En de Schreft wia verutjesajcht, daut de Soton ons vefoljen wudd toom seenen, aus hee onsen Deenst nich wudd kjennen aufhoolen (Joh 15:20; Opb 12:17). Woo kjenn wie onse Gloowesbreeda halpen, waut en aundre Lenda Vefoljunk derchmoaken motten? Wie kjennen fa dee bäden. “Daut Jebäd von eenem jerajchten kaun väl utrechten” (Jak 5:16).

Om waut kjenn wie bäden? Wie kjennen Jehova froagen, daut hee onse Breeda un Sestren Moot jeft un dee halpt, daut dee nich Angst haben (Jes 41:10-13). Wie kjennen uk fa soone bäden, waut huach aunjestalt sent, soo daut dee äwa daut Prädichtwoakj goot jesonnen sent un “daut wie . . . ruich läwen kjennen” (1Ti 2:1-2).

En de Aposteltiet deeden de Christen fa Paulus un Petrus bäden, wiels dee vefolcht worden, un brukten doabie dee äaren Nomen (Apj 12:5; Ree 15:30-31). Veleicht weet wie nich, woo dee aula heeten, waut vondoag dän Dach vefolcht woaren. Oba wudd wie nich kjennen en onse Jebäda dän Nomen von dee äare Vesaumlunk brucken, von dee äa Launt ooda Omjäajent?