WEETST du, waut daut es hia opp daut Bilt? Daut es een besondret Zelt toom Jehova aunbäden. De Israeliten hauden daut foadich, een Joa nodäm see Ägipten veloten hauden. Wäms Iedee wia daut, dit Aunbädungszelt to buen?

Daut wia Jehova siene Iedee. Jehova haud Moses opp dän Boajch Sinai jesajcht, woo daut Zelt jebut sull. Daut sull soo jemoakt, daut daut leicht jinkj uteneen to nämen. Soo kunnen see daut metnämen un wua aundatwäajen wada oppstalen. De Israeliten druagen daut Aunbädungszelt emma met, wan see enne Wiltnis von eene Städ no de aundre trocken.

Besee die mol de kjliene hinjaschte Stow en daut Zelt. Kaust du dän Kausten doa bennen seenen? Dee wort de ‘Bundeskjist’ jenant. Opp de Bundeskjist wieren twee Enjel, ooda Cheruben von Golt, eena opp jieda Enj. Wiels Moses de beid Steentoflen met de Tieen Jebooten tweijekjielt haud, haud Gott de Jebooten noch eemol opp twee Toflen jeschräwen. Dise worden en de Bundeskjist oppbewoat. Doa wia uk noch eene Kruck met Mauna bennen. Weetst du noch, waut daut Mauna wia?

Moses sien Brooda Aaron wort von Jehova toom Huagen Priesta jewält. Aaron lieed daut Volkj, woo see Jehova sullen aunbäden. Siene Junges wieren uk Priestasch.

Nu see mol de jratre Stow en daut Zelt. Dee wia dobbelt soo groot aus de kjliene Stow. Kaust du dän Kausten doa seenen, waut een bät rieekjat? Daut wia de Aultoa, opp dän de Priestasch Rieekjastoff vebrennen deeden, waut scheen rikjt. Dan wia doa noch de Laumpenhoola met säwen Laumpen. Daut dredde, waut doa en de Stow bennen wia, wia een Desch met twalf Stekja Broot.

Buten ver daut Zelt wia eene groote Waun met Wota. Doa deeden de Priestasch sikj wauschen. Dan wia doa uk noch een groota Aultoa. Doabowen worden doodje Tieren vebrent aus Opfa fa Jehova. Daut Aunbädungszelt stunt enne Medd von daut Loaga un de Israeliten wonden en äare Zelten runtom.