Aun de Hebräa 8:1-13
8 Soo, de Hauptsach, wua wie von räden, es: Wie haben soonen Huagen Priesta aus dit, un hee haft sikj aun de rajchte Sied von dän Hechsten em Himmel sienen Troon doljesat.
2 Hee es een Deena* von de heilje Städ un von daut woare Zelt, waut Jehowa* oppjestalt haft un nich een Mensch.
3 Wiels jieda Huaga Priesta es aunjestalt, Jeschenkja un Opfa to brinjen. Doawäajen wia daut needich, daut dis Huaga Priesta uk waut haud toom opfren.
4 Wan disa oppe Ieed wia, dan wudd dee nich een Priesta sennen, wiels doa sent aul Mana, waut nom Jesaz no de Jeschenkja opfren.
5 De heilja Deenst, waut dise Mana doonen, stalt himlische Sachen väa un es een Schauten fa daut. Dit wort aun daut Jeboot dietlich, waut Gott Moses jeef, aus dee jroz wull daut Zelt moaken. Wiels Gott sajcht: “See doano, daut du aules no daut Moddel no moakst, waut die oppem Boajch jewäsen wort.”
6 Oba Jesus es eenen väl bätren Deenst* oppjejäft worden, wiels hee es uk de Vemedla von eenen Bunt, waut uk bäta es. Dis Bunt wort jesazlich oppjestalt un faustjesat, waut sikj opp bätre Vespräakjungen stett.
7 Wan de ieeschta Bunt wudd sennen onen Fäla jewast, dan wudd een tweeda Bunt nich sennen needich jewast.
8 Wiels hee finjt Fäla aun de Menschen, wan hee sajcht: “‘Kjikjt! De Tiet kjemt,ʼ sajcht Jehowa*, ‘daut ekj met de Menschen von I̱srael un von Ju̱da woa eenen nieen Bunt moaken.
9 Dee woat nich soo sennen aus dee Bunt, waut ekj met dee äare Väavodasch muak aun dän Dach, aus ekj dee äare Haunt neem un dee ut daut Launt Ägi̱pten rutleid. Wäajen dee nich en mienen Bunt bleewen, hieed ekj opp, mie om dee to sorjen,ʼ sajcht Jehowa*.
10 ‘Soo, dit es de Bunt, waut ekj met de Menschen von I̱srael no dee Tiet moaken woa,ʼ sajcht Jehowa*. ‘Ekj woa miene Jesazen en dee äa Vestaunt nenndoonen un en dee äa Hoat nennschriewen. Ekj woa dee äa Gott woaren un dee woaren mien Volkj woaren.
11 Un daut woat nich mea soo sennen, daut eena dän aundren, waut von sien Launt es, ooda sienen Brooda lieren woat un sajen: “Lia Jehowa* kjanen!” Wiels dee woaren mie aula kjanen: vom Kjlansten batem Jratsten.
12 Ekj woa met dee äare ojjerajchte Woakjen metliedent omgonen, un ekj woa nich mea aun dee äare Sinden denkjen.ʼ”
13 Wan hee von “eenen nieen Bunt” rät, dan haft hee dän väajen oolt* jemoakt. Un wan waut oolt un vebrukt jeworden es, dan veschwinjt daut boolt.
Footnooten
^ Ooda: “effentlicha Deena”.
^ See Wuaterkjläarunk bie “Jehowa”.
^ Ooda: “effentlichen Deenst”.
^ See Wuaterkjläarunk bie “Jehowa”.
^ See Wuaterkjläarunk bie “Jehowa”.
^ See Wuaterkjläarunk bie “Jehowa”.
^ See Wuaterkjläarunk bie “Jehowa”.
^ Ooda: “ojjeltich”.
