Aun Filemon 1:1-25
1 Dis Breef kjemt von Paulus, waut om Christus Jesus* sient haulwen faustjenomen es, un von onsen Brooda Timotä̱us, un dee es aun Fi̱lemon jeschräwen, onsen leewen Metoabeida,
2 un aun onse Sesta Afi̱a un aun Archi̱ppus, waut soo aus een Soldot met ons toopschauft, un aun de Vesaumlunk, waut en dien Hus es:
3 Wie wenschen junt Fräd un grootet Metleet* von Gott, onsen Voda, un von dän Harn Jesus Christus.
4 Wan ekj en miene Jebäda von die räd, dank ekj mienen Gott emma,
5 wäajen ekj emma wada von dienen Gloowen hia un von de Leew, waut du fa dän Harn Jesus hast un fa aul de Heilje*.
6 Ekj bäd doarom, daut de Gloowen, dän wie uk haben, die bat doa brinjen mucht, aul daut Goode kloa to haben, waut wie derch Christus haben.
7 Mie haft daut väl Freid un Troost jejäft, von diene Leew to hieren, wiels derch die, mien Brooda, sent de Heilje* ennalich jestoakjt worden.
8 Doawäajen, wan ekj uk wudd daut volle Rajcht haben, derch Christus von die to velangen, daut Rajchte to doonen,
9 well ekj die oba leewa doano froagen, daut du daut ut Leew deist. Ekj, Paulus, sie je een elra Maun, dee nu uk om Christus Jesus sient haulwen faustjenomen es.
10 Ekj froag die om One̱simus sient haulwen, dee fa mie soo aus mien Sän jeworden es un ekj fa am soo aus een Voda en dee Tiet, wua ekj enjestopt* sie.
11 Ea wia hee een Onnutzboara fa die, oba nu es hee nutzboa fa die un uk fa mie.
12 Ekj schekj One̱simus trigj no die, dän ekj sea väl räakjen.
13 Ekj wudd am jleichen hia bie mie to hoolen, daut hee mie en diene Städ uthalpen kunn en dee Tiet, wua ekj wäajen de goode Norecht enjestopt sie.
14 Oba ekj well nuscht doonen, wua du nich met envestonen best, soo daut du daut Goode, waut du deist, wellich doonen kaust un nich bemott.
15 Dauts soo, daut One̱simus sikj fa een Stootje* von die fuatbrocht, oba veleicht es daut krakjt doawäajen, daut du am fa emma kaust trigjhaben.
16 Nu kjrichst du am nich bloos trigj aus eenen Sklow, oba mea aus daut; aus eenen leewen Brooda. Ekj räakjen am aul soo väl un woo väl mea noch du, wäajen du am wada trigjhast un hee es uk dien Gloowesbrooda*.
17 Soo, wan du mie fa eenen Frint talst, dan nemm am leeftolich opp, krakjt soo aus du mie wurscht.
18 Un wan hee die irjentwaut jedonen haft ooda hee die waut schuldich es, dan fodda mie daut auf.
19 Ekj, Paulus, schriew dit met miene ieejne Haunt: Ekj woa die daut trigjtolen; onen doavon to räden, daut du mie mau rajcht dien Läwen schuldich best.
20 Jo, mien Brooda, mucht ekj dise Help von die kjrieen, wäajen wie beid dän Harn siene Nofolja sent. Stoakj mien Hoat aus Christus sien Nofolja.
21 Ekj sie mie secha, daut du daut doonen woascht. Ekj schriew die, wiels ekj weet, daut du mau rajcht noch mea doonen woascht, aus waut ekj saj.
22 Buta dit moak uk eene Städ reed fa mie, wua ekj bliewen kaun, wiels ekj hop, daut ekj wada woa kjennen no junt komen*, wäajen jie doarom bäden.
23 E̱pafras, waut met mie toop om Christus Jesus sient haulwen enjestopt es, bestalt die to jreessen.
24 Ma̱rkus, Arista̱rchus, De̱mas un Lu̱kas, miene Metoabeida, bestalen die uk to jreessen.
25 Mucht dän Harn Jesus Christus sien grootet Metleet* met die sennen, wäajen du soone goode Enstalunk hast.
Footnooten
^ Wan daut Wuat “Christus” ver “Jesus” steit, jeit daut dolla opp sien Aumt, waut hee haft.
^ Ooda: “onvedeende Leeftolichkjeit”.
^ Ooda: “de Utjewälde”.
^ Ooda: “de Utjewälde”.
^ Wuatlich: “en Kjäden”.
^ Wuatlich: “eene Stund”.
^ Wuatlich: “wäajen du am em Fleesch un em Harn trigjhast”.
^ Ooda: “woa friejemoakt woaren fa junt”.
^ Ooda: “siene onvedeende Leeftolichkjeit”.
