Jeschräwen von Johanes 15:1-27
15 Ekj sie de woare Wienstud un mien Voda es de Goadenbesorja.
2 Jieda Rank aun mie, waut nich Frucht drajcht, dee moakt hee auf. Un dee, waut doa Frucht drajcht, dee reinicht hee, soo daut dee noch mea Frucht drajcht.
3 Jie sent aul rein wäajen daut, waut ekj to junt jesajcht hab.
4 Blieft met mie veeent un ekj woa met junt veeent bliewen. Krakjt soo aus de Rank nich kaun Frucht droagen, wan dee nich aun de Stud blift, krakjt soo kjenn jie uk nich Frucht droagen, wan jie nich met mie veeent bliewen.
5 Ekj sie de Wienstud un jie sent de Ranken. Wäa met mie veeent blift un ekj met dän veeent bliew, dee drajcht een deel Frucht. Wiels wan jie von mie loos sent, dan kjenn jie verheipts nuscht doonen.
6 Wan doa wäa nich met mie veeent blift, dee woat rutjeschmäten, soo aus eene Rank, waut rutjeschmäten woat un vedrieecht. Un dan holen de Menschen de Ranken toop un schmieten dee em Fia nenn un dee woaren vebrent.
7 Wan jie met mie veeent bliewen un wan daut, waut ekj jesajcht hab, en junt blift, dan froacht no wautemma jie wellen un daut woat fa junt jedonen woaren.
8 Mien Voda woat doaderch veharlicht, daut jie wieda een deel Frucht droagen un daut bewiesen, daut jie miene Nofolja* sent.
9 Krakjt soo aus de Voda mie jeleeft haft, soo hab ekj junt jeleeft. Läft wieda soo, daut ekj junt leewen kaun.
10 Wan jie miene Jebooten hoolen, dan woa ekj junt wieda leewen, krakjt soo aus ekj mienen Voda siene Jebooten jehoolen hab, daut dee mie wieda leewen kaun.
11 Ekj hab junt aul dit jesajcht, soo daut jie kjennen krakjt dee Freid haben, waut ekj hab, un daut jie voll sent von dise Freid.
12 Dit Jeboot jäw ekj junt: Leeft junt unjarenaunda krakjt soo sea, aus ekj junt jeleeft hab.
13 Kjeena haft jratre Leew aus soona, waut sien Läwen* fa siene Frind jeft.
14 Jie sent miene Frind, wan jie daut doonen, waut ekj junt saj.
15 Ekj nan junt nich lenja Sklowen, wiels een Sklow weet doa nich om, waut sien Wieet deit. Oba ekj nan junt Frind, wiels ekj hab junt aules weeten loten, waut ekj von mienen Voda jehieet hab.
16 Jie haben nich mie jewält, oba ekj hab mie junt jewält. Ekj hab junt aunjestalt, daut jie wieda Frucht droagen; soone Frucht, waut blift. Soo kaun de Voda junt daut jäwen, no waut jie en mienen Nomen froagen, wautemma daut es.
17 Aul dit saj ekj junt, soo daut jie junt unjarenaunda leewen sellen.
18 Wan de Welt äwa junt spietich es, dan denkjt doaraun, daut dee aul ea äwa mie spietich wia.
19 Wan jie Poat von de Welt wieren, dan wudd de Welt junt jleichen, wiels jie dee jehieren wudden. Jie sent nu oba nich Poat von de Welt, wäajens ekj junt doa rutjeläst hab. Dits de Uasoak, wuarom de Welt äwa junt spietich es.
20 Hoolt daut em Denkj, waut ekj to junt säd: Een Sklow es nich jrata aus sien Wieet. Wan dee mie vefolcht haben, dan woaren dee junt uk vefoljen. Wan dee sikj aun daut hoolen, waut ekj saj, dan woaren dee sikj uk aun daut hoolen, waut jie sajen.
21 Oba dee woaren junt aul dit aundoonen, wäajen jie miene Nofolja* sent. Wiels dee kjanen dän nich, dee mie jeschekjt haft.
22 Wan ekj nich jekomen wia un met äant jerät haud, dan wudden dee nich schuldich sennen fa äare Sind. Oba nu haben dee kjeene Uträd fa äare Sind.
23 Wäa äwa mie spietich es, dee es uk äwa mienen Voda spietich.
24 Wan ekj mank äant nich de Woakjen jedonen haud, waut sestkjeena deed, dan wudden dee nich schuldich sennen fa äare Sind. Oba nu haben dee mie jeseenen un sent äwa mie spietich jewast un uk äwa mienen Voda.
25 Oba dit kjeem soo rom, daut sikj daut erfeld, waut en äa Jesaz steit: ‘Dee sent äwa mie spietich jewast onen Uasoak.’
26 Ekj woa junt eenen Helpa schekjen von dän Voda em Himmel. Dauts de Jeist von de Woarheit, waut von dän Voda häakjemt. Dee woat fa mie zeijen.
27 Un krakjt soo sell jie uk zeijen, wäajens jie sent von Aunfank aun met mie toop jewast.
