De tweeda Breef aun Timotäus 2:1-26
2 Doawäajen, mien Kjint, stoakj die wieda derch daut groote Metleet*, waut Christus Jesus wiest.
2 Un daut, waut du von mie jehieet hast un wua väle Zeijen von sent, daut äwajäw true Mana, un soo woaren dee emstaund sennen, aundre to lieren.
3 Aus een gooda Soldot von Christus Jesus, sie reed, daut auntonämen, wan du lieden motst.
4 Kjeen Mensch, waut aus Soldot deent, jeft sikj met Schacharieen* auf*, waut et em Läwen jeft, wiels dee well dänjanjen jefaulen, waut am aus Soldot aunjestalt haft.
5 Un mau rajcht een Mensch, waut bie eenen Rees* metmoakt, kjricht nich de Kroon, wan dee sikj nich aun de Räajlen helt.
6 De Foarma, waut schwoa schauft, saul daut ieeschte von de Frucht äten kjennen.
7 Denkj emma aun daut, waut ekj saj; de Har woat die en aules Vestentnis jäwen*.
8 Denkj doaraun, daut Jesus Christus vom Doot oppjewakjt wort, un hee wia David sien Nokomen*. Dits de goode Norecht, waut ekj prädjen doo,
9 fa dee ekj lieden doo un enjestopt sie aus een Vebräakja. Oba Gott sien Wuat es nich faustjekjät.
10 Doawäajen hool ekj wieda aulet Lieden ut wäajen de Utjewälde, soo daut dee uk de Radunk kjrieen, waut derch Christus Jesus kjemt, un uk de eewje Harlichkjeit kjrieen.
11 Dise Wieed sent opp to veloten: Wan wie met am toop jestorwen sent, dan woa wie uk gaunz secha met am toop läwen.
12 Wan wie wieda staunthauft bliewen, dan woa wie uk met am toop aus Kjennichs rejieren. Wan wie daut vestrieden, daut wie am kjanen, dan woat hee daut uk vestrieden, daut hee ons kjant.
13 Wan wie ontru sent, woat hee oba emma Wuat hoolen, wiels hee kaun nuscht aundret sennen, aus waut hee es.
14 Halp dee wieda aun dise Sachen denkjen un jeff dee ver Gott de Aunwiesungen*, sikj nich äwa Wieed to strieden; soont halpt nuscht, wiels daut schot deejanje*, waut doano horchen.
15 Doo dien Bastet, daut Gott met die tofräd es, soo aus een Oabeida, waut sikj wäajen nuscht schämen brukt un aundre daut Wuat von de Woarheit rajcht lieet un utlajcht.
16 Oba wies daut ladje Räden auf, waut daut veacht, waut heilich es, wiels daut woat to emma mea Gottloosichkjeit fieren.
17 Dee äare Wieed woaren sikj soo vebreeden aus eene Krankheit, waut daut Fleesch vefrat*. Hiemenä̱us un File̱tus sent mank dee, waut soone Wieed vebreeden.
18 Dise Mana sent von de Woarheit aufjekomen. Dee sajen, daut daut Oppstonen von de Doodes aul passieet es, un dee brinjen eenje äaren Gloowen enne Grunt.
19 Un doch blift Gott sien fausta Grunt bestonen, waut dit Stampel haft: “Jehowa* kjant dee, waut am jehieren,” un: “Jieda eena, dee dän Nomen Jehowa* aunroopt, saul opphieren, Schlajchtet to doonen.”
20 Soo, en een grootet Hus jeft daut nich bloos goldne un selwane Dinja, oba uk heltane un ieedne Dinja. Eenje woaren fa waut Besondret* jebrukt, oba aundre fa waut Jeweeneljet*.
21 Doawäajen, wan sikj wäa von dise latste Dinja oppoathelt, dee woat een Dinkj sennen, waut fa waut Besondret* jebrukt woat un waut jeheilicht un nizlich fa sienen Wieet es un reed es fa jieda goodet Woakj.
22 Soo, ran wajch von de Wenschen, waut enne Jugentjoaren oppkomen, oba sträw no Jerajchtichkjeit, no Gloowen, no Leew un no Fräd. Doo dit toop met dee, waut sikj opp dän Harn veloten un een reinet Hoat haben.
23 Dan uk noch, wies onkluaket un onnutzboaret Jejacht auf, wiels du weetst, daut et bloos Striedarieen veuasoakt.
24 Een Sklow von dän Harn brukt sikj nich strieden, oba dee mott to aulem leeftolich sennen, emstaund sennen, aundre to lieren, un hee mott sikj kontrollen kjennen, wan am orrajcht behaundelt woat.
25 Hee mott dee, waut jäajenaun sent, met eene ruje Enstalunk* Aunleidunk jäwen. Veleicht lat Gott dee een Leetsennen haben*, daut dee bat doa komen, de Woarheit krakjt to kjanen.
26 Dan komen dee veleicht to Besennunk un kjennen ut dän Beesen Fient siene Schlenj rutkomen, wiels dee haft dee läwendich faust, daut dee sienen Wellen doonen.
Footnooten
^ Ooda: “de onvedeende Leeftolichkjeit”.
^ Ooda woomäajlich: “däachelje Oabeiten”.
^ Wuatlich: “vezaubelt sikj en Schacharieen”.
^ Wuatlich: “Späls”. Doa wieren veschiedne Sportspäls met en.
^ Ooda: “aules halpen to bejriepen”.
^ Wuatlich: “siene Sot”.
^ Ooda: “venicht deejanje”; “brinjt deejanje enne Grunt”.
^ Wuatlich: “een volstendjet Zeichnis”.
^ Dise Krankheit heet Gangrän.
^ See Wuaterkjläarunk bie “Jehowa”.
^ See Wuaterkjläarunk bie “Jehowa”.
^ Ooda: “waut toom ieren”.
^ Ooda: “waut toom nich ieren”.
^ Ooda: “waut toom ieren”.
^ See Wuaterkjläarunk bie “Ruje Enstalunk”.
^ Ooda: “äa Denkjen endren”.
