Sachen wajch. Oba sträw no Jerajchtichkjeit; doano, Gott tru to deenen*; no Gloowen; no Leew; un doano, staunthauft to sennen; un no eene ruje Enstalunk*.
12 Kjamf dän gooden Kaumf fa dän Gloowen. Hool die aun daut eewje Läwen faust, wuafäa du jewält best un wuafäa du een goodet Zeichnis ver een deel Menschen jejäft hast.
13 Ekj jäw die ver Gott, waut aules aum Läwen helt, un ver Christus Jesus, waut ver Ponti̱us Pila̱tus een goodet Zeichnis jeef, dise Aunwiesunk:
14 Komm daut Jeboot, waut die jejäft wort, volstendich un opp soone Wajch no, daut die met nuscht to beschuljen jeit, bat ons Har Jesus Christus openboa jemoakt woat.
15 To de bestemde Tiet woat de freidja un eensja, majchtja Har sikj wiesen. Hee es de Kjennich äwa dee, waut aus Kjennichs rejieren, un de Har äwa dee, waut aus Haren rejieren;
16 de Eensja, waut onstoaflich es, dee en een Licht wont, wua nich hantokomen jeit, dän kjeen Mensch jeseenen haft ooda seenen kaun. Am jehieet de Iea un de eewje Macht. Amen.
17 Jeff dee, waut en dise TIET* rikj sent, de Aunwiesungen*, daut dee nich sellen huachnäsich sennen* un äare Hopninj nich opp daut onsechre Rikjtum saten oba opp Gott, waut ons rikjlich aules jeft, wua wie een Scheengonen bie haben.
18 Saj dee, daut see sellen Goodet doonen, daut see sellen rikj sennen en goode Woakjen, friejäwrich sennen un reed sennen, met aundre to deelen.
19 Soo saumlen dee sikj Wieetvollet, waut een gooda Grunt es fa de Tookunft, soo daut see sikj aun daut werkjelje Läwen kjennen fausthoolen.
20 Timotä̱us, pauss no daut opp, waut die äwajäft es. Drei die von ladjet Räden wajch, waut daut veacht, waut heilich es, un von Iedeeen, waut sikj wadaspräakjen un minkj saul Erkjantnis heeten.
21 Wäajen eenje met soone Erkjantnis jepucht haben, sent dee vom Gloowen aufjekomen.
Muchst du Gott sien grootet Metleet* haben.
Footnooten
^ Ooda: “nutzboare”. Wuatlich: “jesunde”.
^ Ooda: “Gott hanjejäft deenen”.
^ Ooda: “haft eene ojjesunde Freid aun”.
^ Ooda: “daut dee hunjsche Räd haben”.
^ Ooda: “Gott hanjejäft deenen”.
^ Ooda: “Gott hanjejäft deenen”.
^ Ooda woomäajlich: “Veblief”. Wuatlich: “Bedakjunk”.
^ Ooda: “Uasoak”.
^ Wuatlich: “met väl Weedoag derchjespekjt”.
^ Ooda: “Gott hanjejäft to deenen”.
^ See Wuaterkjläarunk bie “Ruje Enstalunk”.
^ See Wuaterkjläarunk bie “Dise TIET”.
^ Ooda: deen dee aun.
^ Ooda: sikj fa hecha talen.
^ Ooda: “siene onvedeende Leeftolichkjeit”.
