Jeschräwen von Matäus 25:1-46
25 Daut Kjennichrikj vom Himmel kaun met tieen Mejalen* vejlikjt woaren, waut äare Laumpen nämen un rutgonen toom sikj met dän Briegaum trafen.
2 Fief von dee wieren nich kluak un fief wieren väabedocht*.
3 Wiels dee, waut nich kluak wieren, neemen äare Laumpen met, oba dee neemen nich biesied noch Eelj met.
4 Oba de Väabedochte neemen äare Laumpen un bowenenn noch Eelj met.
5 Wäajen daut met dän Briegaum lenja dieed, aus see dochten, worden see aula schleeprich un schleepen en.
6 Krakjt Medden Nacht hieeden see een Jeschrech, waut doa säd: ‘Hia es de Briegaum! Got rut am entjäajen.’
7 Dan stunden de Mejalen aula opp un muaken äare Laumpen reed.
8 Dan säden dee, waut nich kluak wieren, to de Väabedochte: ‘Jäft ons waut von june Eelj, wäajens onse Laumpen sent batem utgonen.’
9 Dan säden de Väabedochte to dee: ‘Daut kaun sennen, daut et dan nich fa ons aula toorieekjt. Got leewa no dee, waut Eelj vekjeepen, un kjeept junt selfst.’
10 Äwadäm daut dee wieren gonen Eelj kjeepen, kjeem de Briegaum. De Mejalen, waut reed wieren, jinjen met am toop no de Kjast, waut utjereet wia, un de Däa wort toojemoakt.
11 No daut kjeemen de aundre Mejalen uk un säden: ‘Har*, Har, moak ons de Däa op!’
12 Oba hee auntwuad un säd: ‘Ekj saj junt daut soo, aus et es: Ekj kjan junt nich.’
13 Doawäajen, blieft waka, wäajens jie weeten nich dän Dach uk nich de Stund.
14 Wiels dauts krakjt soo aus met eenen Maun, waut doa well wiet wajchreisen un siene Sklowen tooproopt un dee daut äwalat, waut hee haft.
15 Dän eenen jeef hee fief Tale̱nten*, dän aundren jeef hee twee un noch dän aundren eent. Jieda eena kjrieech soo väl, aus hee emstaund wia to doonen, un dan reisd hee wajch.
16 Dee, waut fief jekjräajen haud, jinkj fuaz un dreef doamet Jeschaften un vedeend noch fief mea.
17 Krakjt soo wia daut uk bie dän, waut twee kjrieech: dee vedeend noch twee mea.
18 Oba de Sklow, waut bloos een Tale̱nt jekjräajen haud, jinkj un growd sienen Harn sien Jelt* unja.
19 Lang lota kjeem de Har trigj toom met de Sklowen veräakjnen.
20 Dan kjeem dee, waut fief Tale̱nten jekjräajen haud, un haud noch fief Tale̱nten mea un säd: ‘Har, du äwaleetst mie fief Tale̱nten. Un kjikj, ekj hab noch fief Tale̱nten mea vedeent.’
21 Sien Har säd to am: ‘Fein jedonen, gooda un trua Sklow. Du wieescht äwa weinich Sachen tru; ekj woa die nu äwa een deel Sachen aunstalen. Komm un frei die met dienen Harn met.’
22 Dan kjeem de aundra, waut twee Tale̱nten jekjräajen haud, un säd: ‘Har, du äwaleetst mie twee Tale̱nten. Un kjikj, ekj hab noch twee Tale̱nten mea vedeent.’
23 Sien Har säd to am: ‘Fein jedonen, gooda un trua Sklow. Du wieescht äwa weinich Sachen tru; ekj woa die nu äwa een deel Sachen aunstalen. Komm un frei die met dienen Harn met.’
24 Tolatst kjeem noch dee Sklow, waut een Tale̱nt jekjräajen haud, un säd: ‘Har, ekj wist daut, daut du een sea strenja Mensch wieescht. Du arnst doa, wua du nich jeseit hast, un saumelst doa, wua du nuscht utjestreit hast.
25 Dan wort mie angst, un ekj jinkj un vestuak dien Tale̱nt unja de Ieed. Hia hast du daut, waut dient es.’
26 Doamet säd sien Har to am: ‘Beesa un fula Sklow! Wist du daut aulsoo, daut ekj doa arnten doo, wua ekj nich jeseit hab, un doa saumel, wua ekj nuscht utjestreit hab?
27 Na, dan hautst mien Jelt* sult no de Bank brinjen un dan, wan ekj trigjkjeem, wudd ekj daut weens noch haben met Entras toop trigjjekjräajen.
