DAUT es nu aul Donnadach zeowes, twee Doag lota. Jesus un siene twalf Apostel sent hia en eene groote Bowastow toom daut Passamol äten. De Maun, waut doa velat, es Judas Iskariot. Hee jeit de Priestasch sajen, woo see Jesus faustnämen kjennen.

Aul väajen Dach wia Judas no dee jegonen un haud jefroacht: ‘Waut woa jie mie jäwen, wan ekj junt saj, woo jie Jesus faustnämen kjennen?’ Dee hauden jesajcht: ‘30 Selwastekja.’ Doawäajen jeit Judas dee nu sajen, wua see Jesus finjen kjennen. Es daut nich sea schlemm?

Aus daut Passamol ieescht derch wia, deed Jesus eene niee Feia enfieren. Hee jeef siene Jinja een Stekj Broot un säd: ‘Ät doavon, wiels daut bediet mienen Kjarpa, dee fa junt jejäft woat.’ Dan neem hee een Kuffel Wien un säd: ‘Drinkjt doavon, wiels dis Wien bediet mien Bloot, waut fa junt vegoten woat.’ Enne Bibel woat dise Feia “dän Harn sien Owentmol” jenant.

De Israeliten eeten daut Passamol toom aundenkjen aun de Tiet, wua Gott sien Enjel de Ägipta äare Ieeschtjebuarne dootmuak, oba de Israeliten äare veschoonen deed. Oba Jesus wull haben, siene Nofolja sullen von nu aun aun am denkjen, woo hee sien Läwen fa an hanjejäft haud. Doawäajen säd hee, see sullen daut Owentmol jieda Joa hoolen.

No daut Owentmol säd Jesus to siene Apostel, see sullen mootich sennen un eenen stoakjen Gloowen haben. Schlieslich sungen see noch Leeda toom Gott lowen un veleeten. Daut wia nu aul sea lot, veleicht soogoa aul no Klock twalf. En de näakjste Jeschicht woa wie seenen, wua see hanjinjen.