DE MAUN hia opp Kjneees es Stefanus, een trua Jinja von Jesus. Oba kjikj mol, waut de Mana met dän doonen! Dee schmieten groote Steena opp dän nopp. Wuarom kjennen dee Stefanus soo schlajcht lieden, daut dee soont aus dit doonen? Well wie mol seenen.

Stefanus haud met Gott siene Help groote Wunda jedonen. Dise Mana jleichten daut oba nich. Dee fungen sikj aun met am to strieden, wiels hee de Menschen de Woarheit lieed. Oba Jehova jeef Stefanus väl Weisheit un hee kunn kloa wiesen, daut dise Mana faulschet lieren deeden. Daut oajad dee noch dolla. Un soo neemen dee am jeleewat un leeten Menschen komen, waut Läajes äwa am vetalen sullen.

De Huaga Priesta fruach Stefanus dan: ‘Es daut soo, waut dise sajen?’ Doaropp hilt Stefanus eene feine Räd un vetald väl ut de Bibel. Toom Schluss säd hee, daut haud noch emma schlajchte Menschen jejäft, waut äwa Jehova siene Profeeten spietich jewast wieren. ‘Jie sent krakjt soo, aus dee wieren’, säd hee. ‘Jesus wia Gott sien Deena un jie haben dän omjebrocht. Un jie hoolen uk nich Gott siene Jebooten.’

Nu wieren de judische Leidasch voll! Ut aula Wutt beeten dee sikj de Tänen toop. Stefanus oba kjikjt no Hecht un säd: ‘Kjikjt! Ekj kaun Jesus em Himmel aune rajchte Sied bie Gott seenen.’ Aus see dit hieeden, hilden see sikj de Uaren too un moarachten aula opp Stefanus nopp. See pakten am aun un schlapten am ut de Staut rut.

Doa trocken see sikj äare Äwarakj ut un jeewen eenen jungen Maun dee, daut dee doano oppaust. Dee heet Saul. Kaust du dän doa hinjen oppem Bilt seenen? Dan schmeeten eenje von de Mana Steena opp Stefanus nopp. Stefanus foll opp Kjneees un deed to Gott bäden, soo aus du hia seenen kaust. Hee säd: ‘Jehova, doo an nich fa dise schlajchte Sach bestrofen.’ Dit säd hee, wiels hee wist, daut de judische Leidasch eenje von dise Mana waut faulschet enjebilt hauden. Dan storf Stefanus.

Waut deist du, wan to die wäa domm es? Deist du dän daut dan trigjtolen? Ooda wenschst du die veleicht, Gott sull dän bestrofen? Stefanus un Jesus deeden daut oba nich. See wieren emma fein to de Menschen, soogoa wan dee to an schlajcht wieren. Well wie seenen, aus wie nich uk kjennen soo sennen.