Jeschräwen von Johanes 14:1-31
14 “Moakt junt daut nich schwoa em Hoat. Wiest, daut jie Gloowen aun Gott haben, un wiest uk, daut jie Gloowen aun mie haben.
2 En mienen Voda sien Hus sent väl Woninjen, un wan daut nich soo wia, dan wudd ekj junt dit nich jesajcht haben. Oba ekj go nu mienen Wajch, om eene Städ fa junt reedtomoaken.
3 Dan uk noch, wan ekj mienen Wajch go un eene Städ reedmoak fa junt, dan woa ekj trigjkomen un junt no mie holen, soo daut jie doa sent, wua ekj sie.
4 Un jie kjanen dän Wajch doahan, wua ekj hango.”
5 To̱mas säd to Jesus: “Har, wie weeten nich, wua du hanjeist. Woo sell wie dän Wajch kjanen?”
6 Jesus säd to To̱mas: “Ekj sie de Wajch un de Woarheit un daut Läwen. Kjeena kaun no dän Voda komen, buta dee deit daut derch mie.
7 Wan jie mie kjanen, dan woa jie uk dän Voda kjanen. Von nu aun kjan jie dän un haben dän jeseenen.”
8 Fili̱ppus säd to am: “Har, wies ons dän Voda un dan woa wie tofräd sennen.”
9 Jesus säd to am: “Fili̱ppus, ekj sie aul soo lang met junt toop jewast un du kjanst mie noch emma nich? Wäa mie jeseenen haft, dee haft uk dän Voda jeseenen. Wuahäa sajchst du dan: ‘Wies ons dän Voda’?
10 Jleefst du daut nich, daut ekj veeent sie met dän Voda un daut de Voda met mie veeent es? Waut ekj junt saj, daut saj ekj nich ut mie selfst, oba de Voda, dee met mie veeent blift, fieet sien Woakj derch.
11 Jleeft mie, daut ekj met dän Voda veeent sie un daut de Voda met mie veeent es. Wan nich, dan jleeft daut wäajen de Woakjen.
12 Ekj saj junt daut krakjt soo, aus et es: Wäa wiest, daut dee Gloowen aun mie haft, dee woat uk de Woakjen doonen, waut ekj doo. Un dee woat noch jratre Woakjen doonen, wiels ekj go mienen Wajch nom Voda.
13 Un no wautemma jie en mienen Nomen froagen, daut woa ekj doonen, soo daut de Voda derch dän Sän kaun veharlicht woaren.
14 No waut jie en mienen Nomen froagen, daut woa ekj doonen.
15 Wan jie mie leewen, dan woa jie miene Jebooten hoolen.
16 Un ekj woa dän Voda froagen un dee woat junt eenen aundren Helpa* jäwen, daut dee emma bie junt es.
17 Dauts de Jeist von de Woarheit, dän de Menschen enne Welt nich kjrieen kjennen, wiels dee kjennen dän nich seenen un dee kjanen dän uk nich. Jie kjanen dän, wiels dee blift bie junt un es en junt.
18 Ekj woa junt nich auleen* loten; ekj woa trigj no junt komen.
19 Een Stootje wieda woaren de Menschen enne Welt mie nich mea seenen, oba jie woaren mie seenen, wiels ekj läw un jie woaren läwen.
20 Aun dän Dach woa jie weeten, daut ekj met mienen Voda veeent sie un daut jie met mie veeent sent un daut ekj met junt veeent sie.
21 Wäa miene Jebooten haft un dee helt, dee leeft mie, un wäa mie leeft, dän woat mien Voda leewen. Ekj woa dänjanjen leewen un mie dän gaunz kloa openboaren.”
22 Ju̱das, nich de Iska̱riot, säd to Jesus: “Har, woo kjemt daut, daut du die ons west gaunz kloa openboaren, oba nich de Menschen enne Welt?”
23 Dan säd Jesus to Ju̱das: “Wan mie wäa leeft, dan woat dee sikj doaraun hoolen, waut ekj saj, un mien Voda woat dän leewen un wie beid woaren komen un bie dän wonen*.
24 Wäa mie nich leeft, dee helt sikj uk nich doaraun, waut ekj saj. De Wieed, waut jie hieren, sent nich miene, oba dee sent vom Voda, dee mie jeschekjt haft.
25 Ekj saj junt dit, soo lang aus ekj noch bie junt sie.
26 Oba de Helpa, de heilja Jeist, dän de Voda en mienen Nomen schekjen woat, dee woat junt aules lieren un junt aun aul daut denkjen halpen, waut ekj to junt jesajcht hab.
27 Ekj hinjalot junt Fräd; jo, ekj jäw junt mienen Fräd. Ekj jäw junt dän nich soo, aus de Menschen enne Welt dän jäwen. Lot junt daut nich em Hoat schwoa woaren un lot daut nich too, daut junt ut Angst de Moot veschort.
28 Jie haben jehieet, daut ekj to junt säd: ‘Ekj velot un ekj kom trigj no junt.’ Wan jie mie leewen, dan woa jie junt freien, daut ekj nom Voda go, dee jrata es aus ekj.
29 Soo, ekj hab junt dit jesajcht, ea daut passieet, soo daut jie daut jleewen kjennen, wan daut ieescht passieet.
30 Ekj woa nich väl mea met junt räden, wiels de Harscha von de Welt kjemt, oba dee haft kjeene Macht äwa mie.
31 Oba ekj doo daut krakjt soo, aus de Voda mie daut oppjejäft haft, soo daut de Menschen enne Welt daut weeten, daut ekj dän Voda leew. Stot opp, well wie hia wajchgonen.
Footnooten
^ Ooda: “Treesta”.
^ Ooda: “nich soo aus Weisenkjinja”.
^ Ooda: “un onse Woninj doa moaken”.
