CHRISTEN es daut Jeboot jejäft, daut see sellen Jesus Christus sienen Doot jedenkjen. Dise Feia woat uk “dän Harn sien Owentmol” jenant (1. Korinta 11:20). Wuarom es dise Feia soo wichtich? Woo saul dee jefieet un wanea?

Aune 33 e. o. T. fieed Jesus daut Owentmol en. Daut wia aun dän Owent, aus daut Passafast wia. Dit Fast fieeden de Juden bloos eemol daut Joa, emma aun dän 14. Dach en de Moonat Nissan no dän judischen Kalenda. Om to weeten, wanea de Moonat Nissan aunfunk, pausten de Juden no dän Dach opp, wua daut em Farjoa ojjefäa 12 Stund dach un 12 Stund diesta wia. De Niemon, waut disen Dach aum notsten wia, wia dan de 1. Nissan. Von doa om 13 Doag wieda wort daut Passafast jefieet.

Aus Jesus ieescht daut Passafast met siene Apostel jefieet haud, schekjt hee Judas Iskariot wajch un fieed daut Owentmol en. Dit Fast sull nu enne Städ daut Passafast sennen un doawäajen sull daut uk mau eemol daut Joa jefieet.

En Matäus sajcht daut, Jesus neem een Broot, dankt doafäa, bruak daut, jeef siene Jinja daut un  säd: “Nämt un ät; dit es mien Kjarpa. Un hee neem een Kuffel Wien, un aus hee doafäa jedankt haud, jeef hee an daut un säd: Drinkjt aula doavon, wiels dit es mien Bloot en dän nieen Bunt, daut fa väle vegoten woat, daut an kjennen de Sinden vejäft woaren” (Matäus 26:26-28).

Eenje jleewen, daut daut Broot don werkjlich Jesus sien Fleesch wort un de Wien dän sien Bloot. Oba aus Jesus siene Jinja daut Broot jeef, wia je hee noch aum läwen un aun sienen Kjarpa fäld nuscht. Haben de Apostel dan opp iernst dän sien Fleesch jejäten un dän sien Bloot jedrunken? Nä, dan wudden je dee haben Menschenfleesch jejäten un Gott sien Jesaz jebroaken (1. Mose 9:3-4; 3. Mose 17:10). Un soo aus en Lukas 22:20 steit, säd Jesus: “Dit Kuffel es de niea Bunt en mien Bloot, daut fa junt vegoten woat.” Wort dit Kuffel werkjlich “de niea Bunt”? Secha nich, wiels een Bunt es een Vespräakjen un nich waut, waut eena aunfoten kaun.

Soo aus wie seenen, wia daut Broot un de Wien bloos een Jlikjnis. Daut Broot bedied Christus sienen volkomnen Kjarpa. Jesus neem een Broot, waut vom Passamol äwajebläwen wia. Daut wia onen Suadieech un onen Häw (2. Mose 12:8). En de Schreft bediet Suadieech foaken de Sind ooda waut vedorwnet. Daut Broot stald aulsoo dän volkomnen Kjarpa väa, waut Jesus opfad. Dee wia onen Sind (Matäus 16:11-12; 1. Korinta 5:6-7; 1. Petrus 2:22; 1. Johanes 2:1-2).

De rooda Wien bedied Jesus sien Bloot. Derch sien Bloot wort de niea Bunt jeltich. Soo aus Jesus säd, sull sien Bloot vegoten, daut doa kjennen de Sinden vejäft woaren. Doaderch kaun Gott Menschen fa rein aunseenen un dee en dän nieen Bunt oppnämen (Hebräa 9:14; 10:16-17). Derch disen Bunt ooda Vespräakjen es daut mäajlich jeworden, daut 144 000 true Christen kjennen em Himmel komen. Dee woaren doa Kjennichs un Priesta sennen, un daut woat fa aule Menschen toom gooden sennen (1. Mose 22:18; Jeremia 31:31-33; 1. Petrus 2:9; Openboarunk 14:1-3; 20:6).

Wäa saul dan biem Owentmol von daut Broot äten un von dän Wien drinkjen? Daut sellen bloos dee, waut deelhaben aun dän nieen Bunt un waut de Hopninj haben, em Himmel to  läwen. Gott jeft dee derch sienen heiljen Jeist to vestonen, daut see utjewält sent, noch mol Kjennichs em Himmel to sennen (Reema 8:16). Met dee muak Jesus uk eenen Bunt fa een Kjennichrikj (Lukas 22:29, NW).

Waut es dan oba met dee, waut de Hopninj haben, en een Paradies hia oppe Ieed to läwen? Uk dise hoolen Jesus sien Jeboot un fieren daut Owentmol, wiels see daut sea schazen, waut Jehova un Jesus jedonen haben. Dee nämen oba nich von daut Broot un von dän Wien. Jehova siene Zeijen fieren daut Owentmol eemol daut Joa aun dän 14. Nissan no Sonnenunjagank. Uk wan daut oppe Ieed aul mau een poa dusent von dee jeft, waut de Hopninj haben, em Himmel to komen, es dise Feia doch fa aule Christen wichtich. Daut es eene goode Jeläajenheit, wua eena kaun äwa de groote Leew nodenkjen, waut Jehova Gott un Jesus Christus bewäsen haben (Johanes 3:16).