De Christen sent nich mea unja Moses sien Jesaz, wua uk de twee Jebooten met en sent, Gott un dän Näakjsten to leewen. Oba en dee beid Jebooten es doawäajen aules bennen, waut Jehova von ons velangt (Mat 22:37-39). Wäajens ons de Leew nich enjebuaren es, mott wie dee seenen to kjrieen. Woo? Eent wudd sennen: jieda Dach de Bibel läsen. Wan wie ons daut met de Schreft unjastonen, woo Gott siene Perseenlichkjeit krakjt es, dan woa wie enwoaren “woo goot” hee es (Ps 31:20). Soo woat onse Leew fa am toonämen un wie woaren emma dolla soo denkjen, aus hee deit. Daut woat ons uk bat doa brinjen, daut wie siene Jebooten jehorchen wellen, uk daut Jeboot, aundre to leewen – endoont, aus ons daut waut kost (Joh 13:34-35; 1Jo 5:3). Hia es dreeatlei aunjejäft, woo wie kjennen Freid haben, wan wie de Bibel läsen:

• Sikj en de Jeschicht nenloten. Stal die väa, du best doa uk bie. Waut wurscht du kjennen seenen ooda hieren ooda rikjen? Woo mott daut fa dee doa enne Jeschicht jewast sennen?

• Daut nich emma äwareen doonen. Eena wudd kjennen opp ludes läsen ooda bie waut oppjeschnaktet metläsen. Enne Städ de Kapitels bloos enne Rieej derchtoläsen, wudd eena kjennen von eene jewesse Persoon ooda een jewesset Teema läsen. Biejlikj wudd eena kjennen daut 4. ooda 16. Poat en daut Heft Help fa daut Bibelstudium brucken, wan eena mea von Jesus läsen well. Eena wudd uk kjennen daut gaunze Kapitel läsen, von wua de Varsch fa dän Dach jenomen es. Ooda eena wudd de Bibelbieekja uk kjennen soo läsen, aus dee mol no de Rieej no oppjeschräwen worden.

• Läsen un daut vestonen. Een Kapitel dän Dach läsen un daut uk vestonen un doaräwa nodenkjen, es wiet bäta, aus miere Kapitels läsen, bloos daut eena wiet jekomen es. Finj daut ut, wua daut krakjt wia. Kjikj uk no de Eenselheiten. Bruck de Launtkoaten un de Varzh toom wiedaschlonen. Unjasto die oppet weinichste eene Sach, waut du nich hast kunt vestonen. Wan daut jeit, dan bruck krakjt soo väl Tiet toom nodenkjen aus toom läsen.