LAT Jesus hia nich sea doll? Weetst du, wuarom hee soo doll es? Daut es wäajens dise Mana hia en Gott sienen Tempel. Dee sent sea bejierich un wellen väl Jelt vedeenen derch de Menschen, waut nom Tempel komen toom Gott aunbäden.

Kaust du de junge Bolles, de Schop un de Duwen seenen? De Mana vekjeepen dise Tieren hia em Tempel. Weetst du, wuarom? Wiels de Israeliten brukten Tieren toom dee fa Gott opfren.

Gott sien Jesaz velangd, daut een Israelit een Opfa brinjen sull, wan dee waut orrajchtet jedonen haud. Oba wua sull een Israelit de Tieren häanämen toom opfren?

Eenje Israeliten hauden selfst Tieren, waut see kunnen opfren. Oba väle hauden kjeene Tieren. Aundre wada wonden soo wiet auf von Jerusalem, daut see nich von äare ieejne Tieren met nom Tempel nämen kunnen. Doawäajen kjeemen de Menschen un koften sikj de Tieren hia, waut see brukten toom opfren. Oba de Mana deeden de Menschen unjagonen un vekoften de Tieren väl too dia. Un daut wia aulmols gaunz orrajcht, de Tieren hia en Gott sienen Tempel to vekjeepen.

Dit es, waut Jesus soo doll muak. Hee stelpt de Mana äare Deschen om, soo daut daut Jelt veschedd. Dan muak hee sikj eene Pitsch von Strenj un juach de Tieren utem Tempel rut. To de Mana, waut de Duwen vekoften, säd hee: ‘Schauft dee hia rut! Hieet opp, mienen Voda sien Hus to eenen Schachaplauz to moaken!’

Eenje von Jesus siene Nofolja wieren met am toop em Tempel. See wieren vewundat, aus see sagen, waut Jesus deed. Oba dan foll an daut bie, daut et opp eene Städ enne Bibel von Gott sienen Sän sajcht: ‘De Leew fa Gott sien Hus woat en am brennen soo aus een Fia.’

Wäarent Jesus hia en Jerusalem toom Passafast wia, deed hee väle Wunda. Lota veleet Jesus Judäa un jinkj trigj no Galiläa. Oppem Wajch jinkj hee derch de Jäajent von Samaria. Well wie mol seenen, waut hee doa beläwd.