Aun aule Kjennichrikjsvekjindja:

Stal die mol väa, du best eent von de Apostel, waut opp dän Oliewen-Boajch toopjekomen sent. Met eenst es Jesus doa uk mank junt un jroz ea hee trigj nom Himmel foat, sajcht hee: “Wan de Heilja Jeist äwa junt komen woat, woa jie Krauft kjrieen, un jie woaren miene Zeijen sennen, en Jerusalem, en gaunz Judäa, en Samaria, un äwa de gaunze Welt” (Apj. 1:8). Woo wurscht du die feelen?

Veleicht wurscht du die wäajen dise groote Oppgow äwafoddat feelen un denkjen: “Woo kjenn wie ‘äwa de gaunze Welt’ Zeichnis jäwen? Wie sent je mau weinich, waut Jesus nofoljen!” Veleicht wurscht du aun de Woarnunk denkjen, waut Jesus jeef, ea hee storf. Hee säd: “Een Sklow es nich jrata aus sien Wieet. Wan dee mie vefolcht haben, dan woaren dee junt uk vefoljen. Wan dee sikj aun daut hoolen, waut ekj saj, dan woaren dee sikj uk aun daut hoolen, waut jie sajen. Oba dee woaren junt aul dit aundoonen, wäajen jie miene Nofolja sent. Wiels dee kjanen dän nich, dee mie jeschekjt haft” (Joh. 15:20-21). Dee Apostel, waut äwa dise Wieed nodochten, wundaden veleicht uk: “Woo kjenn wie een volstendjet Zeichnis jäwen, wan wie woaren Jäajna haben un vefolcht woaren?”

Soone Froagen stal wie ons uk. Aus Jehowa siene Zeijen hab wie de Oppgow jekjräajen, “äwa de gaunze Welt” “aule Sorten Menschen” to prädjen (Mat. 28:19-20). Woo kjenn wie dise Oppgow nokomen, besonda wan doa Vefoljunk verutjesajcht wort?

En de Aposteljeschicht läs wie, woo de Apostel un de aundre Christen to jane Tiet äare Oppgow met Jehowa siene Help volbrinjen kunnen. Dit Buak, waut du nu läst, woat die halpen, dise Jeschichten bäta to vestonen un die doaräwa nenntoloten, waut doa aules aunjinkj. Du woascht uk seenen, woo väl Gott sien Volkj vondoag dän Dach met de ieeschte Christen äwareen haft. Wie haben nich bloos deeselwje Oppgow, oba dee woat uk sea soo derchjefieet aus don. Un wan du doaräwa nojrebbelst, woat dien Gloowen secha jestoakjt woaren, daut Jehowa Gott noch emma sien Volkj oppe Ieed aunleiden deit.

Wie hopen un bäden, daut die daut Bibelbuak Aposteljeschicht halpen woat, dien Vetruen opp Jehowa to stoakjen. Dan woascht du die secha sennen, daut Jehowa die halpen woat un daut du derch dän heiljen Jeist woascht Krauft kjrieen. Wie wenschen die, daut du derch dit Studium wieda een volstendjet Zeichnis äwa Gott sien Kjennichrikj jäwen woascht un aundre halpen kaust, opp dän Wajch to komen, waut no de Radunk fieet (Apj. 28:23; 1. Tim. 4:16).