De Breef aun de Efeesa 5:1-33
5 Doawäajen, doot Gott no soo aus leewe Kjinja,
2 un wiest wieda Leew, krakjt soo aus de Christus ons* jeleeft haft un sikj selfst aus een Opfa fa ons* hanjeef aus een seetet Jeroch fa Gott.
3 Von sintelje Sorten Sex* un von aule Sorten Orreinet ooda Bejia saul mank junt nich mol de Räd sennen, wiels daut jehieet sikj nich fa heilje Menschen.
4 Doa saul uk nich schaundhauftet Benämen sennen, nich domme Räd, nich schwienschet Spos; soont jehieet sikj nich. Enne Städ daut bedankt junt bie Gott.
5 Jie weeten un kjennen sea goot vestonen, daut en daut Kjennichrikj von Christus un von Gott soon Mensch nuscht oawen woat, waut sintelje Sorten Sex* haft ooda soona, waut Orreinet deit ooda bejierich es; Bejia es eene Sort Aufjettarie.
6 Lot daut nich too, daut junt wäa met ladje Wieed aunschmäaren kaun, wiels wäajen krakjt soont kjemt Gott siene Wutt äwa de ojjehuarsome Menschen.
7 Doawäajen, siet nich dee äare Poatna;
8 jie wieren je mol soo aus daut Diestre, oba nu sent jie soo aus daut Licht, wiels jie met dän Harn veeent sent. Läft wieda soo aus Kjinja von daut Licht,
9 wiels en daut Licht to läwen, bediet, en aule Stekjen leeftolich to sennen, jerajcht to sennen un no de Woarheit to läwen.
10 Doot junt daut wieda vesechren, waut dän Harn jefelt;
11 un hieet opp, bie de onnutzboare Woakjen mettomoaken, waut to daut Diestre jehieren; enne Städ daut dakjt daut op, waut daut fa Woakjen sent.
12 Wiels daut es mau rajcht toom schämen, doavon to räden, waut dee em Plietschen doonen.
13 Oba aules, waut opjedakjt woat*, woat derch daut Licht openboat. Wiels aules, waut es openboa jemoakt, es Licht.
14 Doawäajen woat doa jesajcht: “Wakj opp, du, dee du schlapst, un sto vom Doot opp. Dan woat Christus die beschienen.”
15 Doawäajen paust sea opp, daut jie junt nich soo oppstalen* aus de Onkluake, oba soo aus de weise Menschen,
16 un brukt june Tiet opp de baste Wajch*, wiels wie läwen en schlajchte Tieden.
17 Doawäajen hieet opp, soone to sennen, waut Sachen nich goot bedenkjen, oba prooft, wieda doahinja to komen, waut Jehowa* sien Wellen es.
18 Bedrinkjt junt uk nich met Wien, wiels daut fieet bloos doatoo, daut jie junt nich kontrollen kjennen; enne Städ daut lot junt wieda met dän Jeist fellen.
19 Sinjt toop Psalmen; sinjt toom Gott preisen; sinjt jeistelje Leeda; sinjt fa Jehowa*, soo aus wudd jie en june Hoaten Spell moaken.
20 Un bedankt junt emma fa aules bie onsen Gott un Voda derch onsen Harn Jesus Christus sienen Nomen.
21 Siet eena dän aundren unjadon ut grooten Respakjt fa Christus.
22 De Ehefrues sellen äare Ehemana unjadon sennen, soo aus see dän Harn sent;
23 wiels een Ehemaun es daut Haupt* von siene Ehefru, krakjt soo aus de Christus daut Haupt* von de Vesaumlunk es, waut sien Kjarpa es un fa dee hee een Rada es.
24 Jo, krakjt soo aus de Vesaumlunk dän Christus unjadon es, soo sellen de Ehefrues uk äare Ehemana en aule Stekjen unjadon sennen.
25 Ehemana, leeft wieda june Ehefrues, krakjt soo aus de Christus de Vesaumlunk leewd un sikj selfst fa dee hanjeef.
26 Hee deed daut toom dee heiljen un toom dee met Gott sien Wuat reinjen, soo aus wudd hee dee met Wota boden.
27 Hee well de Vesaumlunk fa sikj schmock moaken, daut aun dee kjeene Plaken un Folden ooda soowaut es, oba daut dee heilich un onen Fäla es.
28 De Ehemana sellen daut krakjt soo doonen: Dee sellen äare Ehefrues krakjt soo leewen, aus äaren ieejnen Kjarpa. Een Ehemaun, waut siene Ehefru leeft, dee leeft sikj selfst.
29 Wiels kjeen Mensch haft sienen ieejnen Kjarpa* jeemols jehaust, enne Städ daut jeft dee dän to äten un kjemmat sikj leeftolich om dän, krakjt soo aus de Christus daut met de Vesaumlunk deit,
30 wiels wie sent Poats* von sienen Kjarpa.
31 “Wäajen dit woat een Maun sienen Voda un siene Mutta veloten un met siene Fru veeent sennen, un dee beid woaren een Fleesch sennen.”
32 Dit heilje Jeheemnis* es groot. Nu räd ekj von Christus un de Vesaumlunk.
33 Aulmols saul jieda eena von junt siene Ehefru krakjt soo sea leewen aus sikj selfst. Vonne aundre Sied saul de Ehefru grooten Respakjt haben fa äaren Ehemaun.
Footnooten
^ Ooda woomäajlich: “junt”.
^ Ooda woomäajlich: “junt”.
^ Opp Griechisch: “porne̱ia”. See Wuaterkjläarunk bie “Sintelje Sorten Sex”.
^ See Wuaterkjläarunk bie “Sintelje Sorten Sex”.
^ Ooda: “trajchtjestalt woat”.
^ Wuatlich: “soo gonen”.
^ Wuatlich: “kjeept junt de bestemde Tiet”.
^ See Wuaterkjläarunk bie “Jehowa”.
^ See Wuaterkjläarunk bie “Jehowa”.
^ Ooda: “de Kopp”.
^ Ooda: “de Kopp”.
^ Wuatlich: “sien ieejnet Fleesch”.
^ Ooda: “Jläda”.
^ See Wuaterkjläarunk bie “Heiljet Jeheemnis”.
