Haft die mol wäa een Jeheemnis vetalt? – * En de Schreft rät daut von een besondret Jeheemnis. Daut es soo besonda, wiels daut von Gott kjemt. Un wiels de Menschen doa nuscht von wisten, wia daut een Jeheemnis. Mau rajcht de Enjel wullen mea doaräwa weeten. West du uk weeten, waut daut es? –

Lang trigj haft Gott de ieeschte beid Menschen jemoakt. Dee heeten Adam un Eva. Gott haft fa dee uk een sea scheenet Tus jemoakt. Daut es de Goaden Eden. Wan Adam un Eva no Gott horchen, kjennen dee met äare Kjinja toop de gaunze Ieed to soon scheenet Paradies moaken, aus de Goaden Eden es. Un dee kjennen doa fa emma läwen. Oba waut doonen Adam un Eva? –

Adam un Eva jehorchen Gott nich, un doawäajen läw wie vondoag nich em Paradies. Oba Gott sajcht, hee woat de gaunze Ieed noch mol to een scheenet Paradies moaken, wua aule daut scheen jeit un fa emma läwen kjennen. Oba woo woat Gott daut doonen? De Menschen weeten daut lang goanich. Daut es een Jeheemnis.

Aus Jesus dan no de Ieed kjemt, sajcht hee de Menschen mea äwa dit Jeheemnis. Hee sajcht, daut haft met Gott sien Rikj to doonen. Jesus lieet de Menschen uk, see sellen bäden, daut dit Rikj komen saul. Gott sien Rikj woat de Ieed to een schmocket Paradies moaken.

Freischt du die, daut du dit Jeheemnis weetst? – Dan denkj doaraun, daut bloos dee em Paradies läwen kjennen, waut no Jehova horchen. En de Schreft finj wie väle Jeschichten von Mana un Frues, waut Jehova jehorchten. Wurscht du wellen mea äwa dee weeten? – En dit Heft sent eenje von dise Jeschichten un wie woaren seenen, waut wie von dee lieren kjennen.