KORT nodäm aus Jesus de twee blinje Prachasch jeheelt haud, kjeemen see no een kjlienet Darp dicht bie Jerusalem. Hee säd to twee von siene Jinja: ‘Got en daut Darp nenn un jie woaren doa eenen jungen Äsel finjen. Binjt dän loos un brinjt dän häa.’

Dee brochten am dän Äsel un Jesus sad sikj doa nopp un reet no Jerusalem. Aus hee meist bat doa wia, kjeem am ut de Staut eene groote Häad Menschen entjäajen. Väle trocken äare Äwarakj ut un spreeden dee oppem Wajch han. Aundre schneeden Paulmbläda auf un läden dee uk oppem Wajch han. See säden: ‘Jesäajent es de Kjennich, dee en Jehova sienen Nomen kjemt!’

Lang trigj wia daut en Israel Mood jewast, daut een niea Kjennich opp eenen jungen Äsel no Jerusalem reet, daut daut Volkj dän seenen kunn. Jesus deed daut uk, soo aus du hia seenen kaust. Un de Menschen hia wiesen, daut see Jesus aus Kjennich haben wellen. Oba nich aule Menschen wullen daut. Daut wees sikj ut, aus Jesus nom Tempel kjeem.

Em Tempel deed Jesus blinje un kjräpelje Menschen heelen. Aus de kjliene Kjinja daut sagen, deeden dee Jesus met lude Stemm lowen. De Priestasch oajaden sikj doaräwa un säden to Jesus: ‘Hieescht du, waut de Kjinja sajen?’

‘Jo’, säd Jesus. ‘Hab jie noch kjeenmol enne Bibel jeläst, wua daut sajcht: “Gott woat doafäa sorjen, daut kjliene Kjinja am lowen”?’ Un soo muaken de Kjinja bloos wieda un lowden Gott sienen Kjennich.

Sell wie nich uk soo sennen aus dise Kjinja? Eenje Menschen wellen veleicht nich haben, daut wie sellen von Gott sien Kjennichrikj räden. Oba wie woaren aundre doawäajen bloos wieda doavon vetalen, waut Jesus aules fa de Menschen doonen woat.

Aus Jesus oppe Ieed wia, wia daut noch nich de Tiet, daut hee wudd aus Kjennich rejieren. Wanea wudd dee Tiet komen? Jesus siene Jinja wullen daut jieren weeten. En de näakjste Jeschicht woa wie mea doavon lieren.