WEETST du, waut de Menschen hia oppe Ieed toopläsen? Daut es witt, fien un kjreemlich un lat soo aus jefroarna Deiw. Oba daut es goanich jefroarna Deiw. Daut es waut toom äten.

Daut wia noch mau eene Moonat häa, waut de Israeliten Ägipten veloten hauden. See wieren nu enne Wiltnis. Doa woss schia nuscht un de Israeliten jaumarieeden un säden: ‘Wan Jehova ons doch bloos en Ägipten omjebrocht haud! Doa haud wie weens noch jenuach to äten.’

Doaropp säd Jehova: ‘Ekj woa loten vom Himmel Äten räajnen.’ Un krakjt daut deed Jehova uk. Näakjsten Dach zemorjes sagen de Israeliten de witte Kjreemels doa oppe Ieed un fruagen sikj unjarenaunda: ‘Waut es daut?’

Moses säd to an: ‘Daut es daut Äten, waut Jehova junt jeft.’ De Israeliten nanden daut MAUNA. Daut schmakjt soo aus denne Honnichkuaken.

‘Jieda eena saul soo väl toopläsen, aus hee oppäten kaun’, säd Moses to de Israeliten. Un soo deeden see daut dan jieda Zemorjes. Oba emma wan de Sonn ieescht heeta wort, veschmolt daut Mauna, waut noch oppe Ieed lieech.

Moses säd uk noch: ‘Kjeena saul waut Mauna bat dän näakjsten Dach äwahoolen.’ Oba eenje horchten nich no Moses. Weetst du, waut dan met daut Mauna passieed? Näakjsten Dach zemorjes wia daut voll Warm un funk aun to stinkjen.

Oba aun dän sasten Dach enne Wäakj sullen de Israeliten noch soo väl Mauna toopläsen aus sest. Jehova säd, see sullen waut fa dän säwenden Dach hoolen, wiels aun dän Dach wudd hee kjeen Mauna faulen loten. Aus de Israeliten daut Mauna bat dän säwenden Dach hilden, wia daut oba nich voll Warm un stunk uk nich. Dit wia noch een Wunda von Gott!

Aul de Joaren, waut de Israeliten enne Wiltnis wieren, jeef Jehova an daut Mauna to äten.