OPP siene Reisen derch daut Launt deed Jesus väle Kranke heelen. Äwaraul en de Städa un Darpa wort von dise Wunda vetalt. Un soo brochten de Menschen Kjräpelje, Blinje, Doowe un väle Kranke no Jesus. Un hee deed dee aula heelen.

Daut wieren nu aul äwa dree Joa von don, aus Johanes Jesus jedeept haud. Jesus säd to siene Apostel, hee wudd boolt no Jerusalem gonen. Dort wudden see am ombrinjen, oba hee wudd wada oppstonen. Bat doahan deed Jesus oba noch väle Kranke heelen.

Eemol deed Jesus aun eenen Sabat lieren. Aum Sabat deeden de Juden nich schaufen. Opp daut Bilt kaust du eene Fru seenen, dee sea krank wia. 18 Joa lank haud dee gaunz kromm jegonen un haud sikj nich kunt opprechten. Oba Jesus foot dee aun, un soo wort dee äa Rigjen uk aul jlikj. See wia wada koasch!

Dit oajad de judische Leidasch sea. ‘Doa sent sas Doag, wua eena schaufen kaun’, säd eena von dee to de Menschen. ‘Aun dee Doag kjenn jie komen un junt loten heelen, oba nich aum Sabat!’

Oba Jesus säd: ‘Jie schlajchte Mana! Jieda eena von junt wudd aum Sabat sienen Äsel loosbinjen un to Drenkj leiden. Sull dan nich dise oame Fru, dee aul 18 Joa krank jewast es, aum Sabat jeheelt woaren?’ Aus Jesus dit säd, schämden dise schlajchte Mana sikj.

Lota reisden Jesus un siene Apostel wieda opptoo no Jerusalem. Aus see noch mau jroz ut de Staut Jericho buten wieren, sauten doa twee blinje Prachasch. Dee hieeden, daut Jesus doa vebiekjeem, un schrieejen: ‘Jesus, halp ons!’

Jesus roopt de blinje Mana un fruach dee: ‘Waut saul ekj fa junt doonen?’ Dee säden: ‘Har, moak ons de Uagen op.’ Jesus schieed dee aune Uagen aun, un fuaz oppe Städ kunnen dee seenen! Weetst du, wuarom Jesus aul dise Wunda deed? Wiels hee räakjend de Menschen väl un hee wull haben, dee sullen aun am jleewen. Wie kjennen ons secha sennen: Wan Jesus ieescht woat aus Kjennich äwa de Ieed rejieren, woat kjeena mea krank sennen.