Waut es daut baste, waut jie june Kjinja jäwen kjennen? Daut jeft välet, waut needich es fa Kjinja, biejlikj daut jie an leewen, an belieren un an beschitzen. Oba daut baste Jeschenkj, waut jie june Kjinja jäwen kjennen, es an halpen, Jehova un uk de Woarheit ut de Schreft kjanen to lieren (Johanes 17:3). Dan woaren see daut von kjlien aun lieren, Jehova to leewen un am met äa gaunzet Hoat to deenen (Matäus 21:16).

Väle Elren haben rutjefungen, daut Kjinja mea lieren, wan eena dee nich too väl opp eemol biebrinjt uk nich too lang en eent. Doawäajen frei wie ons, daut wie junt nu dit Heft Miene kjliene Bibel-Fiebel jäwen kjennen. De Jeschichten en dit Heft sent soo jeschräwen, daut daut leicht es fa junt Elren, june Kjinja to belieren. De Bilda un daut Jeschräwne es fa Kjinja jemoakt, waut dree Joa ooda jinja sent. Doa es uk emma jeschräwen, waut eena met de Kjinja toop doonen kaun. Miene kjliene Bibel-Fiebel es nich jemoakt, daut de Kjinja doamet spälen sellen, daut es jemoakt, daut jie daut met an toop läsen uk doaräwa räden.

Secha woat dit Heft fa junt Elren eene groote Help sennen, daut jie june Kjinja von kjlien aun de Woarheit ut de Schreft lieren kjennen (2. Timotäus 3:14-15).

June Breeda,

Väastaunt von Jehova siene Zeijen