De Breef aun de Reema 1:1-32
1 Dis Breef kjemt von Paulus, Christus Jesus* sien Sklow. Ekj wort jewält, Apostel to sennen, un wort aunjestalt, Gott siene goode Norecht bekaunttomoaken,
2 dee hee em Verut derch siene Profeeten en de heilje Schreften vesproaken haud.
3 Dise Norecht jinkj om sienen Sän, waut een Nokomen* wia von David.
4 Dauts kloa, daut dit Gott sien Sän es, wiels Gott haft dän derch de Krauft von sienen heiljen Jeist vom Doot oppjewakjt. Jo, dauts Jesus Christus, ons Har.
5 Derch am haft Gott ons sien grootet Metleet* jewäsen. Jesus haft mie jewält, een Apostel to sennen, om aule Sorten Menschen* to halpen, Gloowen to wiesen un jehuarsom to sennen un sienen Nomen to ieren.
6 Jie sent uk von de aundre Sorten Menschen*, waut jewält sent, Jesus Christus to jehieren.
7 Dis Breef es fa aul dee en de Staut Room, dee Gott leeft; dee, woone hee jewält haft, Heilje to sennen:
Mucht jie grootet Metleet* un Fräd haben von Gott, onsen Voda, un von onsen Harn Jesus Christus.
8 Ieeschtens dank ekj mienen Gott derch Jesus Christus fa junt aula, wiels von junen Gloowen woat oppe gaunze Welt jerät.
9 Ekj deen mienen Gott met mien gaunzet Hoat*, doaderch daut ekj de goode Norecht von sienen Sän vespreeden doo. Un Gott weet, daut ekj kjeenmol opphia, junt en miene Jebäda met entonämen.
10 Ekj bäd, daut wan daut sest afens mäajlich es un Gott daut well, daut ekj entlich mol kaun no junt komen.
11 Wiels mie es doano, junt to seenen un junt irjenteene jeistelje Gow to brinjen, om junen Gloowen stoakja to moaken.
12 Ooda bäta jesajcht, daut wie ons omzajcht kjennen derch onsen Gloowen Moot toospräakjen; derch junen un derch mienen.
13 Breeda, ekj well, daut jie daut weeten, daut ekj aul foaken hab prooft, no junt to komen, oba dauts bat nu noch nich mäajlich jewast. Ekj well, daut bie ons Prädjen mank junt waut Goodet rutkjemt, krakjt soo aus daut bie de aundre Sorten Menschen* deit.
14 Ekj sie daut schuldich, aule Menschen to halpen: de Griechen uk de Framde; de weise Menschen uk de Onkluake.
15 Doawäajen jankat mie daut sea, de goode Norecht uk doa bie junt en Room bekaunttomoaken.
16 Wiels ekj schäm mie nich met de goode Norecht. Dauts je Gott siene Krauft toom aul dee raden, waut Gloowen wiesen; ieescht de Juden un dan uk de Griechen.
17 Gott siene Jerajchtichkjeit woat dee openboat, waut Gloowen wiesen, un daut stoakjt dee äaren Gloowen, krakjt soo aus jeschräwen steit: “Oba de Jerajchta woat läwen wäajen sienen Gloowen.”
18 Gott openboat siene Wutt vom Himmel, dee jäajen aul daut Gottloose un Schlajchte* jeit, waut de Menschen doonen. Dee doonen Schlajchtet, soo daut aundre nich weeten, waut rajcht es.
19 Wiels waut dee von Gott weeten kjennen, haben dee gaunz kloa ver de Uagen. Gott haft dee daut kloa jewäsen.
20 Wiels wan wie Gott uk nich seenen kjennen, es daut oba kloa to seenen, woo hee es, wan wie daut unjasieekjen, woo de Welt erschaufen es. Siene eewje Krauft un daut hee werkjlich Gott es, es aun daut to seenen, waut hee jemoakt haft. Derch disen Bewies haben soone kjeene Uträd.
21 Wan soone Menschen Gott uk kjanen, jäwen dee am oba nich de Harlichkjeit aus äaren Gott, un dee danken am uk nich. Enne Städ daut jreblen dee äwa Sachen, waut nuscht enhoolen, un äa onkluaket Hoat venemt nuscht mea*.
22 Wan soone Menschen uk väajäwen, weis to sennen, sent dee oba onkluak jeworden.
23 Enne Städ daut dee Gott veharlichen, dee nich stoawen kaun, veharlichen dee een Bilt von Menschen, waut stoawen, un von Väajel un veabeenje Tieren un Kruptieren.
24 Doawäajen lat Gott dee äa Orreinet utfieren, waut dee sikj em Hoat wenschen. Un dauts, wuarom dee onveschämde Sachen met äaren Kjarpa doonen.
25 Dee Menschen vetuschen Gott siene Woarheit met Läajes, un dee deenen un bäden daut aun, waut Gott jemoakt haft, enne Städ dän Schepfa selfst, dee doa fa emma saul jepreist woaren. Amen.
26 Dauts, wuarom Gott dee tochleet, daut dee äa schaundhauftet Sex-Velangen kunnen nogonen. De Frues haben äa Sex-Velangen no Mana, wua Gott dee fäa jemoakt haft, vetuscht met een Sex-Velangen no Frues, wua Gott dee nich fäa jemoakt haft.
27 Krakjt soo haben uk de Mana daut oppjejäft, met Frues Sex to haben, wuafäa Gott äant jemoakt haft, un haben sikj gaunz en äa äwamotjet Velangen nennjejäft no aundre Mana, un doonen äakjelje Sachen unjarenaunda. Oba dee woaren äare volle Strof kjrieen fa daut Orrajchte, waut dee doonen.
28 Wäajen dee denkjen, daut et nich needich es, Gott to kjanen, lat hee dee toch, daut dee wieda en äare orrajchte Jedanken bliewen un soo daut doonen, waut dee nich sellen doonen.
29 Dee sent voll aule Sorten Ojjerajchtichkjeit, Schlajchtet, Bejia, voll Aufgonst, Merdarie, Striet, Läajes un sent doano ut, aundre tootosaten. Daut sent Pludasakj
30 un dee doonen hinjarigjsch schlajcht räden, kjennen Gott schlajcht lieden, sent onen Schomp, meenen sikj väl un puchen met sikj un plonen schlajchte Sachen. Dee sent de Elren ojjehuarsom,
31 dee vestonen nich, dee hoolen äa Wuat nich, haben nich woare Leew un uk nich Metleet.
32 Dee weeten sea goot, daut Gott jesajcht haft, daut de Menschen, waut soont doonen, vedeent haben to stoawen. Dauts nich mau bloos, daut dee selfst wieda aul dise Sachen doonen, oba dee talen daut mau rajcht fa goot, wan aundre wieda soont doonen.
Footnooten
^ Wan daut Wuat “Christus” ver “Jesus” steit, jeit daut dolla opp sien Aumt, waut hee haft.
^ Wuatlich: “de Sot”.
^ Ooda: “siene onvedeende Leeftolichkjeit”.
^ Ooda: “de Velkja”; “aundre Raussen”.
^ Ooda: “de Velkja”; “aundre Raussen”.
^ Ooda: “onvedeende Leeftolichkjeit”.
^ Wuatlich: “met mienen Jeist”.
^ Ooda: “de Velkja”; “aundre Raussen”.
^ Ooda: “Ojjerajchte”.
^ Wuatlich: “es diesta jeworden”.
