AUS David en Jerusalem rejieed, holp Jehova dän sien Kjrichshäa välmol, jäajen äare Fiend to jewennen. Jehova haud vesproaken, hee wudd de Israeliten daut Launt Kanaan jäwen. Un nu hauden see met Jehova siene Help schlieslich daut gaunze vesproakne Launt enjenomen.

David wia een gooda Harscha. Hee räakjend Jehova sea väl. Soo schwind aus hee Jerusalem enjenomen haud, leet hee doahäa de Bundeskjist doa hanbrinjen. Hee wull uk eenen Tempel buen, wua hee de Bundeskjist kunn nensaten.

Oba aus David aul ella wia, muak hee eenen grooten Fäla. David wist, daut et orrajcht wia, waut to nämen, waut eenen aundren jehieed. Oba eenen Zeowes, aus hee opp daut Dak von sienen Paulaust wia, sach hee von doa bowen eene sea schmocke Fru. Dee heet Batseba. See wia de Fru von Uria, eent von David siene Soldoten.

David wull Batseba onbedinjt haben un leet ar no sienen Paulaust holen. Äa Maun wia nich tus; dee wia em Kjrich. David läd sikj met Batseba dol, un lota wort see en, see wudd een Bäbe haben. Nu wort David owwool. Hee schekjt Joab, dän Väaschten von daut Kjrichshäa, Tiedinj, hee sull Uria em Kaumf gaunz väarenaun stalen, daut dee storf. Aus Uria ieescht doot wia, befried David sikj met Batseba.

Jehova wia sea doll äwa David. Hee schekjt sienen Deena Natan no David toom am siene Sinden kloa moaken. Opp daut Bilt kaust du seenen, woo Natan met David rät. David wia daut sea leet, waut hee jedonen haud, un doawäajen leet Jehova am läwen. Oba Jehova säd to am: ‘Wiels du soo waut schlajchtet jedonen hast, woascht du en diene Famielje väl Trubbel haben.’ Un waut fa Trubbels David nich haud!

Daut ieeschte storf Batseba äa Bäbe. Dan, aus David sien elsta Jung Amnon eemol met siene Sesta Tamar auleen wia, neem hee dee met Jewault un läd sikj met dee dol. David sien Jung Absalom wia soo doll doaräwa, daut hee Amnon dootmuak. Lota kjrieech Absalom väle von daut Volkj opp siene Sied un muak sikj selfst toom Kjennich. Schlieslich jewonn David oba dän Kjrich jäajen sienen Sän Absalom un dee wort dootjemoakt. Daut wieren opp iernst groote Trubbels, waut David haud.

Entweschen haud Batseba noch eenen Sän, dee Salomo heet. Aus David ieescht oolt un krank wia, wull sien Jung Adonija sikj selfst toom Kjennich moaken. Oba David säd to dän Priesta Zadok, hee sull Salomo Eelj oppem Kopp jeeten toom wiesen, daut dee wudd de Kjennich sennen. Kort nodäm storf David, aus hee 70 Joa oolt wia. Hee haud 40 Joa lank rejieet. No am wort Salomo de Kjennich en Israel.