EN VÄLE Städa en Kanaan muaken de Menschen sikj reed toom jäajen de Israeliten kjamfen. Dee jleewden, see kunnen jewennen. De Menschen, waut doa dicht bie en de Staut Gibeon wonden, dochten oba aundasch. Dee sagen, daut Gott de Israeliten halpen deed, un jäajen Gott wullen see nich kjamfen. Weetst du, waut de Gibeonita doahäa deeden?

Dee worden sikj eenich, see wudden väajäwen, see wieren von irjentwua wiet auf. Eenje von de Mana trocken sikj oole, velumpte Kjleeda un vebrukte Wratschen aun. Dan looden dee oole Sakj opp äare Äsels un neemen oolet, hoatjedrieejdet Broot met. Soo jinjen dee no Josua un säden: ‘Wie sent von sea wiet auf jekomen, wiels wie haben von junen grooten Gott Jehova jehieet un waut dee aules fa junt en Ägipten jedonen haft. Doawäajen säden onse väaschte Mana, wie sullen ons waut Äten metnämen un no junt reisen un to junt sajen: “Wie sent june Deena. Vespräakjt ons, daut jie nich woaren jäajen ons kjamfen.” Jie kjennen je seenen, daut onse Kjleeda gaunz kaputt sent un daut ons Broot oolt un drieech jeworden es von de lange Reis.’

Josua un de väaschte Mana jleewden de Gibeonita daut. Un soo vespruaken see an, see wudden nich jäajen an kjamfen. Oba dree Doag lota worden see en, de Gibeonita wieren von gaunz dicht bie.

Josua fruach dee dan: ‘Wuarom säd jie to ons, jie wieren von wiet auf?’

De Gibeonita auntwuaden: ‘Wie deeden daut, wiels wie haben jehieet, daut jun Gott Jehova vesproaken haft, junt daut gaunze Launt Kanaan to jäwen. Un wie hauden Angst, jie wudden ons aula ombrinjen.’ De Israeliten hilden äa Vespräakjen un muaken de Gibeonita nich doot. Oba see muaken dee to äare Deena.

De Kjennich von Jerusalem wia sea doll, daut de Gibeonita met Israel Fräd jemoakt hauden. Dee säd to vea aundre Kjennichs: ‘Well wie ons toopstonen un jäajen Gibeon kjamfen.’ Un soo kjeemen dan fief Kjennichs jäajen Gibeon kjamfen. Wia daut werkjlich kluak von de Gibeonita, daut see met Israel Fräd jemoakt hauden? Wie woaren seenen.