De Breef aun de Efeesa 3:1-21
3 Soo, ekj, Paulus, sie een Faustjenomna, wäajen ekj Christus Jesus jehia un wäajen ekj junt jeholpen hab, dee jie von de aundre Sorten Menschen* sent …*
2 Secha sent jie daut aul enjeworden, daut ekj de Veauntwuatunk jekjräajen hab, junt to halpen, Gott sien grootet Metleet* to kjrieen,
3 un daut mie daut heilje Jeheemnis* wort derch eene Openboarunk weeten jeloten, krakjt soo aus ekj junt verhäa aul hab een bät jeschräwen.
4 Wan jie dit läsen, dan woa jie enwoaren kjennen, waut ekj von dän Christus sien heiljet Jeheemnis* vestonen kaun.
5 En aundre Jennerazionen* wort de Menschen dit Jeheemnis* nich weeten jeloten, soo aus de heilje Apostel un Profeeten daut nu derch dän Jeist openboat wort.
6 Un daut es, daut de aundre Sorten Menschen* sullen derch de goode Norecht Poat haben aun daut Oafgoot un uk Poat* sennen von dänselwjen Kjarpa un met ons toop Poat haben aun daut Vespräakjen, wäajen daut Christus Jesus siene Nofolja sent.
7 Ekj wort een Deena von dit heilje Jeheemnis* wäajen Gott sien grootet Metleet*, waut mie aus een Jeschenkj jejäft wort derch siene Krauft, waut en mie wirkjen deed.
8 Ekj, waut läaja sie aus de Läachsta von aule Heilje, hab dit groote Metleet* jekjräajen, soo daut ekj de aundre Sorten Menschen* sull de goode Norecht bekauntmoaken äwa dän Christus sien onbejrieplich grootet Rikjtum.
9 Un ekj sull jieda eenem daut wiesen, woo met daut heilje Jeheemnis* omjegonen woat, waut Gott* aul sea lang trigj vestoaken haud, dee aules jemoakt haft.
10 Dit passieed, daut de Rejierungen un Machten en de himlische Städen nu derch de Vesaumlunk kjennen Gott siene Weisheit kjanen, waut opp väl veschiedne Wäaj jewäsen woat.
11 Dit paust met daut eewje Väanämen toop, waut hee em Senn haft uttofieren, un daut es met Christus vebungen, waut ons Har Jesus es.
12 Derch am kjenn wie frie räden un frie un met Vetruen no Gott komen, wiels wie Gloowen aun Christus haben.
13 Doawäajen well ekj, daut jie nich sellen mootloos woaren, wäajen ekj fa junt Schwoaret derchgo, wiels daut brinjt junt Harlichkjeit.
14 Dits de Uasoak, wuarom ekj miene Kjneeen ver dän Voda bieejen doo,
15 von dän jieda Famielje em Himmel un oppe Ieed kjemt*.
16 Ekj bäd doarom, daut hee dän Mensch, waut jie ennalich sent, derch siene groote Harlichkjeit stoakjen mucht met de Krauft derch sienen Jeist
17 un daut de Christus derch junen Gloowen en june Hoaten wonen mucht toop met de Leew, waut mank junt saul sennen. Mucht jie enjewartelt sennen un faust opp daut Ferment stonen,
18 soo daut jie met aule Heilje toop volstendich emstaund sent, daut Breede, Lange, Huage un Deepe gaunz un goa to bejriepen,
19 un daut jie Christus siene Leew kjanen, waut wieda jeit, aus waut Menschen weeten, soo daut jie kjennen gaunz jefelt sennen met daut, waut Gott jeft.
20 Soo, deejanja, waut derch siene Krauft, waut en ons wirkjt, grulich sea väl mea doonen kaun, aus wua wie no froagen ooda waut wie foten kjennen,
21 dee saul derch de Vesaumlunk un derch Christus Jesus en aule Jennerazionen* fa emma un eewich veharlicht woaren. Amen.
Footnooten
^ Ooda: “de Velkja”; “aundre Raussen”.
^ Daut schient soo, de Jedanken gonen em Varsch 14 wieda.
^ Ooda: “siene onvedeende Leeftolichkjeit”.
^ See Wuaterkjläarunk bie “Heiljet Jeheemnis”.
^ See Wuaterkjläarunk bie “Heiljet Jeheemnis”.
^ Met daut Wuat “Jennerazion” sent jeweenlich Menschen von een veschiednet Ella jemeent, waut fa een jewesset Stoot en deeselwje Tiet läwen.
^ See Wuaterkjläarunk bie “Heiljet Jeheemnis”.
^ Ooda: “Jläda”.
^ Ooda: “de Velkja”; “aundre Raussen”.
^ See Wuaterkjläarunk bie “Heiljet Jeheemnis”.
^ Ooda: “siene onvedeende Leeftolichkjeit”.
^ Ooda: “dise onvedeende Leeftolichkjeit”.
^ Ooda: “de Velkja”; “aundre Raussen”.
^ See Wuaterkjläarunk bie “Heiljet Jeheemnis”.
^ Wuatlich: “en Gott”.
^ Wuatlich: “äaren Nomen haft”.
^ Met daut Wuat “Jennerazion” sent jeweenlich Menschen von een veschiednet Ella jemeent, waut fa een jewesset Stoot en deeselwje Tiet läwen.
