Schia nuscht es soo schwoa, aus wan wäa von onse Famielje ooda een gooda Frint utjeschloten woat, wiels dee jesindicht haft un nich omkjieet. Woo wie en soone Loag de Aunwiesungen ut Gott sien Wuat nokomen, wiest, woo sea wie Gott leewen un aus wie am werkjlich wellen tru sennen. * Well wie nu mol een poa Froagen seenen, waut met dise Sach to doonen haben.

Woo sell wie met soone omgonen, waut utjeschloten sent? En de Schreft sajcht daut: “Jie [sellen] nich . . . Jemeenschoft haben met eenem, dee sikj een Brooda nant, un oba huat ooda jiezich es ooda Jetta deent ooda drinkjt ooda lastat ooda stält. Met soonem sell jie nich emol toop äten” (1. Korinta 5:11). De Schreft sajcht uk: “Wäa ut Christus siene Lia rutjeit un nich doabennen blift, . . . dän nämt nich em Hus nenn un bejreest dän uk nich. Wäa soone bejreest, nemt Poat aun äare beese Woakjen” (2. Johanes 9-11). Wie woaren aulsoo nich met Utjeschlotne äwa jeistelje Sachen räden un uk nich met dee spazieren. Em Wachtturm vom 15. Dezamba 1981 opp de Sied 24 sajcht daut: “Wäm bejreessen kunn de Aunfank sennen fa eene Unjahoolunk ooda toom met dän Frint sennen. Wudd wie daut met eenen Utjeschlotnen wellen?”

Sell wie en disen Stekj werkjlich soo neiw sennen? Jo, un daut jeft uk goode Uasoak doafäa. Ieeschtens well wie Gott tru sennen un ons aun sien Wuat hoolen. Wie räakjnen Jehova väl un doawäajen well wie am emma jehorchen, endoont aus daut schwoa es. Un wie weeten uk, daut Gott jerajcht un leeftolich es un daut siene Jebooten ons toom gooden sent (Jesaja 48:17; 1. Johanes 5:3). Tweedens es daut een Schutz fa de gaunze Vesaumlunk, wan wie Utjeschlotne meiden. Soo blift dee von faulsche Lieren un von een schlajchtet Vehoolen rein un helt äaren gooden Nomen (1. Korinta 5:6-7). Dreddens  kaun daut mau rajcht dän Utjeschlotnen halpen, wan wie ons faust aun de biblische Gruntsauzen hoolen un daut unjastetten, waut daut Rechtkommitee entschieden haft. Wan deejanja, waut de Eltestasch äare Help bat nu nich aunjenomen haft, sitt, daut siene Famielje un siene Frind nich mea met am Jemeenschoft haben, kaun dän daut to Besennunk brinjen. Dee sitt dan veleicht en, woo iernst siene Loag es, un kjemt wada trigj no Jehova (Lukas 15:17).

Waut, wan daut wäa von ons Frintschoft es? Wiels eena sikj met de Famielje sea vebungen feelt, kaun daut schwoa sennen, sikj aun Jehova siene Jebooten to hoolen, wan wäa vom Frintschoft utjeschloten woat. Woo sell wie ons dan vehoolen? Wie kjennen hia nu nich von jieda Loag räden, waut daut jäwen kunn. Oba see wie mol tweeatlei.

Veleicht es daut wäa von de ieejne Famielje, waut en dautselwje Hus wont. Wan dee uk utjeschloten es, blift dee doawäajen een Poat von de Famielje un kaun wieda met dee toop läwen un schaufen. Oba derch sien Vehoolen haft hee sikj von dän Gloowen loosjemoakt, waut hee met dee toop haud. Un wiels de äwaje Jehova tru deenen wellen, woaren dee em jeisteljen nuscht mea met dän toophaben. Dee wudd biejlikj kjennen biem Famieljenstudium bie sennen, oba nich metmoaken. Wan oba een Kjint, waut noch nich voljoarich es, em Utschluss steit, woaren de Elren daut doawäajen wieda leeftolich belieren un trajchtwiesen. Dee wudden biejlikj kjennen met äa Kjint de Bibel studieren (Spricha 6:20-22; 29:17). *

Veleicht es de Utjeschlotna oba uk wäa von ons Frintschoft, waut nich met ons toop wont. Dan woa wie soo weinich aus mäajlich met dän to doonen haben. Veleicht kjemt eenjemol en de Famielje waut opp, wua äwa jerät mott. Oba true Christen woaren nich proowen, waut väatojäwen, daut see kjennen  met dän toop sennen. Dee wellen Jehova un siene Organisazion unjastetten un doawäajen hoolen dee sikj aun de biblische Aunwiesungen. Dee wellen uk daut baste fa dän Utjeschlotnen un wellen, daut de Trajchtwiesunk dän toom gooden es (Hebräa 12:11). *