De tweeda Breef aun de Korinta 4:1-18
4 Doawäajen, wiels wie disen Deenst derch Metleet haben, waut ons jewäsen wort, jäw wie nich opp.
2 Enne Städ daut hab wie de schaundhaufte Sachen aufjesajcht, waut em Plietschen jedonen woaren. Wie haundlen uk nich hinjalestich un vedreien Gott sien Wuat nich. Em Jäajendeel, wie dakjen de Woarheit op un wiesen doaderch ver Gott siene Uagen, daut wie daut Rajchte doonen, soo daut jieda Mensch sien Jewessen daut enwoaren kaun.
3 Wan de goode Norecht, waut wie bekauntmoaken, noch met eenen Schleia bedakjt es, dan es daut bie dee, waut oppem Wajch sent no de Venichtunk*.
4 Daut sent dee, waut nich jleewen, un de Gott von dise Welt* haft dee daut Vestaunt blintjemoakt, soo daut daut Licht von de harliche goode Norecht äwa dän Christus, waut krakjt Gott likjent, doa nich derchschienen kaun.
5 Wiels wie prädjen nich äwa ons selfst, oba daut Jesus Christus Har es un daut wie june Sklowen sent om Jesus sient haulwen.
6 Wäajen Gott es deejanja, waut säd: “Daut Licht saul em Diestren schienen.” Un hee haft daut loten derch Christus sien Jesecht opp onse Hoaten noppschienen, daut dee Licht haben von de harliche Erkjantnis äwa Gott.
7 Oba dit Wieetvolle haben wie en ieedne Dinja*, daut et kloa es, daut et nich eene menschelje Krauft es, waut wie haben, un daut dee nich von ons kjemt, oba daut dee von Gott kjemt.
8 Wie woaren opp aule Wäaj sea unjadrekjt, oba dauts nich soo sea, daut wie ons nich mea mowen kjennen. Wie weeten ons nich Rot, oba wie sent nich gaunz aune Enj*.
9 Ons woat vefolcht, oba nich em Stäakj jeloten. Ons woat doljeschloagen, oba nich venicht.
10 Aulawäajen, wua wie sent, mott wie doamet läwen, daut wie en Doodesjefoa sent soo aus Jesus. Aun daut kjennen de Menschen seenen, daut wie krakjt soo lieden, aus Jesus must.
11 Wiels soo lang aus wie aum Läwen sent, es ons Läwen emma en Jefoa, wiels wie Jesus nofoljen. Aun dit kjennen de Menschen seenen, daut ons stoafelja Kjarpa* krakjt soo lieden mott, aus Jesus must.
12 Soo, de Doot schauft en ons, oba en junt schauft daut Läwen.
13 Nu es daut soo, daut wie dänselwjen Gloowen* haben, von dän jeschräwen steit: “Ekj wees Gloowen un doawäajen räd ekj.” Wäajen dit wies wie uk Gloowen un räden.
14 Wie weeten, daut deejanja, waut Jesus vom Doot oppwuak, ons uk woat oppwakjen, krakjt soo aus hee Jesus deed, un hee woat ons met junt toop ver am brinjen.
15 Aul dit es om junt haulwen, daut noch väl mea Menschen Gott sien grootet Metleet* kjrieen, wiels dan väl mea Menschen Gott danken un am doaderch veharlichen.
16 Doawäajen jäw wie nich opp. Wan wie butalich uk vebrukt woaren, woa wie ennalich oba jieda Dach niejemoakt.
17 Wiels wan de schwoare Tieden* uk mau fa een Stootje sent un leicht sent, fieren dee oba doatoo, daut wie Harlichkjeit kjrieen, waut emma jrata woat un fa emma blift.
18 Enne Tweschentiet hool wie onse Uagen nich bie daut, waut to seenen es, oba bie daut, waut nich to seenen es. Wiels daut, waut to seenen es, blift mau fa een Stootje, oba daut, waut nich to seenen es, blift fa emma.
Footnooten
^ Ooda: “waut venicht woaren”.
^ Ooda: “von dise TIET”. See Wuaterkjläarunk bie “Dise TIET”.
^ Ooda: “Krucken von Leem”.
^ Ooda: “nich onen eenen Utwajch”. Ooda woomäajlich: “vetwiewlen nich”.
^ Wuatlich: “ons stoafeljet Fleesch”.
^ Wuatlich: “Gloowesjeist”.
^ Ooda: “siene onvedeende Leeftolichkjeit”.
^ Ooda: “de Proowen”.
