4. POAT
Wäa es Jesus Christus?
1. Von wua kjeem Jesus häa?
Wuarom jinkj de Menschen daut scheen, met Jesus toop sennen? (MATÄUS 11:29; MARKUS 10:13-16)
Aundasch aus aule aundre Menschen haft Jesus ver siene Jeburt aus een Jeist em Himmel jeläft (Johanes 8:23). Hee wia daut ieeschte, waut Gott muak, un hee holp Gott, aulet aundre to moaken. Wiels hee de eensja es, dän Jehova auleen jemoakt haft, woat hee uk Gott sien eensja Sän jenant (Johanes 1:14). Jesus woat uk “daut Wuat” jenant, wiels hee fa Gott räden deit. Läs Spricha 8:22-23, 30; Kolossa 1:15-16.
2. Wuarom kjeem Jesus no de Ieed?
Daut Jesus kunn aus Mensch jebuaren woaren, deed Gott dän sien Läwen en de judische Junkfru Maria äa Muttalief nenn. Jesus kjeem aulsoo nich von eenen menscheljen Voda (Lukas 1:30-35). Jesus kjeem no de Ieed, (1) om de Woarheit äwa Gott to lieren, (2) om to wiesen, woo eena emma Gott sienen Wellen doonen kaun, uk en schwoare Tieden, un (3) om sien volkomnet Läwen aus Leesjelt to jäwen. Läs Matäus 20:28.
3. Wuarom bruck wie een Leesjelt?
Een Leesjelt es de Pries, waut betolt woat, om wäm vom Doot frietokjeepen (4. Mose 35:31-32). Aus Gott de Menschen muak, wull dee nich, daut dee oolt worden un storwen. Woo weet wie daut? Gott säd to dän ieeschten Mensch, Adam, wan hee sindjen wudd, wudd hee stoawen. Wan Adam nich jesindicht haud, wia dee nich jestorwen (1. Mose 2:16-17; 5:5). De Schreft sajcht, daut derch Adam “de Sind en de Welt nenn kjeem”. Un wiels wie aula Adam siene Nokomen sent, hab wie de Sind metjeorwen un motten uk stoawen. Wie brucken een Leesjelt, waut ons vom Doot friemoakt. Läs Reema 5:12; 6:23.
Wäa kaun ons vom Doot looskjeepen? Wan wie stoawen, betol wie doamet bloos onse ieejne Sinden. Kjeen onvolkomna Mensch kaun eenen aundren siene Sinden betolen. Läs Psalm 49:8-10.
4. Wuarom must Jesus stoawen?
Jesus wia nich onvolkomen. Hee must nich fa siene ieejne Sinden stoawen soo aus wie, wiels hee haud kjeene begonen. Hee storf fa aundre äare Sinden. Daut Gott sienen Sän fa ons stoawen leet, wiest siene groote Leew fa de Menschen. Un Jesus bewees uk, daut hee ons leeft. Hee jehorcht sienen Voda un jeef sien Läwen fa onse Sinden. Läs Johanes 3:16; Reema 5:18-19.
Kjikj daut Video Wuarom must Jesus stoawen?
5. Waut deit Jesus vondoag dän Dach?
Aus Jesus oppe Ieed wia, heeld hee Kranke, wuak eenje vom Doot opp un holp dee, waut en Noot wieren. Soo wees Jesus, waut hee noch mol fa jehuarsome Menschen doonen wudd (Matäus 15:30-31; Johanes 5:28). Aus Jesus jestorwen wia, wuak Gott dän opp toom wada em Himmel läwen (Efeesa 1:20). Dan luad Jesus aun Gott siene rajchte Sied, bat dee am de Kjennichsmacht äwa de Ieed jeef (Hebräa 10:12-13). Nu harscht Jesus aus Kjennich em Himmel un siene Nofolja vebreeden dise goode Norecht oppe gaunze Welt. Läs Openboarunk 11:15; Matäus 24:14.
Boolt woat Jesus siene Kjennichsmacht brucken un met aul daut Lieden een Enj moaken, uk met dee, waut daut aunrechten. Dee, waut aun Jesus jleewen un am jehorchen, woaren dan em Paradies oppe Ieed läwen. Läs Psalm 37:9-11.
