Daut Buak Bibelvarzhen fa ons christeljet Läwen woat die daut leichta moaken, Varzhen un Jeschichten ut de Schreft to finjen, waut die halpen woaren, met diene Schwierichkjeiten omtogonen. Met dit Buak kaust du uk Varzhen finjen toom aundre Moot moaken un dee halpen, soone Entscheidungen to moaken, waut Jehowa ieren. Sieekj die eefach daut Teema, waut die intressieet. Bie jieda Teema sent Froagen, waut die halpen kjennen, un Biespels ut de Schreft, waut kort toopjefot sent. (See daut Hock “ Woo du dit Buak brucken kaust”.) Secha woascht du soone Bibelvarzhen finjen, waut die dän Rot ooda Troost jäwen, waut die fält. Du woascht uk wieetvolle Varzhen finjen toom met aundre metdeelen, waut dee Rot, Moot un Krauft jäwen un halpen woaren, met äare Trubbels foadich to woaren.

En dit Buak sent lang nich aule Bibelvarzhen aunjejäft, waut bie een Teema biepaussen. Oba daut es soo jemoakt, daut du dee Varzhen finjst, waut die daut dolste halpen. Un dan kaust du die uk noch en aundre Bieekja mea noseenen (Pr 2:​1-6). Toom deepa studieren bruck de Varzhen toom wiedaschlonen von De Bibel – Niee-Welt-Äwasatunk un uk de Erkjläarungen toom studieren opp eene Sproak, waut du vestonen kaust. Toom mea von eenen Varsch lieren, sieekj dän bie “Bibelvarzhen” en de Help toom nosieekjen fa Jehowa siene Zeijen ooda en dän “Index der Wachtturm-Publikationen”. Läs die doabennen daut derch, waut daut latste rutkjeem, daut du die secha best, daut et soo utjelajcht woat, aus wie daut nu vestonen.

Wie wenschen ons, daut die dit Buak Bibelvarzhen fa ons christeljet Läwen halpen woat, de Weisheit un feine Lieren von de Heilje Schreft ruttoschapen un rajcht to vestonen. Wan du dit Buak brukst, woascht du emma dolla enwoaren, daut “Gott sien Wuat läft un . . . kjraftich” es (Heb 4:12).