De tweeda Breef aun Timotäus 1:1-18
1 Dis Breef kjemt von Paulus, dee derch Gott sienen Wellen Christus Jesus* sien Apostel es, om daut Vespräakjen von daut Läwen bekaunttomoaken, waut dee kjrieen, waut met Christus Jesus vebungen sent.
2 Dee es aun Timotä̱us jeschräwen, een leewet Kjint:
Muchst du grootet Metleet* un Metjefeel un Fräd haben von Gott, dän Voda, un von onsen Harn Christus Jesus.
3 Ekj sie Gott dankboa, fa dän ekj met een reinet Jewessen heiljen Deenst doo, soo aus miene Väavodasch deeden. Ekj denkj emma aun die, wan ekj Gott Dach un Nacht pracha.
4 Wan ekj aun diene Tronen denkj, dan wensch ekj mie sea, die to seenen, daut ekj kunn voll Freid sennen.
5 Mie denkjt daut noch von dienen Gloowen, waut nich jeheichelt es, waut ieescht diene Grootmutta Lo̱is haud un uk diene Mutta Euni̱ke un dän du gaunz secha uk hast.
6 Doawäajen halp ekj die denkjen, de Fäichkjeit von Gott, waut du kjrieechst, aus ekj die de Henj oppläd, soo aus een Fia stoakja to moaken.
7 Wiels Gott sien Jeist moakt ons nich to soone, waut sikj ferchten un sikj nuscht woagen, oba de Jeist jeft ons Krauft un Leew un een kloaret Denkjen.
8 Soo, schäm die nich wäajen daut Zeichnis äwa onsen Harn ooda wäajen mie, wiels ekj om sient haulwen een Faustjenomna sie. Oba nemm daut aun, wan du wäajen de goode Norecht lieden motst, un vetru opp de Krauft von Gott.
9 Hee rad ons un wäld ons, Heilje to sennen. Daut wia nich wäajen onse Woakjen, oba wäajen sien Väanämen un sien grootet Metleet*. Dit wort ons aul lang trigj derch Christus Jesus jejäft.
10 Oba nu es daut gaunz kloa jeworden, doaderch daut ons Rada Christus Jesus openboa jemoakt wort. Hee haft dän Doot tonuscht jemoakt un haft derch de goode Norecht Licht opp daut Läwen schienen loten un uk opp daut Läwen, waut nich vegonen kaun.
11 Fa dise Norecht wort ekj aunjestalt, to prädjen un een Apostel un Liera to sennen.
12 Doawäajen näm ekj aul dit Lieden opp mie, oba ekj schäm mie doawäajen nich. Wiels ekj kjan dän, aun dän ekj jleew, un ekj sie mie secha, daut hee doano oppaussen kaun, waut ekj am äwajäft hab, bat aun janen Dach.
13 Hool die wieda aun de goode* Sort Wieed, waut du von mie jehieet hast, waut derch Gloowen un Leew komen, wäajen eena met Christus Jesus vebungen es.
14 Pauss no dit Wieetvolle opp met de Help von dän heiljen Jeist, dee en ons wont.
15 Du weetst, daut aul dee von de Prowins A̱sien mie veloten haben, uk Fiegelus un Hermo̱genes.
16 Mucht de Har Metleet haben met aul dee, waut to Onesi̱forus sien Hus jehieren, wiels hee haft mie foaken oppjefrescht, un hee haft sikj nich jeschämt, wan ekj uk en Kjäden sie.
17 Em Jäajendeel, aus hee en Room wia, haft hee soo lang no mie jesocht, bat hee mie funk.
18 Mucht de Har Jehowa* am aun janen Dach sien Metleet wiesen. Du weetst krakjt, waut fa Deensten hee en Efeesus aules jedonen haft.
Footnooten
^ Wan daut Wuat “Christus” ver “Jesus” steit, jeit daut dolla opp sien Aumt, waut hee haft.
^ Ooda: “onvedeende Leeftolichkjeit”.
^ Ooda: “siene onvedeende Leeftolichkjeit”.
^ Ooda: “nutzboare”. Wuatlich: “jesunde”.
^ See Wuaterkjläarunk bie “Jehowa”.
