MEA aus tieen Joa wieren nu aul vegonen von don, aus Kjennich Nebukadnezar aule huach utjelieede Israeliten met no Babielon jenomen haud. Un kjikj, waut nu passieet! Jerusalem woat gaunz vebrent. Un de Israeliten, waut see nich haben dootjemoakt, woaren aus Jefangne met no Babielon jenomen.

Weetst du noch? Jehova siene Profeeten hauden daut Volkj jewoarnt, daut et soo komen wudd, wan see nich opphieeden met schlajchtet doonen. Oba de Israeliten hauden nich no de Profeeten jehorcht. Dee hauden eefach soo wiedajemoakt un faulsche Jetta aunjebät enne Städ Jehova. Dee hauden dise Strof werkjlich vedeent. Gott sien Profeet Hesekiel schrift von daut schlajchte, waut de Israeliten deeden.

Weetst du, wäa Hesekiel wia? Daut wia eena von de junge Mana, waut Kjennich Nebukadnezar mea aus tieen Joa ea met no Babielon jenomen haud. Daut wia krakjt dan, aus uk Daniel un siene dree Frind Schadrach, Meschach un Abed-Nego wieren no Babielon jebrocht worden.

En Babielon wees Jehova Hesekiel aul daut schlajchte, waut dee en Jerusalem em Tempel deeden. Jehova wees am daut derch een Wunda. Hesekiel kunn dän Tempel seenen, uk wan hee en Babielon wia. Hee vefieed sikj, aus hee sach, waut doa aules passieed.

Jehova säd to Hesekiel: ‘Kjikj, waut fa oppscheiselje Dinja daut Volkj em Tempel deit! Kjikj mol, de Waunt es voll met Bilda von Schlangen un aundre Tieren. Un de Israeliten doonen dee aunbäden!’ Hesekiel schreef aules opp, waut hee sach.

Dan fruach Jehova Hesekiel: ‘Kaust du seenen, waut de väaschte Mana von Israel doa em plietschen doonen?’ Hesekiel sach doa 70 Mana, waut faulsche Jetta aunbäden deeden. Dee säden: ‘Jehova kaun ons goanich seenen. Dee haft daut Launt veloten.’

Dan wees Jehova Hesekiel bie de nuadne Däa vom Tempel eenje Frues. Dee sauten doa un deeden dän faulschen Gott Tamus aunbäden. Un bie dän Engank von Jehova sienen Tempel sach hee bie 25 Mana, waut sikj nom Oosten han bekjten un de Sonn aunbäden deeden!

Jehova säd dan: ‘Dit Volkj deit mie nuscht achten. Daut es nich bloos, daut dee soo väl schlajchtet doonen, oba dee doonen daut soogoa noch krakjt en mienen Tempel!’ Doawäajen säd Jehova: ‘Dee woaren mienen Oaja noch to späaren kjrieen. Mie woat daut nuscht jaumren, wan dee woaren venicht woaren.’

Mau ojjefäa dree Joa nodäm aus Jehova Hesekiel dit jewäsen haud, stalden de Israeliten sikj Kjennich Nebukadnezar jäajenaun. Un soo kjeem dee jäajen an kjamfen. Eentunhaulf Joa lota bruaken de babielonische Soldoten sikj derch de Mia von Jerusalem derch un vebrenden de Staut. De mieeschte Israeliten worden entwäda omjebrocht ooda aus Jefangne met no Babielon jenomen.

Wuarom leet Jehova dise schrakjelje Venichtunk too? Wiels de Israeliten hauden nich no Jehova jehorcht uk nich siene Jesazen jehoolen. Daut lieet ons, daut wie emma daut doonen sellen, waut Gott haben well.

Eenje Israeliten kunnen noch en daut Launt wonen bliewen. Kjennich Nebukadnezar muak eenen Jud, waut Gedalja heet, toom Väaschten äwa dee. Oba waut Israeliten brochten Gedalja om. Nu haud daut Volkj Angst, de Babielonia wudden komen un an wäajens dise Sach aula dootmoaken. Doawäajen brochten dee sikj fuat no Ägipten un bemusten uk Jeremia, mettogonen.

Un soo bleef en daut Launt Israel kjeena mea wonen. 70 Joa lank wia daut Launt onbewont. Doa läwd nich een Mensch. Oba Jehova haud vesproaken, hee wudd sien Volkj wada trigj no daut Launt brinjen, wan ieescht 70 Joa äwa wieren. Waut passieed en dän Tiet met Gott sien Volkj en daut Launt Babielon? Well wie mol seenen.