BA! Waut doonen de Israeliten hia? Dee bäden een Kaulf aun! Wuarom doonen dee soont aus daut?

Moses bleef lang oppem Boajch, un schlieslich säd daut Volkj: ‘Wie weeten goanich, waut met Moses jeworden es. Well wie ons eenen Gott moaken, waut ons von hia wajchbrinjt.’

‘Na goot’, säd Moses sien Brooda Aaron. ‘Dan nämt june goldne Uarinj auf un brinjt dee häa.’ See deeden daut un Aaron deed daut Golt schmelten un muak doavon een goldnet Kaulf. Dan säd daut Volkj: ‘Dit es ons Gott, waut ons haft ut Ägipten rutjebrocht!’ Un see hauden een grootet Fast un deeden daut goldne Kaulf aunbäden.

Aus Jehova dit sach, wort hee sea doll. Hee säd to Moses: ‘Go schwind rauf. Daut Volkj deit waut sea schlajchtet. Dee haben miene Jesazen vejäten un bekjen sikj ver een goldnet Kaulf.’

Moses jinkj schwind vom Boajch rauf. Aus hee noda kjeem, sach hee, woo de Menschen rom daut goldne Kaulf sungen un daunzten! Moses wort soo doll, daut hee de twee Steentoflen met de Jesazen no de Ieed schmeet, un dee vebruaken to väle kjliene Bieta. Dan neem hee daut goldne Kaulf un veschmolt daut un vemold daut to fienet Pulwa.

Daut wia sea schlajcht, waut daut Volkj jedonen haud. Doawäajen befool Moses eenje Mana, see sullen äa Schwieet nämen, un säd: ‘De beese Menschen, waut daut goldne Kaulf aunjebät haben, motten stoawen!’ Un soo muaken de Mana 3 000 Menschen doot. Wiest ons daut nich kloa, daut wie bloos Jehova aunbäden sellen un kjeene Aufjetta?