Jeschräwen von Matäus 19:1-30
19 Aus Jesus äant dit aula jesajcht haud, veleet hee von Galilä̱a. Dan kjeem hee bat de Kaunt aun de aundre Sied Jo̱rdan, bat wua Judä̱a rieekjt.
2 Am kjeemen uk groote Häaden Menschen hinjaraun un hee heeld dee doa.
3 Un doa kjeemen Farisä̱a no am un wullen am aufproowen un fruagen: “Kaun een Maun sikj nom Jesaz no von siene Fru ut irjenteenen Grunt scheeden loten?”
4 Dan säd Jesus to äant: “Hab jie daut nich jeläst, daut deejanja, waut de Menschen aum Aunfank muak, dee aus Maun un Fru muak?
5 Un Gott säd: ‘Wäajen dit woat een Maun sienen Voda un siene Mutta veloten un met siene Fru veeent sennen, un dee beid woaren een Fleesch sennen’.
6 Dee sent dan nich mea twee, oba een Fleesch. Doawäajen, waut Gott vebungen haft*, saul kjeen Mensch uteneenbrinjen.”
7 Dan fruagen dee am: “Wuarom säd Moses dan, daut een Maun ar sull eenen Scheedungsbreef jäwen un dan ar wajchschekjen?”
8 Hee säd dan to dee: “Moses jeef junt de Frieheit, junt von june Frues scheeden to loten, wäajen jun ieejenkopjet*. Oba dauts nich, woo daut aum Aunfank wia.
9 Ekj saj junt: Wäaemma sikj von siene Fru scheeden lat, wan daut nich wäajen sintelje Sorten Sex* es, un sikj met eene aundre befriet, dee brakjt de Ehe*.”
10 De Jinja säden to am: “Wan daut soo steit tweschen eenen Maun un siene Fru, dan es daut nich eene goode Iedee, sikj to befrieen.”
11 Hee säd to dee: “Nich aule kjennen dit nokomen*, oba bloos dee, waut de Gow haben.
12 Eenje sent fälahauft jebuaren, soo aus Utjeschnädne, un doa sent uk soone, waut von Menschen utjeschnäden sent. Un dan sent doa uk soone, waut sikj wäajen daut Kjennichrikj vom Himmel eenich worden, sikj nich to befrieen. Wäa sikj doatoo eenich woaren kaun, dee sull daut doonen.”
13 Dan worden doa nate Kjinja no am jebrocht, daut hee dee sull de Henj opplajen un fa dee bäden, oba de Jinja grunzten to dee wäajen daut.
14 Dan säd Jesus: “Lot de nate Kjinja toch un prooft dee doa nich von auftohoolen, no mie to komen. Wiels daut Kjennichrikj vom Himmel es fa soone, waut soo sent aus dee.”
15 Un dan läd hee äant siene Henj opp un veleet von doa.
16 Dan met eenst kjeem doa wäa no am un fruach: “Liera, waut fa goodet mott ekj doonen toom daut eewje Läwen kjrieen?”
17 Jesus säd to dän: “Wuarom frajchst du mie, waut goot es? Doa es bloos eena, waut goot es. Oba wan du west daut Läwen kjrieen, dan hool emma de Jebooten.”
18 Hee fruach am: “Soo aus woone?” Jesus säd: “Doo nich wäm dootmoaken, doo nich de Ehe bräakjen*, doo nich stälen un doo nich faulsch zeijen.
19 Iea dienen Voda un diene Mutta, un leew dienen Näakjsten krakjt soo sea aus die selfst.”
20 De junga Maun säd to Jesus: “Ekj hab dise Jebooten aula jehoolen. Aun waut fält mie daut dan noch?”
21 Jesus säd to dän: “Wan du west volkomen sennen*, dan go un vekjeep aules, waut du hast, un dan jeff de Oame daut. Dan woascht du em Himmel waut wieetvollet oppbewoat haben, un dan komm un folj mie no.”
22 Aus de junga Maun daut hieed, jinkj dee doa gaunz bedrekjt wajch, wiels hee sea väl haud.
23 Dan säd Jesus to siene Jinja: “Ekj saj junt daut soo, aus et es: Daut woat sea schwoa sennen fa eenen rikjen Mensch, en daut Kjennichrikj vom Himmel nenntokomen.
24 Ekj saj junt daut noch een mol: Dauts fa eenen Kameel leichta, derch een Notel-Uag to gonen, aus fa eenen rikjen Mensch en Gott sien Kjennichrikj nenntokomen.”
25 Aus de Jinja daut hieeden, wieren dee sea vewundat un säden: “Wäa kaun dan noch jerat woaren?”
26 Jesus kjikjt dee jlikj aun un säd: “Fa Menschen es daut ommäajlich, oba fa Gott es aules mäajlich.”
27 Dan säd Petrus to am: “Kjikj! Wie haben aules veloten un sent die nojefolcht. Waut woa wie dan doafäa kjrieen?”
28 Jesus säd to dee: “Ekj saj junt daut soo, aus et es: Wan de Tiet ieescht kjemt, wua aules woat niejemoakt woaren*, dan woat de Menschensän opp sienen harlichen Troon setten, un jie, waut mie nojefolcht sent, woaren opp 12 Troons setten un de 12 Stam I̱srael rechten.
29 Un wäaemma Hiesa ooda Breeda ooda Sestren ooda Voda ooda Mutta ooda Kjinja ooda Flekja om mienen Nomen sient haulwen veloten haft, dee woat 100 mol soo väl kjrieen. Un dan woat dee noch daut eewje Läwen kjrieen*.
30 Oba väle, waut de Ieeschte sent, woaren de Latste sennen un de Latste woaren de Ieeschte sennen.
Footnooten
^ Ooda: “unja een Joch jebrocht haft”.
^ Wuatlich: “wäajen jun hoadet Hoat”.
^ Opp Griechisch: “porne̱ia”. See Wuaterkjläarunk bie “Sintelje Sorten Sex”.
^ Dauts, wan een befrieda Mensch met sestwäm Sex haft.
^ Wuatlich: “Nich aule kjennen Rum moaken fa daut”.
^ Daut es, wan een befrieda Mensch met sestwäm Sex haft.
^ Ooda: “aules krakjt nokomen”.
^ Wuatlich: “En de fresche Erschaufunk”.
^ Wuatlich: “oawen”.
