KAPITEL 2
De Menschen velieren daut Paradies
Een Enjel stalt sikj jäajen Gott un veleit uk Adam un Eva doatoo. Soo komen de Sind un de Doot opp.
LANG ea Gott de Menschen muak, haud hee väle Jeista em Himmel jemoakt, daut wieren de Enjel. Eena von dee stald sikj oba jäajen Gott un wort lota Soton de beesa Fient jenant. Disa veleid Eva em Goaden Eden hinjalestich doatoo, von de Frucht to äten, waut Gott an veboden haud.
Soton räd derch eene Schlang met Eva. Hee jeef ar auntovestonen, daut et waut goodet jeef, waut Gott an nich jäwen wull. Hee säd uk, daut see nich stoawen wudden, wan see von de vebodne Frucht eeten. Soo died Soton daut doano han, daut Gott Adam un Eva väajeloagen haud. Hee stald daut soo han, aus wudd Ojjehuarsom jäajen Gott eene goode Mäajlichkjeit sennen, mea Frieheit un Vestentnis to kjrieen. Oba daut wia plaut jeloagen. Daut wia de ieeschte Onwoarheit, waut daut oppe Ieed jeef. Rajcht jesajcht jinkj daut hia om Gott sien Aumt aus hechsta Harscha. Soton leet dän Twiewel oppkomen, aus Gott äwahaupt daut Rajcht haud to harschen, uk aus dän siene Harschoft jerajcht un goot wia fa de Menschen.
Eva jleewd Soton. Ar funk de Frucht aun to jankren un see eet doavon. Lota jeef see uk äaren Maun doavon un dee eet uk. Soo deeden see sikj beid vesindjen. Oba daut wia nich bloos, daut see von de Frucht eeten. En Werkjlichkjeit stalden see sikj doamet jäajen Gott. Doaderch, daut Adam un Eva mootwellich ojjehuarsom wieren, weesen see Gott siene Harschoft auf, uk wan dee an aules jejäft haud, soogoa volkomnet Läwen.
De Nokomen “woat die dien Kopp vewunden, un du woascht am de Hak vewunden” (1. Mose 3:15)
Gott jeef to vestonen, daut hee de Schuldje bestrofen wudd. Hee säd verut, daut doa eena komen wudd, waut Soton, dee derch de Schlang jerät haud, wudd venichten. Disa woat enne Bibel Rada, ooda Nokomen jenant. Uk Adam un Eva veuadeeld Gott toom Doot. Oba hee leet an doawäajen noch fa eene jewesse Tiet läwen. Gott docht aun de Kjinja, waut see haben wudden, un haud Erboarmen met dee. Dise Kjinja wudden nich onen Hopninj sennen. De Rada, dän Gott wudd schekjen, wudd dän gaunzen Schoden wada gootmoaken, waut Soton derch dän Wadastaunt em Goaden Eden veuasoakt haud. Oba wäa dis Rada sennen wudd un woo dee Gott sien Väanämen wudd utfieren, wort en de Bibel soo bie langsom openboa jemoakt.
Gott schekjt Adam un Eva utem Paradies rut. Buten von dän Goaden Eden wia daut nich leicht. See musten schwoa schaufen, daut see äa Läwen moaken kunnen. Eva haud dan äa ieeschtet Kjint, daut wia Kain. See hauden noch aundre Säns, soo aus Abel un Sett, un uk noch Dajchta. Sett wia een Väavoda von Noah.
Stett sikj opp 1. Mose, Kapitels 3 bat 5 un opp Openboarunk 12:9.
