WÄA es de Maun, waut hia oppe Ieed licht? Daut es Saul. Hee es dee, waut no de Äwarakj von de Mana oppaussen deed, waut Stefanus steenjen deeden. Un kjikj mol de dacha Schien! Waut es hia?

Nodäm aus dee Stefanus omjebrocht hauden, deed Saul Jesus siene Jinja sea vefoljen un väl toosaten. Hee jinkj von een Hus no daut aundre un schlapt de Jinja ut äare Hiesa rut un leet dee em Jefenkjnis stoppen. Väle von de Jinja brochten sikj fuat no aundre Städa un fungen aun, dort de goode Bootschoft to prädjen. Un soo socht Saul uk en jane Städa no Jesus siene Nofolja. Oba aus hee jroz oppem Wajch wia no de Staut Damaskus, passieed doa waut wundaboaret.

Met eemol plazlich bedacht am een kloaret Licht vom Himmel. Hee foll oppe Ieed han, soo aus hia to seenen es. Dan säd doa eene Stemm: ‘Saul! Saul! Wuarom deist du mie vefoljen?’ De Mana, waut met Saul toop wieren, kunnen daut Licht seenen un hieeden uk de Stemm, oba dee kunnen nuscht nich vestonen.

‘Har, wäa best du?’, fruach Saul.

‘Ekj sie Jesus, dän du vefoljen deist’, säd de Stemm. Jesus säd daut, wiels Saul deed siene Jinja vefoljen. Daut wia krakjt soo, aus wan Saul Jesus vefoljen wudd.

Dan fruach Saul: ‘Har, waut saul ekj doonen?’

Jesus säd: ‘Sto opp un go no Damaskus. Dort woat die jesajcht woaren, waut du doonen saust.’ Aus Saul oppstunt un siene Uagen opmuak, kunn hee nich mea seenen. Hee wia blint! Soo neemen de aundre Mana am aune Haunt un leiden am no Damaskus.

Dan säd Jesus to sienen Jinja Hananias, waut en Damaskus wond: ‘Moak die opp, Hananias, un go no de Gaus, waut “de Jlikje” jenant woat. Froag doa en Judas sien Hus no eenen Maun, waut Saul heet. Ekj hab mie dän to eenen besondren Deena jewält.’

Hananias deed soo, aus Jesus to am jesajcht haud. Aus hee Saul jefungen haud, läd hee siene Henj opp dän un säd: ‘De Har haft mie jeschekjt, daut du wada seenen kaust un heiljen Jeist kjrieen saust.’ Un fuaz foll am waut von de Uagen, soo aus Scheepen, un hee kunn wada seenen.

Saul sull eene besondre Oabeit doonen. Hee sull en väle Lenda prädjen. Lota wort hee bekaunt aus de Apostel Paulus. Wie woaren noch väl von am lieren. Oba ieescht well wie mol seenen, waut Gott to Petrus säd, waut hee doonen sull.