28 Doawäajen, nämt dän daut Tale̱nt wajch un jäft dän daut, waut de tieen Tale̱nten haft.
29 Wiels wäaemma doa haft, dän woat noch mea jejäft woaren, soo daut dee äwajenuach haft. Oba wäa nuscht haft, dän woat noch mau rajcht daut beskje wajchjenomen woaren, waut hee haft.
30 Un schmiet dän onnutzboaren Sklow rut em diestren nenn. Doa woat dee roaren un sikj oppe Tänen bieten*.’
31 Wan de Menschensän en siene Harlichkjeit komen woat un aul de Enjel met am toop, dan woat hee sikj opp sienen harlichen Troon dolsaten.
32 Dan woaren aule Sorten Menschen* ver am vesaumelt woaren un hee woat de Menschen uteneen deelen, krakjt soo aus een Hoad de Schop von de Kosen deelt.
33 Hee woat de Schop aun siene rajchte Sied stalen un de Kosen aun siene linkje Sied.
34 Dan woat de Kjennich to dee aun siene rajchte Sied sajen: ‘Komt, jie sent von mienen Voda jesäajent; oaft daut Kjennichrikj, waut fa junt reedjemoakt wort von dan aun, aus daut met de Welt aunfunk*.
35 Wiels ekj wort hungrich un jie jeewen mie to äten, ekj wia darschtich un jie jeewen mie waut to drinkjen, ekj wia een Framda un jie neemen mie wellich opp.
36 Ekj haud nuscht auntotrakjen* un jie kjleeden mie, ekj wort krank un jie kjemmaden junt om mie, ekj wia em Jefenkjnis un jie kjeemen mie besieekjen.’
37 Dan woaren de Jerajchte am auntwuaten un sajen: ‘Har, wanea sag wie die hungrich un jeewen die to äten ooda darschtich un jeewen die waut to drinkjen?
38 Wanea sag wie die aus Framden un neemen die wellich opp ooda daut du nich auntotrakjen hautst un kjleeden die?
39 Wanea sag wie die krank un em Jefenkjnis un besochten die?’
40 Dan woat de Kjennich auntwuaten un sajen: ‘Aules, waut jie fa eent von de Kjlanste von miene Breeda jedonen haben, daut hab jie fa mie jedonen.’
41 Dan woat hee to dee aun siene linkje Sied sajen: ‘Jie, waut veuadeelt sent, fuat von hia en daut eewje Fia nenn, waut fa dän beesen Fient un siene Enjel reedjemoakt es.
42 Wiels ekj wort hungrich, oba jie jeewen mie nuscht to äten, ekj wia darschtich, oba jie jeewen mie nuscht to drinkjen.
43 Ekj wia een Framda, oba jie neemen mie nich opp. Ekj haud nich auntotrakjen, oba jie kjleeden mie nich, ekj wia krank un em Jefenkjnis, oba jie kjemmaden junt nich om mie.’
44 Dan woaren dee uk auntwuaten un sajen: ‘Har, wanea sag wie die hungrich ooda darschtich un kjemmaden ons nich om die? Ooda wanea sag wie die aus eenen Framden ooda daut du nich auntotrakjen hautst ooda krank ooda em Jefenkjnis wieescht un haben ons nich om die jekjemmat?’
45 Dan woat hee auntwuaten un to dee sajen: ‘Ekj saj junt daut soo, aus et es: Aules, waut jie nich jedonen haben fa eent von dise Kjlanste, daut hab jie fa mie uk nich jedonen.’
46 Dise woaren opp emma venicht woaren*, oba de Jerajchte woaren fa emma läwen.”
Footnooten
^ Wuatlich: “Junkfrues”. Daut sent Mejalen, waut noch kjeenmol haben Sex jehaut.
^ Ooda: “weis”.
^ Hia woat “Har” jesajcht bloos toom heeflich sennen.
^ Wuatlich: “Selwa”.
^ Wuatlich: “Selwa”.
^ Een Tieekjen von Wutt un Vetwiewlunk.
^ Ooda: “aule Velkja”; “aule Raussen”.
^ Daut schient soo, daut et hia doavon rät, aus A̱dam un E̱va äare Kjinja jebuaren worden.
^ Ooda: “Ekj wia noaktich”. Daut griechische Wuat hia kaun beides bedieden: daut dee gaunz noaktich wia ooda bloos en Unjakjleeda wia, aulsoo weinich jekjleet.
^ Wuatlich: “eewich aufjeschnäden woaren”.
