De tweeda Breef aun Timotäus 3:1-17
3 Oba du saust weeten, daut en de latste Doag schwoare Tieden sennen woaren, met dee meist nich woat foadich to woaren sennen.
2 Wiels de Menschen woaren sikj selfst leewen un daut Jelt leewen; dee woaren puchen; huachnäsich sennen; lastren; äare Elren nich jehorchen; ondankboa sennen; ontru sennen;
3 onen Jefeel fa dän Näakjsten; nich reed sennen, sikj met dän aundren eenich to woaren; äwa aundre utholen toom dee eenen schlajchten Nomen moaken; sikj nich kontrollen kjennen; grausom sennen; daut Goode nich leewen.
4 Dee woaren aundre veroden; ieejenkoppich sennen; voll Stolt sennen un daut Scheengonen leewen enne Städ Gott leewen.
5 Dee woaren väajäwen, daut see Gott deenen, oba nich doano läwen; un von soone hool die wajch.
6 Von mank dise woaren Mana verendach komen, waut sikj hinjalestich en Hiesa nennschlikjen un schwake Frues no sikj locken, waut met Sinden belot sent un sikj von veschiedne Wenschen metrieten loten.
7 Dee lieren emma un sent oba nienich emstaund, de Woarheit krakjt to kjanen.
8 Krakjt soo aus Ja̱nes un Ja̱mbres sikj jäajen Moses stalden, soo stalen dise Mana sikj jäajen de Woarheit. Soone Mana sent en äa Denkjen gaunz vedreit, un Gott es met dee nich tofräd, wäajen dee jäajen dän Gloowen sent.
9 Oba dee woaren nich wiet komen, wiels aule woaren enwoaren, woo onkluak dee sent, soo aus daut bie jane beid Mana wia.
10 Oba du hast die krakjt no daut jerecht, waut ekj lia, woo ekj läw, waut mien Senn em Läwen es, no mienen Gloowen, no miene Jedult, no miene Leew un no mien Staunthauft-Sennen.
11 Du weetst uk om de Vefoljunk un daut Lieden om, waut ekj en Antio̱chia un Iko̱nion un en Liestra derchmust. Ekj hilt aul dise Vefoljunk ut un de Har rad mie von aul dee.
12 Aule, waut aus Christus Jesus siene Nofolja Gott tru deenen* wellen, woaren uk vefolcht woaren.
13 Oba schlajchte un onopprechtje Menschen woaren von schlajcht noch emma schlajchta. Dee veleiden aundre un woaren selfst veleit.
14 Du oba bliew bie daut, waut du jelieet hast un wuaräwa du die secha best, wiels du weetst, von wäm du daut jelieet hast.
15 Un du kjanst de heilje Schreften von Kjintheit aun, waut die weis moaken kjennen, daut du derch dän Gloowen aun Christus Jesus kaust jerat woaren.
16 De gaunze Schreft es von Gott enjejäft un es nizlich toom aundre lieren, toom trajchtwiesen, toom Sachen trajchtstalen un toom ons lieren, daut Rajchte to doonen.
17 Soo kaun een Deena von Gott gaunz utjelieet sennen un volstendich reed sennen fa jieda goodet Woakj.
Footnooten
^ Ooda: “Gott hanjejäft deenen”.